Biography of Hazrat Ali Radhiallahu Anhu

Diniraah 5/30/2020 06:20:00 AM

Alqaab :

‾‾‾‾‾‾‾‾‾‾‾
Murtaza, Haidar e Karraar, Maula e Kaa'inat, Faatih e Wilaayat, Wali e awwal, Imaam-ul-Muttaqeen, Baab-e-Madeenat-ul-ilm, Ashja-un-Naas, Asadullāhi fil ghaalib.

Kunniyat : Abu Turaab.

**********
Aap ki wilaadat 13 Rajab (23 October 600 A.D.) ko hui.


Aap ke waalid ka naam Abu Taalib Imraan ibne Abdul Muttalib aur waalida ka naam Hazrate Faatima bint Asad radiy-Allāhu ta’ala anha hai.

Aap Quraish ke Banu Haashim qabeele se ta’alluq rakhte hain.

Biography of Hazrat Ali Radhiallahu Anhu (हजरत अली की मुबारक जिंदगी)


Aap ki waalida haalat e hamal me Ka’abatullāh ka tawaaf kar rahi thi aur un ko dard e zeh shuru hua aur Rab ta’ala ke hukm se wo Ka’aba shareef ke andar chali gai. 
Is tarah Aap ki wilaadat Ka’abatullāh ke andar hui. 

Wilaadat ke baad aap ne aankhen nahi kholi aur jab Huzoor sallallāhu alaihi wa sallam  tashreef laaye to Abu Taalib ne unhe aap ki god me diya to aap ne aankhen kholi ya’ani dunya me aane ke baad aap ne sab se pehle Huzoor Sarwar e kaa'inat  sallallāhu alaihi wa sallam  ko dekha.
Huzoor sallallāhu alaihi wa sallam  ne Abu Taalib se puchha ke ‘Is ka kuchh naam rakha?’ Unho ne kaha ke “Asad (lion) rakhne ka soch rahe hain. Aap ki kya raay hai?” Huzoor ne farmaaya “Is ka naam ‘Ali’ rakha jaaye.”

**********
Hazrat Abdul Muttalib ne Huzoor sallallāhu alaihi wa sallam ki parwarish ki zimmedaari apne bete Abu Taalib ko di thi. Jab Huzoor ne bade hokar tijaarat karna shuru kiya aur aap ka nikaah Hazrate Khdeeja radiy-Allāhu ta’ala anhu se hua, aur Aap ne dekha ke chacha Abu Taalib ke haalat bure hain aur zyada aulaad hone ki wajah se sab ki parwarish karna mushkil hai. Aap ne un ke paas jaakar farmaaya ke “Chacha, Aap ke mujh par bahot ehsaan hain aur main chaahta hu ke aap apne kisi ek ladke ki zimmedaari mujhe de den.” Abu Taalib ne kaha “Kabhi bhi ehsaan ki baat mat karna. Lekin tum jis ladke ko chaaho apne saath le jaao.”
Aap Hazrat Ali ko apne saath le gaye aur is tarah bachpan se hi Hazrate Ali ki parwarish Huzoor ke saath un ki nigraani me hui.


Biography of Hazrat Ali Radhiallahu Anhu (हजरत अली की मुबारक जिंदगी)


Ek roz jab Ali ghar me daakhil hue to dekha ke Hazrate Mohammad Mustafa sallallāhu alaihi wa sallam aur Hazrate Khadeeja namaaz padh rahe the. Ali ne yeh amal ka pehle kabhi nahi dekha tha. Jab dono ne salaam phera to Ali ne puchha ke “Aap kya kar rahe the?” Huzoor sallallāhu alaihi wa sallam ne farmaaya ke “Main ALLĀH ka nabi bankar aaya hu aur tumhe bhi Islaam apnaane ki daawat deta hu.” Ali ne kaha “Main apne walidain se mashwara karke faisla karna chaahta hu.” Huzoor ne farmaaya “Ali! Abhi ALLĀH ki taraf se Islaam ka aur nubuwwat ka ailaan e aam karne ka hukm nahi hua. Is liye tum kisi se mashwara nahi kar sakte. Tumhe abhi hi tay karna hoga.’ Ali  ne kuchh der socha aur phir kaha ke “Main islaam apnaana chaahta hu. Kyun ki maine hamesha aap ki har baat aur amal ko sacha dekha hai. Is liye mujhe yaqeen hai ke aap ALLĀH ke nabi hain.”
Is tarah Aap 610 A.D. me 10 baras ki umr me musalman hue.
Aap bacho me sab se pehle Eimaan laaye aur as-Saabiqoon al-Awwaloon me shaamil hain.

**********
13 Nabawi (622 A.D.) me jab ALLĀH ke hukm se Huzoor sallallāhu alaihi wa sallam ne Makka se hijrat kar rahe the tab Hazrate Ali ko apne bistar par sone ke liye kaha aur farmaaya ke “Aye Ali! Ye kuchh amaanate main tumhe dekar jaata hu. Subah ko tum un logo ko apni apni amaanaten dekar Yaṡrib (Madeena) aa jaana.”
Hazrat Ali itminaan se Nabi ke bistar par lait gaye. Kyun ki Aap ko yaqeen tha ke Huzoor sallallāhu alaihi wa sallam ne farma diya hai to Kal subah ko main sab ko amaanate dekar Madeena khairiyat se pahunch jaaunga. Mujhe koi takleef nahi de sakega.

Is ke baad Aap bhi apni waalida ke saath Makka se hijrat karke Madeena shareef aa gaye.
Aap roz raat ko Huzoor sallallāhu alaihi wa sallam ke makaan par pehra dete the.

***********
Aap Huzoore akram sallallāhu alaihi wa sallam ke daamaad hain.
1 Zil Hijjah 2 Hijri (623 A.D.) ko Aap ka nikaah Hazrate Khaatoon e jannat Sayyeda Faatima Zahra radiy-Allāhu ta’ala anha ke saath hua.
Huzoore akram sallallāhu alaihi wa sallam ke farmaan par Aap ne jung e Badr me jo girah mili thi use 480 dirham me bechkar us me se aadhi raqam se mehar ada kiya.
Aur baaqi raqam se Huzoore akram sallallāhu alaihi wa sallam ne kuchh saamaan khareeda aur Sayyeda Faatima Zahra ko bidai ke waqt ek lihaaf, ek chamde ka gadda jis ke andar khajoor ke patte bhare hue the, 2 chakkiya, 1 mashk aur 2 mitti ke ghade diye.
Nikaah ke baad Huzoor sallallāhu alaihi wa sallam ne Sayyeda Faatima ko bulaakar irshaad farmaaya “Aye Faatima! Maine tumhara nikaah apne khaandaan ke behtareen shakhs ke saath kar diya hai.”

***********
Aap panjatan me shaamil hain.
Aap Ashra e mubashara me se hain.

Aap Aa'imma e Ahle bait ke sab se pehle Imaam hain.

Aap Faatih e wilayat aur Wali e awwal hain ya’ani Ummate Mustafa me Auliya Allāh ke silsile ki shuruat aap se hui.

Aap Huzoor sallallāhu alaihi wa sallam ke khalifa hain.
Aur Aap ke 4 khulfa (Imaam Hasan, Imaam Husain, Khwaja Hasan Basri, Khwaja Kumail bin Ziyad radiy-Allāhu ta’ala anhuma) se tareeqat ke tamaam ‘Alawi’ silsile jaari hain.


Biography of Hazrat Ali Radhiallahu Anhu (हजरत अली की मुबारक जिंदगी)


Aap ke baare me Huzoor Rasool-Allāh sallallāhu alaihi wa sallam ne farmaaya hai ke

(1) Ali mujh se hai aur Main Ali se hu.
(2) Jis ka main maula hu, Ali bhi us ka Maula hai.
[10 Hijri (632 A.D.) me Hajjatul wida ke baad Ghadeer e Khum par]
(3) Aye ALLAH! Tu us ko dost rakh jo Ali se dosti rakhe aur zaleel kar us ko jo Ali se dushmani rakhe.
(4) Ali se Mohabbat Eimaan ki nishaani he Aur Ali se Nafrat Nifaaq ki nishaani hai.
(5) Main ilm ka shaher hu aur Ali us ka darwaaza.
(6) Aye Ali! Mere nazdeek tumhara martaba aisa hai jaisa Hazrate Moosā alaihis salaam ke darbaar me Hazrate Hāroon alaihis salaam ka. (9 Hijri me Junge Tabook ke mauqe par)
(7) Qayaamat me Hazrate Ādam alaihis salaam apne bete Hazrate Sheeṡ alaihis salaam ke saath fakhr karenge aur main Ali ke saath.
(8) Aye Ali! Tum duniya me bhi sardaar ho aur aakhirat me bhi sardaar ho.
(9) Agar log is qadar roze rakhen ke kamaan ki tarah tedhe ho jaaye,
Phir agar Ali se bughz rakhe to Dozakh me jaayenge.
(10) Tamaam Nabiyo ki zurriyaat (nasab) un ki sulb me hain aur meri zurriyaat Ali ibne Abu Taalib ki sulb me hai.

************
Ek martaba Huzoor Nabi e kareem sallallāhu alaihi wa sallam ne apna daste e aqdas apne sine mubarak par rakhkar farmaaya “Aye Ali! Tum Haadi ho aur mere baad raah paane waale tum se raah paaynge. Wilaayat ke silsile tum se jaari rahenge aur ummat ke Aulia, Ulama aur Ghauṡ o Aqtaab tum se faiz paaynge.”

************
Ek baar kisi ne Aap se puchha “Aap ko Rasool-Allāh sallallāhu alaihi wa sallam se kitni Mohabbat hai?”
Aap ne farmaaya “Khuda ki qasam! Huzoore akram sallallāhu alaihi wa sallam se hume apne maal, aulaad aur waalidain se bhi ziyada mohabbat hai, Koi pyaasa jitna thande paani ko chaahta hai hum is se bhi badhkar Aap sallallāhu alaihi wa sallam ko chaahte hai.”

************
Aap ka laqab ‘Haidar’ aur ‘Asadullāh’ ya’ani Sher e khuda hai.

Aap ka Ilm, Shuja’at, Taqwa, Saadgi, Qana’at, Sabr, Sakhaawat aur Husn e akhlaaq mash'hoor hai.
Kai baar Aap ke Ilm aur Shuja’at se Islaam ko faa'ida hua.

************
Ek martaba Aap ne farmaaya “Mujhe 3 cheezen bahot pasand hain :
Mehmaan ki Khidmat, Garmi ka Roza aur Deen ke dushman par Talwaar chalaana.”

************
Aap ne Ghazwa e Tabook ke ilaawa tamaam jung me apni shuja’at dikhaai.
Aap ki talwaar ‘Zul-Fiqaar’ mash'hoor hai.

************
Ramazaan 2 Hijri me Jung e Badr ki ibtida me kaafiro ne muqaabale ke liye humsar bhejne ke liye kaha to Huzoor sallallāhu alaihi wa sallam ne Hazrate Hamza, Hazrate Ali ibn Abi Taalib aur  Hazrate Ubaida ibne Haariṡ radiy-Allāhu ta’ala anhuma ko Quraish ke muqaabale ke liye bheja.
Hazrate Ali ne Waleed ibn Utba ko qatl kiya. Hazrate Hamza ne Shaiba ko qatl kiya aur phir Hazrate Ubaida ke shadeed jakhmi hone ke baad Utba ka muqaabala karke use bhi qatl kiya.
Phir jung me apni bahaaduri dikhaate hue Aap ne taqreeban 22 kaafiro ko qatl kiya.

Junge Badr ke baad Huzoor sallallāhu alaihi wa sallam ke ne Aqba bin Abi Ma'eet ko us ki gustaakhiyo ki wajah se qatl karne ka hukm farmaaya to Aap ne uthkar us ka sar qalam kar diya.

*************
Shawwaal 3 Hijri me Junge Uhad ki ibtida me Quraish ke alam bardaar Talha ibn Abi Talha al-Abdari aage aaya to Aap ne us ka muqaabala karke use qatl kiya.
Jab Jable Rumah par nigraani karne ke liye muqarrar tirandaaj ashaaba ki galti ki wajah se kuffaar ka lashkar musalmano par ghaalib hone laga the aur Huzoor sallallāhu alaihi wa sallam par hamla kiya tab Aap dusre ashaaba ke saath bahot bahaaduri se kaafiro ka muqaabala karte rahe aur unhe aage aane se roka. 

*************
Shawwaal 5 Hijri me Jung e Khandaq ki ibtida me Amr bin Abdud ne kaha ki “Kaun hai jo mere muqaabale ko aata hai?” Jab us ne 3 baar muqaabale ke liye lalkaara to Aap muqaaabale ke liye aage aaye. Amr bin Abdud ne ghode se utarkar talwara se Aap ke sar par waar kiya. Aap ne us waar ko roka lekin waar itna sakht tha ki talwar dhaal aur amaame ko kaat'ti hui peshani par lagi. Is jakhm ka nishaan Aap ki peshaani par hamesha ke liye raha. Phir Aap ne Zulfiqaare Haidari se us par waar kiya. Aap ki talwaar us ke shaane ko kat'ti hui kamar ke paar ho gai aur woh girkar mar gaya.
Aap munh pherkar waha se chale aaye. Hazrate Umar radiy-Allāhu ta’ala anhu ne kaha “Aye Ali ! Tum ne Amr bin Abdud ki jirah kyun nahi utaari? Us ki jirah bahot achhi thi.” Aap ne farmaaya “Aye Umar! Zul-Fiqaar ke waar se woh is tarah be-qaraar hokar zameen par gira ki uski sharmgaah khul gai. Isi liye haya ki wajah se maine munh pher liya.”

*************
7 Hijri (May/June 628 A.D.) me Jung e Khaibar ke mauqe par jab musalmano ko Khaibar par fateh haasil nahi ho rahi thi tab Huzoor sallallāhu alaihi wa sallam ne Hazrate Ali radiy-Allāhu ta’ala anhu ko bulaaya aur jab Hazrate Ali ne kaha ke “Huzoor! Meri aankho me shadeed dard hai.” to Huzoor sallallāhu alaihi wa sallam ne apna luaab e dahan (thoonk) un ki aankho me lagaaya. Jis se foran Hazrate Ali ki sab takleef door ho gai aur itna hi nahi, Hazrate Ali farmaate hain ke “Meri aankho ki roshni aur tez ho gai.”
Phir Huzoor Rasool-Allāh sallallāhu alaihi wa sallam ne Hazrate Ali ko musalmano ke lashkar ke saalaar banaakar bheja. Aap ne pehle yahudiyo ko islaam ki daawat di lekin wo na maane. Qile ka raees Murahhab aage aaya aur ek sher padha “Khaibar khub jaanta hai ki main Murahhab hu, Aslaaha posh hu, bahot hi bahaadur aur tajurbekaar hu.” Aap ne jawaab me ek sher padha “Meri maa ne mera naam Haidar rakha hai, Main kachar ke sher ki tarah haibatnaak hu.” Murahhab ne aage badhkar Hazrate Ali par talwaar se waar kiya magar Aap ne khud ko bachaaya aur phir aage badhkar is zor se waar kiya ki zarb se khod kata, maghfar kata aur Zulfiqaare Haidari sar ko kat'ti hui daanto tak utar gai. Yahudi fauj ne Aap par hamla kar diya lekin Aap ne muqaabala karte hue sab ko naakaam kar diya aur Haariṡ, Usair, Aamir wagairah .pahelwaano ko qatl kar diy
Jab  Jung ke dauraan ek yahudi ne Hazrate Ali par hamla kiya aur Aap ke haath se dhaal gir gai. Aap ne Khaibar ke qile ke darwaaze par pahunchkar qile ka faatak ukhaad liya aur kiwaad ko dhaal banakar ladte rahe.
ALLĀH ta’ala ke fazl se musalmano ko fatah haasil hui. 
Ashaaba farmaate hain ke “Baad me taqreeban 40 sahaaba ne milkar us darwaaze ko uthaane ki bahot koshish ki lekin phir bhi wo use hila bhi na paaye.”

**********
Fatah Makka ke mauqe par raat ko Makka se 10 mile door Mar-uz-Zahran maqaam par musalmano ke lashkar ne wuqoof karne ke baad 20 Ramazan 8 Hijri (11 January 630 A.D.) ko Huzoor sallallāhu alaihi wa sallam ne lashkar ke 4 giroh banaakar Makka ki taraf kooch ki.
Jin me se ek giroh Hazrat Ali al-Murtaza radiy-Allāhu ta’ala anhu ki sardaari me Kudai ki jaanib se kooch ki. Yeh giroh baghair koi muqaabale ke aage badha aur Makka me daakhil hua.

Fatah Makka ke baad Aap ne Hawairis bin Nukeed ko pakad kar qatl kiya. Yeh shakhs Makka me Huzoor sallallāhu alaihi wa sallam ko azeeyat deta tha aur un ki buraai karta tha.

**********
8 Hijri (January 630 A.D.) me Jung e Hunain me jab kaafir musalmano par ghaalib ho gaye tab Aap ne Huzoor sallallāhu alaihi wa sallam ki hifaazat ki jab tak ki musalmano ne muttahid hokar phir se ghalba haasil kiya.

**********
9 Hijri (October 630 A.D.) me Junge Tabook ke mauqe par Huzoor sallallāhu alaihi wa sallam ne Hazrate Ali ko Madeena me theharne ke liye farmaaya to Aap ne arz ki “Ya Rasool-Allāh sallallāhu alaihi wa sallam! Mujhe aurto aur bacho me chhodkar jaa rahe hain.” Huzoor sallallāhu alaihi wa sallam ne irshaad farmaaya “Aye Ali! Mere nazdeek tumhara martaba aisa hai jaisa Hazrate Moosā alaihis salaam ke darbaar me Hazrate Hāroon alaihis salaam ka lekin mere baad koi nabi nahi aayega.”


Biography of Hazrat Ali Radhiallahu Anhu (हजरत अली की मुबारक जिंदगी)


Ek baar jung ke dauraan Aap ne ek yahudi ko zameen par gira diya aur us ke seene par baithkar us ka sar kalam karna chaaha. Itne me woh yahudi ne Aap ke chehre par thoonk diya. Aap foran us ke seene par se neeche utar gaye aur niyyat karke namaaz padhne lage. Woh yahudi hairat se dekh raha tha. 
Jab aap namaaz se faarigh hue to yahudi ne puchha “Aye Ali! Tum mujh par ghaalib ho gaye the aur phir tum ne mujhe chhod kyun diya?”
Aap ne farmaaya ke “Main sirf  ALLĀH ki raza ke liye tujhe qatl karne waala tha. Lekin jab tum ne mere chehre par thoonka to mujhe ghussa aaya. Is liye main tumhe chhodkar namaaz padhne laga. Taake nafs ka zor khatm ho jaaye aur tumhe qatl karne me meri nafsaani khwaahish shaamil na ho.”
Yeh sunkar woh yahudi aur us ke saathi musalman ho gaye.

**********
Ek martaba Huzoor sallallāhu alaihi wa sallam ne Maqaame Sahba par namaaze zohar ada farmai. Phir Hazrat Ali radiy-Allāhu ta’ala anhu ko kisi kaam ke liye bheja. Jab Aap waapas aaye to Huzoor sallallāhu alaihi wa sallam namaaze asr ada kar chuke the. Huzoor sallallāhu alaihi wa sallam apna sar Hazrat Ali ki god me rakhkar aaraam farmaane lage. Aap ne Huzoor sallallāhu alaihi wa sallam ko khalel na pahunche is wajah se koi harkat na ki yahan tak ke sooraj ghuroob hone laga. Huzoor sallallāhu alaihi wa sallam ne jab apni aankhe kholi to Aap ne saara maajra sunaaya. Huzoor sallallāhu alaihi wa sallam ne baargaahe ilāh me arz ki “Maula! Ali teri aur tere rasool ki ita’at me tha. Tu us ke liye sooraj ko lauta.” ALLĀH ta’ala ne Huzoor sallallāhu alaihi wa sallam ki dua se sooraj ko asr ke waqt par waapas lautaaya. 

**********
Aap namaaz khushu aur khuzu ke saath is tarah padhte ke tamaam cheezo ko bhul jaate.
Junge Uhad me Aap ke pair me teer chubh gaya aur jab bhi use nikaalne ki koshish kai jaati Aap ko bahot takleef hoti thi. Phir yeh mashwara kiya gaya ke jab Hazrate Ali haalat e namaaz me khade ho tab is teer ko nikaala jaaye.
Chunaanche jab Aap namaaz padhne me mashgool the tab jambur ke zariye Aap ke pair me se us teer ko nikaala gaya. Jakhm me se khoon jaari ho gaya lekin aap ko dard ka ehsaas na hua.

***************
Aap farmaate hain ke
“Main Jannat ke shauq me ibaadat nahi karta ki yeh ibaadat nahi Tijaarat hai,
Main Dozakh ke khauf se ibaadat nahi karta ki yeh ibaadat nahi Ghulami Hai,
Main ibaadat sirf is liye karta hu ki mera Rabb hi ibaadat ke qaabil hai.”

***************
Ek martaba Aap ghar tashreef laaye to Hazrate Faatima radiy-Allāhu anha ne kaha “Maine yeh soot kaanta hai. Aap baazaar jaakar ise bech kar kuchh khaane ka saamaan le aa'iye taaki Hasan o Hussain ko khaana khilaun.”
Aap wo soot lekar baazaar gaye aur use 6 dirham me bech diya. Aap un paiso se kuchh khareedne ka soch hi rahe the ki ek saa'il ne ALLĀH ke naam par maanga. Aap ne foran wo 6 dirham maangne waale ko de diye.
Aap waapas jaane lage tab ek aaraabi aaya jis ke paas bahot farba oontni thi. Wo bola “Aye Ali! Yeh oontni khareedoge?” Hazrat Ali ne farmaaya ‘Paise paas me nahi hain.’ Us ne kaha “Udhaar deta hu.” Yeh kehkar  oontni ki rassi Aap ke haath me de di aur chala gaya. Itne me ek dusra aaraabi aaya aur bola “Ali ! Oontni bechte ho?” Aap ne farmaaya “Le lo.” Us ne kaha “300 dirham nagad deta hu.” Yeh keh kar 300 dirham diye aur oontni le kar chala gaya. 
Phir Aap ne pehle waale aaraabi ko talaash kiya, magar nahi mila.
Aap ghar aaye to dekha ki Huzoor Rasool-Allāh sallallāhu alaihi wa sallam un ke yaha tashreef farma hain. Huzoor sallallāhu alaihi wa sallam ne Hazrat Ali ko dekha to muskura kar farmaaya “Ali ! Oontani ka qissa tum sunaate ho ya main sunaau?” Aap ne arz kiya “Huzoor! Aap hi suna'iye.”
Huzoor sallallāhu alaihi wa sallam ne farmaaya “Pehla aaraabi Jibr'eel the, dusra Isrā'eel the aur woh oontani jannat ki woh oontani thi jis par jannat me Faatima sawaar hongi. Tum ne saa'il ko 6 dirham diye to Khuda ko tumhara Isaar pasand aaya aur is ke badle me duniya me bhi us ne tumhe us ka ajr oontani ke khareed-o-farokht ke zariye diya.”

***************
Ek martaba Sayyeda Faatima radiy-Allāhu ta’ala anha bahot beemaar ho gai aur bistar se utarne ki bhi taaqat na rahi. Hazrte Ali radiy-Allāhu ta’ala anhu ne un se puchha “Aye Faatima! Agar aap ki koi khwaahish ho to mujhe bata'iye.” Yeh sunkar Sayyeda Faatima ne farmaaya “Meri koi khaas khwaahish nahi.” Aap ne farmaaya “Magar main chaahta hu ke aap ke liye kuchh lekar aaun.” Sayyeda Faatima ne kaha “Agar aap mere liye koi cheez laana hi chaahte hain to ek anaar lekar aaiye.”
Aap baazaar me gaye. Magar us waqt anaar ka mausam na hone ki wajah se kahi par bhi anaar na mila. Bahot talaash karne par ek shakhs ke paas ek anaar mila. Aap ne us ki qeemat dekar woh anaar khareed liya.
Jab Aap ghar ki taraf waapas aa rahe the tab aap ne dekha ki maqaam par logo ki bahot bheed jama hui hai. Aap ne logo se puchha “Kya muamala hai? Ye sab log yaha par kyun jama hue hain?” Logo ne bataaya ki “Ek shakhs bahot beemaar hai. Use anaar ki zaroorat hai. Magar kahi par anaar nahi mil raha hai. Ab aap aa gaye hain to in shaa Allāh us ka kaam ho jaayega.”
Aap ne socha ki is aadami ko anaar ki zyada zaroorat hai. Aap ne apne haatho se us shakhs ko woh anaar khila diya. Woh shifayaab ho gaya aur aap ke liye dua ki “ALLĀH ta’ala aap ko is ka badla ata farmae aur aap ki pareshaani ko door farmae.”
Aap khaali haath apne ghar par tashreef laaye aur darwaaze par dastak di. Jab Sayyeda Faatima ne aakar darwaaza khola to aap ne puchha “Aap to itni beemaar thi ke bistar se uth nahi sakti thi to darwaze tak kaise tashreef laai?” Sayyeda Faatima ne bataaya ki “Jab aap gaye tab main bahot beemaar aur kamzor thi. Magar aap ne koi nek kaam kiya hoga jis ki barkat se ALLĀH ta’ala ne mujhe shifa aur taaqat ata farmai hai.”
Dono ke darmiyaan ye baaten ho rahi thi ki darwaaze par kisi ne dastak di. Puchha “Kaun hai?” Aane waale ne bataaya “Main Salmaan Faarsi hu.” Darwaaza khola to Hazrate Salmaan Faarsi radiy-Allāhu ta’ala anhu ne aap ko ek thaali di jis me 9 anaar the aur farmaya “Ye ALLĀH ta’ala ki taraf se aap ke liye in’aam hai. Huzoor Rasool-Allāh sallallāhu alaihi wa sallam ne mujhe ise aap tak pahunchane ke liye bheja hai.” Aap ne foran farmaaya “Ye mere liye nahi hai.” Hazrate Salmaan Faarsi ne wajah puchhi to Aap ne farmaaya ki “ALLĀH ta’ala farmaata hai ki tum ek neki karo main us ke badla (kam se kam) 10 ata farmaunga. Ye to sirf 9 hai. Is liye ye kisi aur ke liye honge.”
Hazrate Salmaan Faarsi ne foran ek anaar nikaalkar diya aur farmaaya “Yaqeenan aap ilm ka samundar hain. ALLĀH ta’ala ne aap ke liye 10 anaar hi bheje the magar maine aap ka imtihaan lene ke liye ek anaar chhupa diya tha.”

***************
Jab Huzoor sallallāhu alaihi wa sallam ne Hazrate Ali ko Yemen me Qaazi banaakar bhejne ka faisla kiya to Aap ne arz kiya “Ya Rasool-Allāh sallallāhu alaihi wa sallam! Mujhe Aap Qaazi banaakar bhej rahe hain, Haalaanki main nau-umr hu aur mujhe faisle ka tajurba bhi nahi.:
Huzoor sallallāhu alaihi wa sallam ne Aap ki baat sunkar apna daste aqdas Hazrate Ali  ke seene par rakha aur Dua ki “ALLĀH ta’ala tumhari zabaan ko ṡaabit rakhe aur tumhare dil ki raahnumai farmae.”
Is ke baad Aap ki kaifiyat yeh hui ki kabhi bhi do aadamiyo ke darmiyaan faisla karne me pareshaani nahi hui.

***************
Ek baar ek sahaabi ne Hazrat Ali se puchha “Aye Ali! Aap itni jaldi har sawaal ka jawaab kaise de dete hain?”
Aap ne us se puchha “Tumhare haath me kitni ungliyan hain?” Us ne jawaab diya “5.” Aap ne puchha “Itni jaldi jawaab kaise diya?” Sahaabi ne kaha “Yeh haath har waqt mere saamne rehta hai. Is liye mujhe ungliyan ginne ki zaroorat nahi.”
Aap ne farmaaya “Isi tarah puri kaa'inaat bhi mere saamne hai. Mujhe sawaal ka jawaab dhoondhna nahi padta.’

**********************
Jab Hazrat Ali ne Masjid e Kufa ke mimbar par daawa kiya ke “Puchh lo jo kuchh puchhna chaahte ho, is se pehle ke main tumhare darmiyaan se chala jaaun.” To ek shakhs utha aur us ne sawaal kiya ke “Aye Ali! Kaun se jaanwar bache dete hain aur kaun se jaanwar anda dete hain?” Aap ne farmaaya “Jin ke kaan baahar hain wo bache dete hain aur jin ke kaan andar hain wo ande dete hain.” Wo baith gaya.
Phir dusra shakhs utha aur us ne bhi yehi sawaal puchha ke “Aye Ali! Kaun se jaanwar bache dete hain aur kaun se jaanwar anda dete hain?” Aap ne farmaaya “Jo bache ko doodh pilaate hain wo bache dete hain aur jo bache ko daana chugwaate hain wo ande dete hain.”
Phir teesra shakhs utha aur us ne bhi yehi sawaal puchha ke “Aye Ali! Kaun se jaanwar bache dete hain aur kaun se jaanwar anda dete hain?” Aap ne farmaaya “Jo apni giza (khaana) ko chabaakar khaate hain wo bache dete hain aur Jo apni giza (khaana) ko nigal jaate hain wo ande dete hain.”

***************
Ek baar 4 shakhs Hazrate Ali radiy-Allāhu ta’ala anhu ke paas aaye aur kaha “Ilm maal se behtar kyun hain? Hamara sawaal ek hi hai, Magar hum chaahte hain ke aap sab ko is ka alag alag jawaab batayen.”
Aap ne sab ko alag alag jawaab dete hue farmaaya ke
[1] Ilm behtar hai kyun ki maal kharch karne se kam hota hai aur ilm kharch karne se badhta hai.
[2] Ilm behtar hai kyun ki maal ki tumhe hifaazat karni padti hai aur ilm tumhari hifazat karta hai.
[3] Ilm behtar hai kyun ki ilm waale ke dost zyada hote hain aur maal waale ke dushman zyada hote hain.
[4] Ilm behtar hai kyun ki ilm Ambiya ki wiraaṡat hai aur maal Namrood, Fir'aun aur Qaaroon ki wiraaṡat hai.

***************
Ek baar Aap se kisi ne puchha “Kis tarah pata chale ke insaan par aane waali museebat saza hai ya aazma'ish?”
Aap ne farmaaya “Agar museebat insaan ko ALLĀH ta'ala se door kare to woh saza hai, Aur agar museebat insaan ko ALLĀH ta’ala ke qareeb kare to woh aazma'ish hai.”

[Museebat aane par agar insaan yeh kahe ya soche ke ‘ALLĀH ne mujhe ye museebat kyun di hai?’ to woh ALLĀH ta'ala se door hua ya’ani woh museebat (us ke kisi gunaah ki) saza hai.
Aur Museebat aane par agar insaan yeh kahe ke ‘Aye mere Rab! Tu tere fazl o karam se is museebat ko door farmakar mujhe amn o aafiyat ata farma.’ to woh ALLĀH ta’ala ke qareeb hua ya’ni wo museebat us ke liye aazma'ish hai. ALLĀH ta’ala us ke fazl o karam se wo museebat zaroor door farmaega aur bande ko us ke sabr par ṡawaab bhi ata farmaega.]

***************
Ek baar kisi ne Aap se puchha ke “Jab hamari qismat pehle se hi likh di gai hai to dua ka kya faa'ida?”
To aap ne farmaaya ke “Ho sakta hai ke qismat me yehi likha ho ke maangne par milega.”

***************
Ek baar ek yahudi ne Aap se puchha “Kya aap mujhe Rabb ka deedaar kara sakte hain?” Aap ne farmaaya “Tum sooraj ke saamne gaur se dekhte raho.”
Woh kehne laga “Yeh kaise mumkin hai?” Aap ne farmaaya “Jab Rabb ta’ala ki makhlooq Sooraj ko dekh nahi sakte to phir sab ke khaaliq ka deedaar kaise kar sakoge.”

***************
Ek baar kuchh ghair-muslim ne Hazrate Ali radiy-Allāhu ta’ala anhu ke paas aakar 2 Sawaal puchhe :
[1] Woh kaun si cheez hai, jo hum dekhte hain lekin ALLĀH nahi dekhta?
[2] Qur’an majeed me har cheez (ka ilm) hai, magar aisa kya hai jo is me nahi hai?
 Aap ne jawaab diya :
 [1] ALLĀH ‘Khwaab’ nahi dekhta, Kyun ki use na neend aati hai na oongh.
 [2] Qur’an majeed me sab kuchh hai, Magar ‘Jhut’ nahi hai.

***************
Kisi ne Hazrat Ali se puchha ki “Jab Maa nahi hoti us ke bacho ko dua ka zariya kya hai?” Aap ne farmaaya “Koi Jheel agar sookh bhi jaaye to mitti me nami baaqi rehti hai, Isi tarah intiqaal ke baad bhi aulaad ke liye Maa ki duao ka aṡar jaari rehta hai.”

***************
Aqwaal :
‾‾‾‾‾‾‾‾‾‾
Aap irshaad farmaate hain :
(1) Dunya me raho magar dunya ko apne andar mat basao,
Kyun ki kashti jab tak paani ke upar rehti hai mehfooz hoti hai aur jab paani kashti me jaaye to woh doob jaati hai.

(2) Insaan duniya me is qadar mashgool hota hai ke use pata bhi nahi chalta ke
Jis kapde se us ka kafan banna hai wo bazaar me aa chuka hai.

(3) Baghair Ilm wa Zohad ke Ibaadat sirf jism ko thakaana hai.

(4) Agar koi shakhs tumhare zariye Hidaayat haasil kare
To ye tumhare liye har us cheez se behtar hai Jis par sooraj chamakta hai.

(5) Agar tum kisi ko chhota dekh rahe ho to tum use door se dekh rahe ho ya phir ghuroor se dekh rahe ho.

(6) Aye Ibne Ādam! Apne jism ko sanwaarne ki koshish me mat lage raho, Ek din use mitti me mil jaana hai.
Sanwarna hai to apni Rooh ko sanwaro, use Rab ke paas jaana hai.

(7) Khubsurti kapdo se nahi Ilm aur Adab se hoti hai.

(8) Aql jaisi koi daulat nahi aur jahaalat jaisi koi ghurbat nahi. Adab jaisi koi meethaas nahi aur mashware jaisa koi madadgaar nahi.

(9) Aql ek aisi Khudaaee ne'amat hai, Jo Ta’aleem aur Tajurbe se badhti hai.
Aur jab Ilm badhta hai to Guftagu mukhtasar ho jaati hai.

(10) Har cheez ka Sadqa hota hai.
Aql ka sadqa hai ke Jaahil ki baat sunkar bardasht kar lo, Bin zaroori Bahes mat karo.

(11) Lafz insaan ke ghulaam hote hain magar sirf bolne se pehle tak,
Bolne ke baad insaan apne alfaaz ka ghulaam ban jaata hai.

(12) Tumhari niyyat ka imtihaan us waqt hota hai jab tum aise shakhs ko madad karo jis se tumhe badla milne ki ummeed na ho.

(13) Achhe logo ki sohbat se bhalai haasil hoti hai,
Jaise hawa jab Khushbudaar cheez ke paas se guzre to woh bhi khushbudaar ho jaati hai.

(14) Bura dost koyle ki tarah hota hai,
Jab garm hota hai to haath jala deta hai,
Aur jab thanda hota hai to haath kaale kar deta hai.

(15) Insaan gham (dukh) nahi dete,
Insaan se waabasta ummeede gham deti hai.

(16) Log pyaar ke liye hote hain aur cheezen istamaal ke liye.
Magar baat tab bigadti hai jab cheezon se pyaar kiya jaaye aur logo ko istemaal kiya jaaye.

(17) Achhe logon ki ek khoobi ye bhi hoti hai ke unhe yaad rakhna nahi padta wo yaad reh jaate hain.

(18) Jo zara si baat pe Dost na rahe samajh lena woh kabhi Dost tha hi nahi.

(19) Sacha rishta baarish ki tarah nahi hota, Jo kuchh waqt ke liye aakar chali jaaye,
Balke Hawa ki tarah hota hai, Jo na dikhe tab bhi hamesha mehsoos hoti hai.

(20) Sache dost ki pehchaan ye hai ke use khush nahi karna padta,
Woh khud hi tum se khush rehta hai.

(21) Sacha dost agar ruth bhi jaaye to use baar baar manao,
Kyun ki heeron ki maala toot kar bhi heeron ki hi rehti hai.

(22) Kabhi apne dost ka imtihaan mat lo
kya khabar us waqt woh majboor ho aur tum ek achcha dost ganva do.

(23) Fazool bahes behtareen dost se juda kar deti hai.

(24) Kisi se bhi na-raazgi ka lamha itna taweel mat karo ke woh tumhare baghair jeena sikh le.

(25) Achhe logo ka tumhari zindagi me aana tumhari qismat hai,
Aur unhe sambhaalkar rakhna tumhaara hoonar.

(26) Agar Galat fehmiyo ko door na kiya jaaye to woh Nafrat me tabdeel ho jaati hai.

(27) Rishto ki khubsurti ek dusre ki na-gawaar baat bardaasht karne me hai.
Agar be-aib insaan dhundhoge to akele reh jaaoge.

(28) Zindagi ke har mod par suleh karna sikho.
Kyun ki jhukta wo hi hai jis me jaan hoti hai,
Akadna to murde ki pehchaan hoti hai.

(29) Zindagi ki asli khubsurti yeh nahi ke aap kitne khush ho
Balke zindagi ki asli khubsurti to yeh hai ke dusre aap se kitne khush hain.

(30) Us chiraagh ki tarah bano, jo ghareeb ki jhonpadi me bhi utni hi roshni deta hai jitni roshni ek baadshah ke mahal me deta hai.

(31) Khud ko paani ki tarah banao jo apna raasta banata rehta hai,
Us patthar ki tarah mat bano jo dusro ka raasta rok leta hai.

(32) Apni Zabaan ko Narm guftagu aur Salaam ka aadi banaao.
Is se tumhare Dost zyada aur Dushman kam honge.

(33) Tabiyat ki narmi aur Sakhaawat insaan ko Dushmano ke dilon me bhi mehboob bana deti hai.

(34) Agar koi tum se bhalai ki ummeed rakhe to use maayoos mat karo,
Kisi ki zaroorat ka tum se waabasta hona tum par ALLĀH ka khaas karam hai.

(35) Kisi ka dil mat dukhaao,
Kyun ki maafi maang lene ke bawajood use thoda sa bhi dukh zaroor rahega,
Jaise deewaar me lagi keel ko nikaalne ke baad nishaan reh jata hai.

(36) Kisi insaan ki khoobi ko pehchaano aur use bayaan karo,
Lekin agar kisi ki khaami pata chale to use bayaan na karna yehi tumhari khubi ka imtihaan hai.

(37) Hamesha dusro ke aib talaash karte rehne waale shakhs ki miṡaal us Makhi ki tarah hai jo pure jism ki khubsoorti ko chhod kar sirf jakhm waale hisse par baithti hai (gandagi pasand karti hai).

(38) Apni neki aur dusre ke gunaah ka tazkeera kisi se na karo,
Kyun ki apni neki ko chupaana tumhari Soch ka imtihaan hai aur dusre ke gunnah ko chupaana tumhare Kirdaar ka imtihaan hai.

(39) Insaan ke Kirdaar ki 2 hi Manzilen hain :
Dil me utar jaana, Ya phir dil se utar jaana.

(40) Logo ke dilo me apna maqaam is tarah bana lo ke mar jaao to tumhare liye dua karen aur zinda ho to tum se milne ki khwaahish rakhen.

(41) Zindagi ko zaroorat me rakho, Khwaahishaat ki taraf na le jaao.
Zaroorat faqeero ki bhi puri hoti hain,
Aur khwaahishaat baadshaho ki bhi baaqi reh jaati hai.

(42) Jaha tak ho sake laalach se bacho, Laalach me Zillat hai zillat.

(43) Aye Ibne Ādam! Ilm haasil kar, Ilm dil ko roshni deta hai. Daulat ki laalach se bach, Daulat ki laalach andha bana deti hai.

(44) Deen ki paabandi aadami ko museebato se bachaati hai aur dunya ki laalach aafat me daalti hai.

(45) Apni Umar aur Daulat pe aitbaar mat karo,
Kyun ki jo cheez ginti me aa jaaye wo hamesha khatm hone wali hai.

(46) Un parindo ki tarah bano jo ek ghunt paani peekar ALLAH ta’ala ka shukr ada karte hain.
Aur insaan itni saari ne'amate paakar bhi ALLĀH ta’ala ka shukr ada nahi karta.

(47) Sabr ek aisi sawaari hai jo tumhe girne nahi deti, na kisi ke qadmo me aur na kisi ki nazro me.

(48) Sabr karne waala apni kaamyaabi zaaya nahi karta zamaana chaahe kitna hi guzre.

(49) Be-sabri sabr se zyada takleef deti hai.
Raah wo pakdo jo bando ko Rab se mila deti hai.

(50) Hamesha zindagi is tarah basar karo ke dekhne waale tumhare Dard pe afsos ke bajay tumhare Sabr pe rashk kare.

(51) Agar tum us waqt muskura sakte ho jab tum bilkul toot chuke ho,
To yaqeen jaano tum ko kabhi koi nahi tod sakta.

(52) Zindgi me khud ko kabhi kisi Insaan ka aadi mat banaana,
Kyun ki insaan bahot Khudgarz hai, Jab aap ko pasand karta hai to aap ki Burai bhul jaata hai aur jab aap se Nafrat karta hai to aap ki achhaai bhul jaata hai.

(53) Dunyadaaron ki sohbat ikhtyaar na karo kyun ki agar tu Tang-dast huwa to ye tujhe chhod denge aur agar to Daulat-mand huwa to tujh se hasad karenge.

(54) Ikhtiyaar, taaqat aur daulat milne par log badalte nahi balke be-naqaab ho jaate  hain.

(55) Kabhi bhi apni Jismaani taaqat aur Daulat par bharosa mat karna,
Kyun ki Beemaari aur Ghurbat aane me der nahi lagti.

(56) Dua darwaaze par dastak ki tarah hai.
Hamesha Dua maangte raho,
Kyun ki baar baar dastak se darwaaza khul hi jaata hai.

(57) Jab ALLĀH ki baargaah me tumhari Duaen qubool na ho rahi ho to apni Ghiza aur Guftagu ka ehtesaab karo.

(58) Logo ko dua ke liye kaho us se behtar hai ke saath me aise amal bhi karo ke logo ke dilo se aap ke liye dua nikle.

(59) Khushi ke mauqe par kabhi Waada mat karo
Aur Ghusse ki haalat me kabhi Faisla mat karo.

(60) 3 insaan 3 cheezo se Mehroom reh jaate hain,
[1] Jhoot bolne wala Izzat se,
[2] Ghussa karne wala Durust faisle se,
[3] Jald-baazi karne wala Kaamyaabi se.

(61) Agar tum apne andar se ghuroor ki aadat ko mita dena chaahte ho to Ghareeb insaan ko Salaam karte raho.

(62) Jhute ki sab se badi saza ye hai ki us ke Sach ka bhi koi aitbaar nahi karta.

(63) Jo zulm ke zariye shohrat (rutba) chaahta hai,
ALLĀH ta’ala use Insaaf ke zariye zaleel karta hai.

(64) 3 Cheeze insaan ko ALLĀH se door karti hai :
[1] Apne Aamal ko zyada samajhna.
[2] Apne Gunaaho ko kam samajhna ya bhul jana.
[3] Khud ko sab se Behtar samajhna.

(65) Gunaah zeher jaisa hota hai,
Thoda ho ya zyada, Nuqsaan to karta hi hai.

(66) Sab se bada gunaah wo hai jo karne waale ki nazar me chhota hai.

(67) Insaan gunaaho ki wajah se jahannam me nahi jaata hai,
Balki un gunaaho ki tauba na karne se jahannam me jaata hai.

(68) Himaaqat (be-waqoofi) bahot bura saathi aur Buraai bura darwaaza hai.

(69) Agar yeh yaqeen rakhte ho ke tumhara rizq ALLĀH ke paas hai to
Rizq ki nahi, ALLĀH ki talaash karo jis ke paas tumhara rizq hai.

(70) Jis ka raabta khuda ke saath ho woh naakaam nahi hota, Naakaam woh hota hai Jis ki umeeden duniya se waabasta hon.

(71) Din ko rizq talaash karo aur raat ko use talaash karo jo tumhe rizq deta hai.

(72) Logo ke khauf se haq baat kehne se na rooko,
Kyun ki na to koi maut ko qareeb kar sakta hai
Aur na koi rizq ko door kar sakta hai.

(73) Neki karne se buzurgi milti hai aur shukr karne se ne'amaten badhti hai.

(74) Pareshaani Khaamosh hone se kam, Sabr karne se Khatm aur Shukar karne se Khushi me badal jaati hai.

(75) Yeh na socho ki ALLĀH Dua foran qubool kyun nahi karta, Yeh shukr karo ki ALLĀH humare Gunaahon ki saza foran nahi deta.

(76) Insaan ke aansoo us waqt muqaddas hote hain jab wo kisi aur ki takleef mehsoos karke nikle.

(77) Tum achha karo aur zamaana bura samjhe yeh tumhare haq me behtar hai Bajaaye is ke tum bura karo aur zamaana tum ko achaa samjhe.

(78) Jab tum duniya ki Muflisi se tang aa jaao aur Rizq ka koi raasta na nikle to Sadqa diya karo aur ALLĀH se Tijaarat karo.

(79) Jab Hasad ki baarish shuru ho jaaye to Fasaad ke paudhe ugne lagte hain.

(80) Dunya tumhe us waqt tak nahi hara sakti jab tak tum khud se na haar jaao.

(81) Jab tumhe khushiya milne lage to 3 cheezo ko mat bhulna : ALLĀH ko, us ki makhlooq ko aur apni asliyat ko.

(82) Aye Ādam ki aulaad, Zaahir par na jaa. Aag dekhne me laal lagti hai magar us ka jalaaya hua kaala ho jaata hai. Isi tarah dunya ba-zaahir khubsoorat dikhti hai aur us ka jalaaya hua badsoorat ho jaata hai.

(83) Jo khuda ko na-raaz kake logo ki khushnudi haasil karna chaahe to ALLĀH use logo par hi chhod deta hai.

(84) Bado ki Izzat is liye karo ki un ki nekiya zyaada hai,
Aur bacho ko pyaar karo is liye ki un ke gunaah tum se kam hain.

(85) Apna sar ooncha rakho ke tum kisi se darte nahi,
Lekin apni nigaahe neeche rakho taake pata chale tum ek ba-izzat gharaane se ta’alluq rakhte ho.

(86) Zaalim ke liye Insaaf ka din is se zyada sakht hoga jitna Mazloom par zulm ka din.

(87) Insaan mayoos aur pareshaan is liye hota hai Kyun ki wo apne Rab ko raazi karne ke bajaye logon ko raazi karne me laga rehta hai.

(88) Nek logo ko sohbat se hamesha bhalaai hi milti hai, Kyun ki hawa jab phoolo se guzarti hai to wo bhi khushbudaar ho jaati hai.

(89) Agar insaan ko Takabbur ke baare me ALLĀH ki naraazgi aur saza ka ilm ho jaaye to banda sirf faqeero aur ghareebo se mile aur mitti par baitha kare.

(90) Jab ALLĀH kisi se na-raaz hota hai to use aisi cheez ki talab me laga deta hai jo us ki qaismat me nahi hoti.

(91) Insaan ka nuqsaan maal ya jaan chale jaane se nahi hota, balke insaan ka sab se bada nuqsaan kisi ki nazro me gir jaane se hota hai.

(92) Logo ko usi tarah muaf karo,  jaise tum khuda se ummeed rakhte ho ke wo tumhe muaf kare.

(93) Dunya me agar sukoon hota to ALLĀH ko kaun yaad karta. Sukoon to sirf un logo ke paas hai jo ALLĀH ki raza ko apni raza samajhte hain.

(94) Jo log sirf tumhe kaam ke waqt yaad karte hain to un ke kaam zaroor aao, Kyun ki wo andhero me roshni dhundhte hain aur wo roshni tum ho.

(95) Insaaniyat bahot bada khazaana hai use libaas me nahi Insaan me talaash karo.

(96) Jaahil ke saamne Aql ki baat mat karo. Pehle wo bahes karega phir apni haar dekhkar dushman ho jaayega.

(97) Dunya Ittefaaq se mil jaati hai aur Aakhirat sirf Haqdaar ko milti hai.
Tum Aakhirat ki fikr karo, Dunya khud-ba-khud zaleel hokar aa jaayegi.

(98) Koi Gunaah lazzat ke liye mat karna kyun ki Lazzat khatm ho jaayegi magar gunaah baaqi rahega.
Koi Neki takleef ki wajah se mat chhodna kyun ki Takleef khatm ho jaayegi magar neki baaqi rahegi.

(99) Jab Gunaah ke ba-wajood ALLĀH ki ne'amten musalsal tujhe milti rahe to hoshiyaar ho jaana ke tera hisaab qareeb aur sakht-tareen hai.

(100) Log tumhari Aql se tumhari Shakhsiyat ka wazan karte hain, Lihaaza tum apni Aql ka wazan Ilm se bharo.

(101) Khush akhlaaqi behtareen dost hai aur adab behtareen miraaṡ hai.

(102) Apni subah ka aaghaaz sadqe se karo, chaahe woh roti ka ek tukda ho ya muskuraata hua chehra.

(103) Insaan ko achhi Niyyat pe wo in'aam milta hai jo achhe amal pe bhi nahi milta kyun ke niyyat me dikhaawa nahi hota.

(104) Gunaaho par sharminda hona un ko mita deta hai aur Nekiyo par maghroor hona un ko barbaad kar deta hai.

(105) Insaan khud qaabil-e-aitbaar nahi hota,
balki us ka kirdaar aur uski sachai use qaabil-e-aitbaar banaati hai.

(107) Kanjoos kitna bad-naseeb hai ke dunya me ghareeb ki tarah zindagi guzaarta hai aur Qayaamat me ameer ki tarah hisaab bhi dega.

(106) Be-waqoof aurat apne Shohar ko apna Ghulaam banaati hai aur khud Ghulaam ki Biwi ban jaati hai. Aur aqlmand aurat apne Shohar ko Baadshaah banaati hai aur khud Baadshaah ki Malika ban jaati hai.

(107) Aql se sab kaam sahi tareeqe se kiye jaa sakte hain aur Jahaalat se har tarah ki buraai paida hoti hai.

(108) Lambi [badi] ummeedo se parhez kiya karo, kyun ki ye dusri ne'amto ko tumhari nazar me haqeer bana deti hain aur tum un ka shukr ada nahi karte.

(109) Kaamyaabi ke liye Hoshiyaari honi chaahiye aur Hoshiyaari Tajrubon se milti hai.

(110) Kisi ki be-basi par mat hanso, ye waqt tum pe bhi aa sakta hai.

(111) Jis ko tum se sachi mohabbat hogi wo tumhe bekaar aur na-jaa'iz kaamo se rokega.

(112) Lambi Dosti ke liye 2 cheezon par amal karo : Apne Dost se Gusse me baat mat karo aur apne Dost ki Gusse me kahi hui baat dil pe mat lo.

(113) Apno ko hamesha apne hone ka ehsaas dilaate raho warna waqt aap ke apno ko aap ke bina jeena sikha dega.

(114) Logo par ehsaan karne se izzat badhti hai, Narmi karne se apne maqsad me kamyaabi milti hai, aur Tawaazo (aajizi) karne se bulandi milti hai.

(115) Aql-mand ki salaah salaamati or najat dilaati hai aur Jaahil o be-waqoof ki salaah museebat o nuqsaan me daalti hai.

(116) Be-waqoof bolne ke baad sochta hai, jab ke Aql-mand pehle sochta hai phir bolta hai.
 
(117) Jab ALLĀH kisi bande se mohabbat karta hai to us bande ko ye taufiq deta hai ke woh zamane ke waaqiyaat o haalaat dekh kar ibrat haasil kare.

(118) Adab behtareen kamaalaat me se hai aur khairaat karna behtareen ibaadato me se hai.

(119) Khush akhlaaqi behtareen dost hai aur adab behtareen miraaṡ hai.

(120) Shukr ada karne se ne'amato me izaafa hota hai.

(121) Insaan kaisa be-waqoof hai jo Mustaqbil ke baare me soch kar apna Haal zaaya karta hai, Phir Mustaqbil me apna Maazi yaad karke rota hai.

(122) Sharaafat aql o adab se hai na ke maal aur nasab se.

(123) Ehsaan ki khoobi use zaahir na karne me hai.

(124) Awwal umr me waqt barbaad kiya hai to aakhir umr me us ka ilaaj kar ke tera anjaam achchha ho.

(125) Jab ALLĀH kisi bande se mohabbat karta hai to us bande ko taufiq deta hai ke wo zamaane ke waaqiyaat o haalaat dekh kar ibrat haasil kare.

(126)  Jo banda dusron se khush rehta hai wo hamesha aaraam me rehta hai.

(127)  Jo aadami apni takleefo ko dusro par zaahir karta hai wo apni be-izzati aur ruswaai ka khud zimmedaar hai.

(128)  3 gharo me ALLĀH ka qaher kabhi bhi naazil ho sakta hai.
[1] Jis ghar me Aurat ki aawaaz mard ki aawaaz se upar ho jaaye.
[2] Jis ghar me kisi ke haq ka maara ua paisa jama hua ho aur usi paise se ghar ko roshan aur aarasta kiya gaya ho.
[3] Jis ghar me logo ko mehmaano ka aana pasand na ho.

(129) Beshak sab se zyada ṡawaab milne waali nek Ehsaan aur tamaam kaamo me nek anjaam waala kaam Sabr hai.

(130) Agar kabhi be-wajah khushi mehsoos ho to jaan lena ke ye tumhare liye kisi ki dua ka aṡar hai.

(131) Us khuda se darte raho jis ki sifaat ye hai ki
Agar tum baat karo to sunta hai, Agar tum dil me rakho to jaanta hai.

(132) Jis tarah sone ko aag me daalkar parkha jaata hai isi tarah mo’min ko aazmaa'ish (trials) me daalkar parkha jaata hai.

(133) Dushman se intiqaam ka sab se achaa tareeqa yeh hai ke insaan apni khubiyo me izaafa kare.

(134) Jis zabaan se Jhut nikalna band ho jaaye us ki har Dua qubool hona shuru ho jaaye.

***************
Ek baar kisi ne Hazrat Ali se puchha ke “Insaan bura kab banta hai?” Aap ne farmaaya “Jab woh apne aap ko dusro se achha samajhne lage.”

*****************
Ek martaba kisi ne Hazrat Ali se arz ki ‘Huzoor! Maine mannat maani thi ke kaam pura hone par kutte ke saath khaana khaaunga. Ab ise kis tarah pura karun?”
Aap ne farmaaya “Aisi mannat na maana karo. Jaao, kisi be-namaazi ke saath khaana khaa lo, tumhari mannat puri ho jaayegi.”

***************
Ek martaba ek shakhs ne puchha “Hum apne dushman ko kaise pehchaane?”
Aap ne irshaad farmaaya “Jis insaan se tumhe na dunya ka faa'ida mile na aakhirat ka, aur jo tumhara waqt zaaya kare woh tumhara sab se bada dushman hai.”
Phir farmaaya “Jab tum kisi ko pehchaanna chaaho to ek martaba Soorah al-Lahab padho. Phir us ki baat suno. Agar woh sirf apne matlab aur faa'ide ki baat kare to woh tumhara dushman hai.”

***************
Aap ne kuchh nazamen bhi likhi hain,
Jin me ye nazm mash'hoor hai :
‘Radeena qismatal jabaari feena
 Lana ilmuw wa lil juhhaali maalu;

Li annal maala yufni anqareebeen
Wa innal ilma yabqaa laa yazaalu.’

***************
Aap se 586 Ahaadeeṡ marwi hai.

Aap riwaayat farmaate hain :
Huzoor Rasool-Allāh sallallāhu alaihi wa sallam ne irshaad farmaaya,
“Jis ne kisi Yateem ki kifaalat ki, uske upar tawajjoh ki, us par maal kharch kiya, hatta ke use mustaghni kar diya (ya’ani mohtaaji se nikaal kar ek ba-izzat kamaane waala insaan bana diya), us shakhs par ALLĀH jannat is tarah Waajib kar deta hai jis tarah yateem ka maal khaane waale par dozakh waajib kar deta hai.
Jab koi shakhs ALLĀH ko raazi karne ke liye kisi yateem bachche ya bachchi ke sar par haath pherta hai, to jitne baal par us ka haath guzarta hai, us ke har baal ke badle me us ke liye nekiya likhi jaati hain.”
(Musnade Ahmad Hadeeṡ -22284)

***************
Karaamat :
‾‾‾‾‾‾‾‾‾‾‾‾‾‾
(1) Ek martaba Kuffaar ke paas ek faqeer maangne ke liye aaya. Abu Jahl ne Hazrat Ali ki jaanib use bhej diya. Us faqeer ne Hazrat Ali ke paas jaakar daste sawaal daraaz kiya aur kehne laga “Ali! Tum salaamat raho, tumhara khaandaan salaamat rahe, tumhari sakhaawat salaamat rahe” Aap ne 10 baar Durod shareef padhkar us ki hatheli par dam kar diya aur farmaaya “Mutthi band kar lo aur jin logo ne bheja hai un ke saamne jaakar khol do.” Jab saa'il ne kuffaar ke saamne jaakar mutthi kholi to sab ko yeh dekhkar ta’ajjub hua ki us me ek deenaar tha.
Yeh karaamat dekhkar kai kaafir musalman ho gaye.
(Raahat-al-Quloob, Safa -142)

(2) Ek baar ek shakhs ne Hazrat Ali radiy-Allāhu ta’ala anhu se arz “Huzoor! Main safar ke liye jaana chaahta hu magar raaste me jangli darindon ka khauf hai.”
Aap ne use ek angoothi dekar farmaaya “Jab tere nazdeek koi khaufnaak jaanwar aaye to foran ye angoothi dikhakar keh dena ki yeh Ali ibne Abi Taalib ki angoothi hai.”
Un shaksh ne angoothi lekar safar shuru kiya. Ittefaaq se raah me ek jangli darinda us par hamla karne dauda.
Us ne foran angoothi dikhaakar kaha “Aye Darinde!  Yeh dekh mere paas Ali ibne Abi Taalib ki angoothi hai.”
Darinde ne jab Hazrat Ali ki angoothi dekhi to apna sar aasmaan ki taraf uthaaya Aur phir waha se daudta hua door chala gaya.

(3) Ek martaba Dariya e Furaat me sailaab aaya. Logo ne Aap ki baargaah me haazir hokar arz kiya ke ‘Hamare khet dube jaa rahe hain aur makaanaat gir rahe hain.’
Aap ghar me aaye, Huzoor Nabi e kareem sallallāhu alaihi wa sallam ka Amaama shareef sar par baandha. Jhubba shareef pehna, chaadar shareef doshe mubarak par daali aur ghode par sawaar hokar Dariya e Furaat ke kinaare tashreef laaye. Kaseer majma Aap ke saath tha. Aap ne Furaat ke kinaare par 2 rak'at ada ki. Phir pul par tashreef laakar apne Asaa mubarak se ishaara farmaaya. Paani ek gaz pichhe hat gaya. Aap ne logo se puchha “Bas.” Logo ne arz kiya “Huzoor! Abhi aur kam hona chaahiye.” Aap ne dobaara ishaara farmaaya. Paani mazeed ek gaz pichhe hata. Logo ne pukar kar kaha “Huzoor! Itna kaafi hai.” Phir Aap ne apna Asaa mubarak hata liya. Us Waqt se Furaat usi had par qaa'im hai.
(Shawaahid-un-Nabawi, Safa – 214)

***************
Aap kaṡrat se khairaat karte rehte the ke Aap ko Zakaat dene ki zaroorat nahi padti thi.

***************
Ek martaba Aap ke paas 4 dirham the. Aap ne unhe ek ek karke khairaat kar diya – ek raat me, ek din me, ek ko posheeda aur ek ko zaahir.
Is par ALLĀH ta’ala ne Aayat naazil farmai :
“Jo log shab o roz apne maal posheeda aur zaahir (khairaat me) kharch karte hain to un ke liye un ke Rab ke paas un ka ajr hai aur (roze mehshar) un par koi khauf na hoga aur na wo ranjeeda honge.”
(2 Soorah al-Baqarah, Aayat 274)

*********************
Huzoor sallallāhu alaihi wa sallam ke wisaal ke baad tadfeen ke waqt Aap Hazrat Abbaas ibn Abdul Muttalib, Hazrat Fazl aur Hazrat Quṡam bin Abbaas ke saath Huzoor sallallāhu alaihi wa sallam ki qabr mubarak me utre the.

***************
Aap farmaate hain
“Beshak Huzoor sallallāhu  alaihi wa sallam Hayaat hain. Un ko rizq diya jaata hai aur un se har qism ki madad talab ki jaa sakti hai.”
(Mishkaat, Jild -1)

Aap riwaayat farmaate hain ke :
Jab Huzoor sallallāhu alaihi wa sallam ke ke wisaal ke baad dafn se faarigh hone ke 3 roz ke baad ek arabi qabre anwar par haazir hua.
Qabr e anwar ki khaak apne sar par daalne ke baad kehne laga “Ya Rasool-Allāh sallallāhu alaihi wa sallam, Jo kuchh aap ne farmaaya hum ne suna aur aap se hum ne Quraan ki yeh aayat bhi suni ke  : Jo log apni jaano par zulm kar baithe wo aap ke paas haazir ho.
Aye ALLĀH ke Rasool sallallāhu alaihi wa sallam! Main apni jaan par zulm kar baitha hu aur ab gunaaho ki muafi ke liye aap ke paas aaya hu.”

Arabi ne yeh kaha to Qabr e anwar se aawaaz aai “Jaao, ALLĀH ne tumhe bakhsh diya.”

(Hujjatullāh Alal Aalameen, Safa-777 )

***************
11 Hijri (632 A.D.) me Sayyeda Faatima Zahra ke intiqaal ke baad Aap Siyaasi muamalaat se door rehne lage aur kisi jung me bhi shareek nahi hue. Aap kheti aur baaghbaani ka kaam karne lage. Aap ne bahot saare kuen banwaye. Jis me Masjid e Zul-Hulaifa ke qareeb ‘Abyaar e Ali’ mash'hoor hai.

Hazrate Umar Faarooq radiy-Allāhu ta’ala anhu ke zamaane me Aap un ke musheer rahe. Ameer-ul -mo’mineen Hazrate Umar Faarooq mazhabi aur siyaashi masaa'il me aap ka mashwara lete the.

***************
Aap Zil Hijjah 35 Hijri (656 A.D.) me Hazrate Uṡmaan Ghani radiy-Allāhu ta’ala anhu ki shahaadat ke baad Khalifa aur Ameer-ul-mo’mineen bane.

***************
Ek baar Hazrat Ali radiy-Allāhu ta’ala anhu se kisi ne kaha ki “Aye Ameer-ul-mo’mineen! Aap neeche zameen pe kyun baithe hain?”
Aap ne jawaab diya “Neeche baithne waala kabhi girta nahi.”

***************
Aap ke zamaane me musalmano ke 2 giroh ke bich 3 baar jung hui. Jise ‘Fitna e Awwal’ kaha jaata hai.

***************
Abdullāh bin Saba ke mashware par Marwaan ibn Hakam aur us ke saathiyo ne Hazrate Uṡmaan Ghani ke qaatilo ke tamaam saathiyo ko foran saza dene ka mutaalba kiya. Aap ne farmaaya ke “Is muamale me jald baazi karna munaasib nahi hai.” Magar wo lagaataar yehi mutaalba karte rahe. Aap ne is muamale ko guft o suneed aur mashwara karke suljhaane ki guzaarish ki.

Phir Iraq ke haalaat theek na hone ki wajah se 36 Hijri (657 A.D.) me Hazrat Sahl ibn Hunayf al-Awsi ko Madeena me apna naa'ib (governor) banakar Aap Basra tashreef le gaye. Kuchh waqt baad  unke badle Hazrat Tamaam bin Abbaas ko governor banaaya gaya.
Marwaan ibn Hakam aur us ke saathiyo ne Basra ko gher liya.
Hazrat Talha bin Ubaidullāh, Hazrat Zubair bin Awwaam aur Hazrate Aa'isha Siddeeqa radiy-Allāhu ta’ala anhuma Hazrat Ali radiy-Allāhu ta’ala anhu se guftagu karne ke liye Basra ki jaanib rawaana hue taake jung ko roka jaaye.
Jab ye hazraat Basra pahunche to Abdullāh bin Saba ke saathi Hakeem bin Hublah ne apne saathiyo ke saath un par hamla kiya taake yeh galat fehmi ho ke Hazrat Ali ne hamla karwaaya hai.
Jab Hazrat Ali ne un se guftagu karke saari galat fehmiya door ki to in hazraat ne jung me shareek na hone ka faisla kiya.

Hazrat Ali radiy-Allāhu ta’ala anhu ne Hazrat Qa’aqa’a ibn Amr al-Tameemi radiy-Allāhu ta’ala anhuma ko apna safeer banakar bheja aur guftagu se mas'ale ko hal karne ki koshish ki. Lekin Marwaan bin Hakam na maana.
109 din baad bhi Marwaan ne Basra par ghera jaari rakha. Hazrat Ali ke saathiyo me se Qurra ke giroh ne Marwaan ke saathiyo par hamla kiya. Is tarah 10 Jamaadi-ul-awwal 36 Hijri (7 November 656 A.D.) ko dono lashkar ke bich jung hui. Jise ‘Jung e Jamaal’ kaha jaata hai. 
Qaazi Ka’ab bin Sur apne saath Qur’an majeed lekar maidaane jung ki taraf rawaana hue taake jung ko roka jaaye. Lekin Qurra ke giroh ne un par teer chalaaye. Shahaadat se pehle unho ne Hazrate Aa'isha Siddeeqa radiy-Allāhu ta’ala anha ko Qur’an majeed ke saath jung rokne ke liye aage jaane ki guzarish ki. Hazrate Aa'isha Siddeeqa radiy-Allāhu ta’ala anha apne sar par mus'haf shareef rakhkar apne oont par sawaar hokar maidaane jung ki taraf aage badhi to Qurra ke giroh ne un par bhi hamla kiya.
Is jung me Hazrat Ali ko fatah mili aur Marwaan ko qaid kiya gaya. Baad me Hazrate Hasan aur Husain ki sifaarish se use riha kiya gaya. Jung me 10,000 logo ki jaan gai. 3 din baad Hazrat Ali ne tamaam ka taj'heez aur tadfeen kiya.

Is ke baad Rajab 36 Hijri (January 657) me Aap ne Daar-ul-hukoomat (capital) Kufa me tabdeel kiya. Aur Hazrat Abdullāh ibn Abbaas ko Basra ka governor muqarrar kiya.

Marwaan ibn Hakam aur un ke saathiyo ne Shaam waalo ko Hazrat Ali ke khilaaf karna shuru kiya. Aap ne Basheer bin Amr bin Mahz Ansaari, Saeed bin Qais Hamadani aur Shiṡ bin Rabiee Tameemi ko Muawiyah ke paas suleh ke liye bheja. Magar Marwaan na maana. Aur 1,20,000 ke lashkar ke saath Nehare Furaat (Euphrates) ke maidaan me aaya. Zil Hijjah 36 Hijri (May 657 A.D.) ko Hazrat Ali bhi apne 80,000 ke lashkar ke saath waha pahunche. 110 din baad koi hal na mila to 8 Safar 37 Hijri (26 July 657 A.D.) ko dono lashkar ke bich jung hui, jo ‘Jung e Siffin’ ke naam se mash'hoor hai. Jis me Hazrat Ali ke lashkar ke 25000 log shaheed hue aur Banu Umayya ke lashkar ke 45000 log maare gaye.
Aakhir me phir se yeh tay hua ki is muamale ko guft o suneed aur mashwara karke suljhaaya jaaye. Aur 12 Safar 37 Hijri (30 July 657 A.D.) ko Hazrat Ali apne saathiyo ke saath Kufa waapas aaye.

Is ke baad Aap ne pehle Hazrat Abdullāh ibn Abbaas aur Maalik al-Ashtar ko apna safeer banakar bheja. Magar jab Banu Umayya ke logo ne aitraaz kiya to Abu Moosā Ash'ari ko bheja aur Banu Umayya ki taraf se Amr ibn Aas ko bheja gaya.
Sh’abaan 37 Hijri (February 658 A.D.) me Azruh me mulaaqaat ke duaraan us ne jab yeh kaha ki “Kisi teesre shakhs ko hi Khalifa banaaya jaaye.” to Hazarte Ali ke saathiyo ne aitraaz kiya.

Us ke baad taqreeban 12,000 logo ka giroh ye kehne laga ki “Hazrat Ali ne jung ko bich me rokkar galat kiya hai aur Abu Moosā Ash'ari ko bhejne ka faisla bhi galat tha.”
Us waqt Hazrat Ali Nukhailah me the aur Marwaan lashkar ke saath jung ke liye Shaam ki taraf kooch kar raha tha. Is dauraan Aap ko khabar mili ki Khaarjiyo ne Nahrawan ke governor Abdullāh ibn Khabbaab ibn al-Aratt ko qatl kar diya hai aur us ki biwi ko maarkar us ke pet ko chirkar bache ko bhi maar daala aur Banu Taai ki 3 aurto ko aur Umme Sinan as-Saidawiyah ko bhi qatl kar diya hai. Aap ne Haariṡ ibn Murrah al-Abdi ko tehqeeqaat ke liye Nahrawan bheja. Khaarjiyo ne unhe bhi qatl kar diya.
Is ke baad Hazrat Ali ne faisla kiya ki agar in baaghiyo ka muqaabala karke sabaq nahi sikhaaya jaayega to shaayad ye Kufa par hamla kar den. Is liye Aap apne lashkar ke saath Nehre Dajla (Tigris) paar karke Nahrawan pahunche.
Aap ne Hazrat Abu Ayyoob al-Ansaari ko khaarjiyo ke paas bheja. Hazrat Abu Ayyoob al-Ansaari radiy-Allāhu ta’ala anhu ne kaha “Jo Hazrat Ali ke saath aana chaahe woh aa sakta hai aur jo Kufa ya Madain jaana chaahta hai woh jaa sakta hai.’
Is ke baad Farwah ibn Nawfal al-Ashja'i apne 500 saathiyo ke saath waha se chale gaye.
Magar 1800 khaarjiyo ke giroh ne Abdullāh ibn Wahab ki sardaari me jung karne ka faisla kiya. Un me se bahot saare khaarji Hazrate Uṡmaan Ghani aur Hazrate Zubair ibn Awwaam radiy-Allāhu ta’ala anhuma ke qatl ki saazish me shaamil the.
9 Safar 38 Hijri (658 A.D.) ko jung hui. Jis me Hazrat Ali ke lashkar me se 8 musalman shaheed hue aur Khaarjiyo me se taqreeban tamaam halaaq ho gaye aur jo 9 log bache wo Basra ki taraf bhaag gaye.

Is ke baad apne saathiyo ke saath Shaam ki taraf jaane se pehle Aap ne Nukhailah me wuqoof kiya. Dusre din in musalsal jung ke haalaat se thakkar koi jung ke liye aage jaane se tayyaar na hua. Aakhir me Hazrat Ali ne jung ke liye Shaam jaana multawi kar diya.

Is ke baad Hazrat Abu Ayyoob Ansaari radiy-Allāhu ta’ala anhu ko Madeena ka governor banaaya gaya. Lekin 40 Hijri (660 A.D.) me Busr bin Abi Arafaat ki sardaari me 3000 logo ke Umayya lashkar ne Madeena par hamla kiya aur Hazrat Abu Ayyoob Ansaari ko Madeena chhodkar Hazrat Ali ke paas jaana pada.

***************
Ek baar ek aurat paani se bhara hua mashkija uthaakar jaa rahi thi. Bahot kamzor hone ki wajah se use bhaari mashkija lekar chalne me bahot pareshaani ho rahi thi. Hazrate Ali ne use rok kar woh mashkija khud utha liya aur us ke saath jaakar us ke ghar par pahuncha diya. Raaste me us ki baato se Aap ko pata chala ke us ka shohar khaarji tha aur Hazarte Ali ke khilaaf jung me maara gaya tha aur uske bahot saare bache the aur woh dusro ke kaam karke guzaara karti thi.
Dusre din Aap khaane ki bahot saari cheezen lekar us ke ghar ki taraf gaye. Raaste me kai logo ne us thele ko uthaane ke liye kaha to Aap ne farmaaya ke “Dunya me tum mera bojh utha loge magar qayaamat me sab ko khud hi apna bojh uthaana hoga.”
Jab Aap us aurat ke ghar par pahunche to wo bahot khush hokar kehne lagi “ALLĀH ta’ala tumhe hamesha aabaad rakhe.”
Phir aap ne kaha “Main tumhare liye khaana pakaata hu ya agar tum khaana pakaao to itni der main tumhare bacho ka khayaal rakhta hu.”
Us aurat ne kaha “Main khaana pakaati hu. Aap sirf choola jala do.”
Aap lakadiyo se choola jalaane lage. Garmi ki wajah se Aap ke chehre par paseena aane laga. Itne me pados me se ek shakhs aaya. Jab us ne yeh dekha to kehne laga “Aye gustaakh aurat! Ameer-ul-mo’mineen ke saath aisi bad-sulooki karne ki tumhari himmat kaise hui?”
Yeh sunkar us aurat ko haqeeqat ka pata chala aur sharminda hokar Aap ke qadmo me gir gai.

***************
Pariwaar :
‾‾‾‾‾‾‾‾‾‾‾‾‾‾
Aap ki 8 biwiya aur 13 saahabzaade aur 2 saahabzaadiya hain.

 (1) Sayyeda Faatima Zahra binte Huzoor Mohammadur Rasool-Allāh (sallallāhu alaihi wa sallam) radiy-Allāhu ta’ala anha se 
3 bete - Imaam Hasan al-Mujtaba, Imaam Husain aur Mohsin radiy-Allāhu ta’ala anhuma
Aur 2 betiya - Zainab aur Umme Kulṡoom radiy-Allāhu ta’ala anhuma. 

♦ Aap ne Hazrate Sayyeda Faatima radiy-Allāhu ta’ala anha ki hayaat ke dauraan kisi dusri aurat se nikaah nahi kiya tha. Hazrate Faatima ke intiqaal ke baad hi Aap ne dusre nikaah kiye.

(2) Umaama binte Abul Aas bin Rabi se
1 beta – Muhammad al-Awsat.

(3) Umm-ul-Baneen, Faatima binte Hizaam al-Qilabiyya se
4 bete - Abbaas, Abdullāh, Ja’afar, Uṡmaan.

(4) Laila binte Mas'ood se
2 bete -Ubaidullāh, Abu Bakr.

(5) Khawla binte Ja’afar se 
1 beta - Muhammad ibnul Hanafiya.

(6) Sahba binte Rabiah se
1 beta – Umar al-Atraaf.

(7) Asma binte Umais ibn Ma’ad se
 2 bete - Yahyā, Muhammad al-Asghar.

(8) Umme Sa’ad bint Urwah.

♦ Hazrate Ali al-Murtaza radiy-Allāhu ta’ala anhu aur Sayyeda Faatima radiy-Allāhu ta’ala anha ki aulaad ya’ani Imaame Hasan aur Imaame Husain radiy-Allahu ta’ala anhuma ko ‘Aale Rasool’ ka martaba mila hai aur un ki aulaad ‘Saadaat’ kehlaate hain.

♦ Hazrat Ali ki dusri biwiyo ke saahabzaade me se Hazrat Abbaas, Mohammad ibnul Hanafiya, aur Umar al-Atraf rahmatullāhi alaihi ki nasl jaari hai.

***************
Abdul Rahmān ibne Muljim ko ek khaarji ladki se mohabbat ho gai. Us ne nikaah ke liye maher me Hazrat Ali ke sar ki shart rakhi. Us shaqi ne Hazrat Ali ko qatl karne li saazish ki.

19 Ramazaan 40 Hijri ki raat Huzoor Ramhate aalam sallallāhu alaihi wa sallam ko Hazrat Ali ke khwaab me tashreef laaye aur puchha “Aye Ali! Kya haal hai?” Aap ne farmaaya “Ya Rasool-Allāh sallallāhu alaihi wa sallam! Aap ki ummat mujhe bahot pareshaan kar rahi hai.” Huzoor sallallāhu alaihi wa sallam ne puchha “Kya chaahte ho?” Aap ne farmaaya “Mujhe in se behtar logo me utha lijiye aur in ko mujh se badtar hakim ke hawaale kar dijiye.”
Jab Aap ki aankh khuli to Fajr ki azaan ho rahi thi. Aap ne apne saahabzaade Hazrat Hasan al-Mujtaba ko jagaaya aur dono namaaz ke Kufa ki masjid ki taraf rawaana hue.
Jab masjid me pahunche to Abdul Rahmān ibne Muljim ne zehrili talwaar se aap ke sar par hamla kiya aur Aap ko shaheed kar diya.
Aap ne farmaaya “Main kaamyaab ho gaya.”

*****************
Aap ka wisaal 21 Ramazaan 40 Hijri (27 January 661 A.D.) ko 62 saal ki umr me hua.

Aap ki namaaz e janaaza Hazrat Imaam Hasan al-Mujtaba radiy-Allāhu ta’ala anhu ne padhai.

Aap ko pehle Kufa me dafn kiya gaya. Baad me Khaarjiyo ke zariye be-hurmati hone ke dar se Imaam Hasan al-Mujtaba ne raat ke waqt aap ke jisme aqdas ko nikaalkar mehfooz jagah dobaara dafn karne ka iraada kiya. Wo aap ke jism mubarak ko ek sandooq me rakha aur us sandooq ko oontni ke upar rakhkar safar shuru kiya. Raaste me oontni thoda aage nikal gai aur ek maqaam par thehar gai. Jab Imaam Hasan waha pahunche to unho ne Hazrat Ali ke jism mubarak ko wahi par dafn kiya.

Aap ka mazaar Najaf shareef (Iraq) me hai.

*****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Ali al-Murtaza radiy-Allāhu ta’ala anhu aur Ahle bait ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa'iz muraado ko puri farmae.
Aameen.
Tags:

Post a Comment

0 Comments

Niche Comment Box Me Aapki Raaye Likhe