Khwaja Garib Nawaz Sayyed Moeen-ud-deen Hasan Chishti

Story of Khwaja Garib Nawaz

Khwaja Garib Nawaz Sayyed Moeen-ud-deen Hasan Chishti

Alqaab :
‾‾‾‾‾‾‾‾‾‾‾
Khwaaja Ghareeb Nawaaz, Mehboob-e-Haq, Ata-e-Rasool, Naa'ib-e-Rasool-fil-Hind, Qutb-ul-Mashaa'ikh e Bahr o bar, Sultaan-ul-Hind, Hind-al-Wali, Khwaaja e Khwaajgaan, Aaftab e Chishtiya, Daleel-ul-Aarifeen.

********************
Aap ki wilaadat Sajistan (Iran) me 536 Hijri (1141 A.D.) me hui.

Aap ke waalid ka naam Hazrat Khwaja Sayyed Ghayaṡ-ud-deen bin Ahmad Hasan rahmatullāhi alaihi hai (Jo Husaini saadaat hain) aur waalida ka naam Hazrat Bibi Ummal wara Maahe Noor binte Hazrat Sayyed Daawūd rahmatullāhi alaihi hai (Jo Hasani saadaat hain).

Aap ki waalida maajida farmaati hain ke “Jab mere bete mere shikam me the tab mere pet se zikre ilāhi ki aawaaz sunai deti thi aur jab mere bete Moeen-ud-deen Hasan ki wilaadat hui to aisa Noor zaahir hua ke mera ghar hi nahi pura mohalla Roshan o munawwar ho gaya.”

*****************
Aap ki umr 2 saal ki thi tab Sajistan par Taataari ke baar baar hamle ki wajah se Aap ke waalidain Sajistan chhodkar Sanjar aa gaye.

8 saal ki umr me aap ke waalid ka inteqaal hua aur 16 saal ki aap ki waalida ka inteqaal hua.

********************
Aap aam bacho ki tarah kabhi khel kood me shareek nahi hue. Bachpan se hi aap Hum-dardi, Sakhaawat aur Husn e aklaaq ka muzaahira karte rahe.

Ek baar Eid ke din aap Eidgaah ki taraf  ja rahe the. Raaste me aap ne andhe bache ko phate puraane kapde me dekha. Aap ne apne paas jo ache kapde the wo use pehna diya aur khud ghar jaakar dusre kapde pehne aur us bache ko apne saath eidgaah lekar gaye.

  1. Hazrate Sayyeda Faatima Zahra RadiAllāhu ta’ala anha
  2. Hazrat Shaikh Sayyed Mohiy-ud-deen Abdul Qaadir Jilani
  3. Hazrat Shams-ud-deen Abul Fazl Sayyed Shaah Aale Ahmad Barkaati

Khwaja Garib Nawaz Taleem

Aap ne Khurasan me ta’aleem haasil ki.
9 saal ki umr me Aap Haafiz e Qur’an hue.

544 Hijri me Ek baar Aap apne phalo ke bagheeche me kaam kar rahe the,
 tab Hazrat Ibrāheem Qandoozi naam ke ek durwesh waha aae aur baithe. Aap ne un ko apne bageeche me se angoor ka guchha paish kiya aur Unho ne use khaaya aur mehmaan nawaazi se khush hokar apne thaile me kuchh nikala aur use chabakar Khwaja ko khaane ke liye diya. Aap ne khushi ke saath use khaya to un ke foyuz o barkaat se aap ke liye ilm o hikmat ke darwaaze khul gaye.
Aur Aap ne apna sab kuchh bech diya aur us raqam ko ghareebo aur mohtaajo ko khairaat kar diya aur phir Aap apni waalida ki ijaazat lekar Samarqand and Bukhara ki taraf majeed ta’aleem ke liye rawaana ho gaye.

544 se 550 Hijri tak Aap waha Hazrat Maulana Hisaam-ud-een Madani aur Hazrat Maulana Sharf-ud-deen Moosā rahmatullāhi alaihi se ta’aleem haasil karte rahe.
Aap ne Hadeeṡ aur Fiq'h ki ta’aleem haasil ki.

551 Hijri (1156 A.D.) me Aap ki mulaaqaat Huzoor Ghauṡ e aazam Abdul Qaadir Jilani radiy-Allāhu ta’ala anhu se hui.

Khwaja Garib Nawaz Sayyed Moeen-ud-deen Hasan Chishti


Aap ek peer e kaamil ki talaash kar rahe the ke Aap ne Khwaja Uṡmaan Haarooni rahmatullāhi alaihi ke baare me suna.
552 Hijri (1128 A.D.) me Aap Hazrat ki baargaah me gaye aur un ke mureed hue. Aur Ibaadat e ilāhi aur Khidmat e murshid karte rahe.
Aap ne 22 saal peer ki khidmat me guzaare.
Jab bhi mauqa milta Aap Peer o murshid ke naalain mubarak apne seene se lagakar rakhte. Puchhne par bataaya ke “Jab main naalain mubarak seene se lagaata hu to Huzoor Sarware Kaunain sallālahu alaihi wa sallam tashreef laakar faiz e khaas ata farmaate hain.”

Khwaja Uṡmaan Haarooni farmaate hain “Moeen-ud-deen Mehboob e khuda hai aur mujhe us ki Mureedi par naaz hai.”

************************
Aap Peer o murshid ki sohbat me ta’aleem haasil karte rahe aur murshid ke har hukm ki taameel karte rahe aur farmaane murshid ke mutaabiq mujaahida karte rahe.

Ek martaba Khwaja Uṡmaan Haarooni ne Aap ko apna kurta diya aur farmaaya ke “Ise dhokar laao aur is ke dhovan ka paani aisi jagah par daalna jaha kisi makhlooq ka pair na pade.” Aap Peer ke kurte ko dhokar sukhaakar laaye aur Peer ko waapas diya to unho ne puchha ke “Is ke dhovan ka kya kiya?” Aap ne farmaaya “Huzoor! Mujhe aisi koi jagah nazar nahi aai jaha kisi makhlooq ka pair na pade. Is liye maine us paani ko pee liya.” Peer ne khush hokar dua farmai ke
“Tum ne rahmat e ilāhi ko paa liya hai aur us paani ki barkat se mera ilm tumhe haasil ho gaya hai.”

Ek martaba Aap ke Peer ne Aap ko paani laane ke liye kaha. Aap paani lekar gaye pahunche to peer ne kaha “Piyaala patak do.” Aap ne piyaala patak diya. Peer ne farmaaya “Are yeh kya kiya itna qeemati piyaala tod daala.” Aap ne farmaaya “Mujh se galti ho gai. Aap is ke liye jo chaahe saza den.”

Khwaja Uṡmaan Haarooni ne Aap ko apne qareeb bulaakar apni do ungliya aap ki dono aankho ke bich me rakhi aur phir farmaaya “Moeen-ud-deen! neeche dekho, kya dikhta hai?” Aap ne neeche dekhkar kaha “Main tehtuṡṡara tak dekh sakta hu.” Phir peer ne kaha ‘Ab upar dekho, Kya dikhta hai?’ Aap ne upar dekhkar kaha  “Main arshe aazam tak dekh sakta hu.”
Peer ne farmaaya “Moeen-ud-deen! Tum ban gaye.” Aap ne farmaaya “Huzoor! Agar ban bhi gaya hu to aap hi ka hu.”
Khwaja Uṡmaan Haarooni ne khush hokar Aap ko khilaafat ata farmai.

  1.  Hazrat Imaam Sayyed Muhammad al-Jazuli 
  2. Hazrat Ameere Muaviya  
  3. Hazrat Nizaam-ud-deen Auliya  

Ek baar Khwaja Uṡmaan Haarooni rahmatullāhi alaihi ke sab mureed jama hokar karaamat alag alag karaamat zaahir kar rahe the. Kisi ne sona, kisi ne chaandi, kisi ne hire jawaaharat, kisi ne deenaar o dirham pesh kiye. Khwaja Moin-ud-deen ne roti ke tukde pesh kiye. Sab mureed hansane lage.

Itne me darwaaze par ek saa'il ne aawaaz di ke “Main kai din se bhuka hu. Mujhe khaane ke liye kuchh de do.” Sab ne apni apni cheeze us ko dena chaaha. Magar us saa'il ne kaha ke “Main is sona -chaandi, heere jawaaharat, deenaar o dirham ka kya karun? Mujhe to khane ke liye kuchh do.”
Phir Khwaja ne apne roti ke tukde us ko de diye. Us ne use lekar bahot saari duaen di.
Khwaja Uṡmaan Haarooni ko pata chala to unho ne farmaaya ki “Moin-ud-deen Ghareeb nawaaz hai.

***************************
555 Hijri me Hazrat Shaikh Zia-ud-deen Abul Najeeb Abdul Qaahir Suharwardi rahmatullāhi alaihi  se mulaaqaat hui.

***************************
563 Hijri (1167 A.D.) me Khwaja Uṡmaan Haarooni ne Aap ko khirqa mubarak ata kiya aur apne saath hajj ko lekar gaye.

Ek baar Aap Makka shareef me Masjide Haram me ibaadat me mashgool the. Itne me ghaib se aawaaz aai “Aye Moeen-ud-deen! Hum ne ise qubool farmaaya.”

Is ke baad jab Madeena shareef pahunche aur Huzoor Sarwar e kaunain sallallāhu alaihi wa sallam ko Salaam pesh kiya “Assalatu wassalaamu alayka Ya Rahmatullil aalameen” to Roza mubarak me se jawaab aaya “Wa alaikum assalaam Ya Qutb-ul-Mashaa'ikh ul Bahr o Bar” [Aur tum par bhi salaamati ho, Aye zameen aur samundar ke buzurgo ke Qutub].

***************************
581 Hijri (1185 A.D.) me Gail me Huzoor Ghauṡe aazam radiy-Allāhu ta’ala anhu se dobaara mulaaqaat hui aur Aap un ke saath 57 din tak rahe.

***************************
582 Hijri me Isfahaan me Khwaja Qutb-ud-deen Bakhtiar Kaaki ko mureed banaaya aur 585 Hijri me Samarqand me un ko khilaafat ata farmai.

************************
585 Hijri me Aap Khwaja Qutb-ud-deen Bakhtiar Kaaki rahmatullāhi alaihi  ke saath Haramain shareefain gaye.

Aap Makka shareef me Masjid e Haram me ibaadat me mashgool the. Itne me ghaib se aawaaz aai “Tera Rab tujh se raazi hai, jo chaaho maang lo.” Aap ne farmaaya “Aye mere Rab! Silsila e chishtiya se ta’alluq rakhne waalo ko bakhsh de.” Phir aawaaz aai ke “Maine tumhari dua qubool farmai hai aur Qayaamat tak ke silsila e chishtiya me ta’alluq rakhne waale ummat e Mohammadi ko bakhsh diya hai.”

Is ke baad Madeena shareef me the tab Huzoor Sarkare Madeena Huzoor sallallāhu alaihi wa sallam ne khwaab me tashreef  laakar farmaya ke “Aye Moeen-ud-deen! Tum deen ke madadgaar ho. Tum ab Hindustan jaao aur waha jaahiliyat ko door karke logo ko deene islaam ka sahi raasta dikhao.” Aur ek anaar ata farmaaya. Jab Khwaja ne us anaar ko dekha to us me Hindustan ka aur Ajmer ka naqsha dikhaai diya.

*************************
Phir Aap ne Hindustan ki jaanib safar shuru kiya.
Raaste me Sabzwar pahunche to waha ka Haakim Shaikh Mohammad Yaadgaar bahot zulmi tha. Aap ki nazre faiz se us ke dil aalam badal gaya. Us ne tauba ki aur Aap ke saath aane ka faisla kiya.
Is ke baad jab Ghazna pahunche to Sultaan-ul-Masha'ikh Sayyed Abdul Waahid rahmatullāhi alaihi  se mulaaqaat hui.
Phir Gurdez, Kabul (Afghanistan) pahunche to Hazrat Khwaja Sayyed Fakhr-ud-deen Gurdezi rahmatullāhi alaihi Aap ke saath safar me shaamil hue.
Jab Lahore pahunche to Aap ne Hazrat Sayyed Daata Ganj Bakhsh rahmatullāhi alaihi ke mazaar par Chilla-kashi ki.
Phir Aap ne Hazrat ki shaan me ek sher padha :
“Ganj-bakhsh Faiz-e-aalam Mazhar-e-Noor-e-Khuda,
Naaqisan Raa Peer-e-Kaamil, Kaamilan Raa Raahnuma.”

Lahore me qayaam ke dauraan Aap ki ta’aleem wa faiz se 2795 log Islaam me daakhil hue.

Phir Hazrat se ijaazat milne par safar ki tayyaari ki.
Aur Peshawar hote hue aage badhe. Amritsar se aage Sarhadi Chowki se Amn o aafiyat ke saath guzre.
Raaste me paani khatm ho gaya to Aap ke saathi fikrmand hue. Aap ne sab ko theharne ke liye farmaaya aur aasmaan ki taraf nigaah uthaai phir sar mubarak jhuka liya. Thodi der me kaali ghataaen chha gai aur musaladhaar Baarish shuru ho gai. qaafle ke logo ne sair ho kar paani piya aur mashkiza wagairah bhar liye aur aage rawaana hue.

Phir Ludhiyana ke qareeb qasbe me jaadoogar pujaari ko karaamat dikahjare musalman banaaya.
Phir Sirhnd hote hue Hansi aaye. Yaha Jaat lootero ne qaafile par hamla kiya to Aap ne qaafle ke ird gird Shahaadat ki ungli se ishaare se ek daayra bana diya. Lootere Jaato jab aage aaye to ne unhe Qaafle ke gird ek Roohaani Qil’a nazar aaya. Jise dekhkar wo waapas jaane lage magar lootero ke Sardaar ne un ko roka. Un Jaato ne palat kar dekha to pata chala ke Qaafla ek maidaan me thehra hua hai. Wo phir waapas aaye. Jaise hi qareeb aaye to unhe phir se wohi sangeen roohaani Qil’a nazar aaya. Is baar un par itni shiddat ka khauf taari hua ke bhaag gaye aur waapas na laute.

Aap Delhi pahunche.
Dehli me qayaam ke dauraan ek din ek Hindu Aap ke qatl ke iraade se apni bagal me khanjar chhupa kar aaya. Lekin Hamla karne ki himmat na ho saki.
Aap ne us se farmaaya “Jis iraade se aaye ho woh kaam karo, main haazir hu.” Yeh sunkar us ke badan par larza taari ho gaya. Bagal se khanjar nikaal kar phenk diya aur Aap ke Qadmo me gir kar muaafi maangne laga aur musharraf ba Islaam ho gaya.

Is waaqye ke baad kṡrat se log Islaam me daakhil hone lage. Kuchh Hinduo ne Delhi ke governor Khaanderaao se shikayat ki. Khaanderaao ne apne sipaahiyo ko hukm diya ke Aap ko Dehli se nikaal de. Magar sipaahi jab ek ke baad ek Aap ki baargaah me pahunche to musalman ho gaye.

Phir Aap Sonipat aur Naarnol hote hue Samaana (Patiala) aaye aur qayaam kiya.
Phir Ajmer ki taraf  rawaana hue.

Lahore se lekar Ajmer tak ke safar me sirf Khwaja Gharib nawaaz rahmatullāhi alaihi ki Nooraani surat aur Paakiza aamaal wa kirdaar ko dekh kar 1600 Khaandaan ne islaam qubool kiya.

********************
Aap ka qaafla jab Jaisur pahuncha to Jaadoogaro ka ek giroh mila. Unho ne  apne jaadoo ke zariye Aap par aur Aap ke saathiyo par aag barsaani shuru kar di. Aap ne us aag ki taraf muskura kar dekha to wo jaadooi aag phool ban kar barasne lagi. Phir un Jaadoogaro ne ek toofaani dhunva bheja. Aap ne us dhunve ko unhi jaadoogaro par palat diya. Sab jaadoogar chhinkte chhinkte behosh ho kar zameen par dher ho gae. Aap unhe usi haal me chhod kar aage badh gaye.

Jab Aap Rajputana (Rajasthan) ilaaqe ke Ajmer ke qareeb pahunche to Raaja Prithvi-Raaj ne apne fauji dasto ko yeh hukm de kar rawaana kiya ke koi bhi musalman faqeer apne saathiyo ke saath Ajmer me dakhil na hona chaahiye.
Jab Aap ne door se Prithvi Raaj ke fauji dasto ke ghodo ki taapo ki udti hui gard ko ko dekha to apne saathiyo ko raaste se ek taraf kar ke khade ho gae. Aap ne Apne saathiyo ke gird hisaar khinch diya.
Kuchh der me fauji daste Aap ke saamne se guzre magar wo Aap ko aur Aap ke saathiyo ko na dekh sake. Waapas jaa kar Prithvi Raaj ko bataaya ke “Bahot talaash kiya magar kisi musalman ka pata nahi hai.”

*****************
Is tarah Raaste me bahot saare soofi auliya se faiz haasil karte hue aur hazaaro logo ko apna faiz ata karte hue aur deen ki sahi raah dikhaate hue 587 hijri (1190 A.D.) me 52 saal ki umr me Aap apne saathyo ke saath Ajmer me tashreef laaye.

Ek baar Khwaja apne saathiyo ke saath ek darakht ke neeche baithe the. Itne me Raaja ke sipaahiyo ne aakar kaha ke “Tum sab yaha se khade ho jaao. Yeh raaja ke oonto ke bethne ki jagah hai.” Aap ne kaha ke “Ye oont dusri koi jagah par bhi baith sakte hain.” To unho ne kaha ke “Nahi, Ye oont roz yahi par baithte hain.” To Aap waha se khade ho gaye aur farmaaya ke “Theek hai. Ab ye oont yahi par baithenge.” Aur Aap door chale gaye.
Phir kuchh waqt ke baad sipaahiyo ne oonto ko khade karne ki koshish ki to wo waha se khade na hue. Bahot koshish karne ke baad nakaam hokar wo sab Raaja ke darbaar me haazir he aur saari baaten bayaan ki to us ne kaha ke “Tum us faqeer ke paas jaao.”
Wo sipaahi khwaja ko dhundhte hue waha pahunche aur maafi maangi. Khwaja ne farmaaya ke “Jaao, tumhare oont khade ho gaye hain.” Unho ne waha jaakar dekha to wo oont khade ho gaye the.

************************
Ek martaba Prithvi-Raaj ke sipaahiyo ne ek mast Haathi ko Aap ki jaanib daudaaya. Lekin jaise hi woh Haathi Aap ke qareeb pahuncha to Aap ne zameen se thodi mitti uthakar us Haathi par pheki. ALLĀH ki qudrat se woh haathi patthar ka ho gaya.

  1.  Auraton Ke Masail
  2. Namaz Ke Masail 
  3. Ruhani Amal 

Ajmer me ek aisa but khaana bhi tha jaha Prithvi-Raaj aur uske mashaabiheen Pooja karne ke liye aate the aur us me roghan gul jalaane ke liye Raaja ne kai gaanv de rakhe the.
Aap ne jab waha qayaam farmaaya to un Kaafiro ko yeh baat pasand na aai. Ek din wo aapas me mashwara karke unho ne hathiyaro ke saath Aap par hamla kiya.  Us waqt Aap Namaaz me mashgool the.
Jab Aap namaaz se faarigh hue to shaagirdo ne ittela’a di to Aap uthe aur muththi bhar mitti lekar us par Aayatul Kursi padh kar dam kiya aur kaafiro ki jaanib phenk di. Woh Mitti jis shakhs par bhi padi us ka jism khushk ho gaya. Yeh dekh kar saare kaafir waha se bhaag gaye aur but-khaane me jaa kar sab se bade Pujaari Shaadi Dev ko saara maajra bataaya.
Shaadi Dev apne saathiyo ke saath Aap par jaadoo karne ke liye aaya. Unhe aata hua dekhkar Aap ke shaagird kuchh pareshaan hue. Aap ne unhe tasalli di aur namaaz me mashgool ho gaye. Jab Shaadi Dev aur us ke saathi qareeb pahonche to Aap ki shaan aur jalaal ko dekh kar sab ki zabaane band ho gai aur haal yeh hua ke sab ke paanv chalne se maazoor ho gaye. Jis jagah khade the waha se aage nahi jaa sake. Jab Aap namaaz se faarigh hue to Aap ne Shaadi Dev aur us ke saathiyo ke jaanib rukh kiya. Jaise hi Shaadi Dev ki nazar Aap ke chehra e anwar par padi be-khud ho kar Aap ke qadmo me sar jhuka diya aur usi waqt Musharraf ba-Islaam hua. Us ke saathi khaufzada ho kar bhaag gaye. Aap ne apne mubarak haatho se paani ka ek piyaala bhara aur Shaadi Dev ko peene ke liye diya. Paani peekar Shaadi Dev ka seena Uloom o ma’arifat ka ganjina ban gaya.

*************
Phir Prithvi-Raaj ne Ajaypaal naami ek mash'hoor jaadoogar ko bulakar use saare haalaat bataae. Woh apne 1500 chelo ke saath rawaana hua.
Woh hiran ki khaal ko hawa me bichha kar us pa sawaar tha aur us ke saathi oonto aur ghodo par sawaar ho kar zabardast shor o gul karte hue Aap ke qareeb aaye. Unhe dekhkar Aap ne uth kar wuzu kiya aur apne sathiyo ke gird ek daa'ira khinch diya aur apne saathiyo se farmaaya ke “Koi bhi is daaire se baahar na jaaye.”
Jab Jaadoogar qareeb aaye to Aap ne un se farmaaya ke “Tum log kya chaahte ho?”
Jaadugaro ne kaha ke “Hum chaahte hain ke Aap log Ana Saagar ke paani ko istemal na karen ke is se paani kharaab ho jaata hai aur behtar to yehi hai ke Aap log yaha se chale jaayen.”
Yeh sunkar Aap ne Shaadi Dev ko apna Lota dekar farmaaya “Yeh lota lekar jaao aur Ana Saagar se is me paani bharkar laao.
Shaadi Dev ne jaise hi lote me paani bhara, Qudrate Ilāhi ke pure Ana Saagar ka saara paani lote me simat aaya. Sirf Anaa Saagar hi nahi balke Ajmer ke har kunve aur taalaab wagairah khushk ho gaye.
Shaadi Dev ne woh lota Khwaja ki baargaah me pesh kiya to Aap ne Ajaypaal se farmaaya “Taaqat ha to is lote ko uthaao aur Ana Saagar me waapas daal do.” Ajaypaal ne puri taaqat laga di magar lota hila na saka.
Phir Aap ne apne Khaadim ko hukm farmaaya to us ne Lota utha kar Ana Saagar me daal diya. Foran pura Ana Saagar pehle ki tarah bhar gaya aur Ajmer ke har kunve aur taalaab me paani aa gaya.

Is ke baad Ajaypaal aur us ke saathiyo ne jaadoo ke zariye chaaro taraf se hazaaro saanp daudaaye. Lekin jab wo Saanp hamla karne ke liye daa'ire ke qareeb aate to daa'ire par apna sar rakh kar baith jaate. Aap ne apne saathiyo se farmaaya “Darne ki zaroorat nahi hai. In Saanpo ko utha kar pahaado ki taraf phenk do.”
Aap ke saathi un saanpo ko utha kar phenkne lage. Jis maqaam par wo saanp girte waha Chitraval ka ek pauda nikal aata aur thodi hi der me woh saayedaar Darakht ban jaata.
Apni is naakaami ko dekh kar Jaadoogaro ne Aag barsaani shuru kar di lekin daa'ire ke andar ek bhi angara na aa saka.

Phir Ajaypaal ne hiran ki khaal ko hawa me bichhaya aur us par sawaar ho kar aasmaan ki taraf udne laga aur logo ki nazro se ghayab ho gaya.

Aap ne apne Khadaau ko ishaara farmaaya to dono Khadaau hawa me ud kar Ajaypaal ke qareeb pahunchi aur us ke sar par maarne lagi aur maarte maarte use zameen par gira diya.
Zameen par aate hi Ajaypaal Khwaja ke qadmo me sar rakh kar muaafi ka talabgaar hua."
Aap ne piyaale me thoda sa paani lekar use pilaaya. Paani peete hi us ke dil ki dunya badal gai aur Kalima padhkar musalman ho gaya. Aap ne irshaad farmaaya ke “Jo maangna chaahte ho maang lo.”
Ajaypaal ne arz ki  “Huzoor! Mujhe Khuda tak pahuncha dijiye.”  Aap ne us par ek nazare tawajjoh daali to us ka seena Ma’arifate Ilāhi ka ganjina ban gaya.
Phir arz ki “Huzoor! Tamanna hai ke main Qayaamat tak zinda rahu.” Aap ne us ki Daraazi e umr ke liye dua farmai jo baargaahe Khudavandi me maqbool hui.
Aap ne us ka naam Abdullāh Bayabaani rakha aur bashaarat di ke “Tum qayaamat tak zinda rahoge lekin logo ki nazro se gaayab rahoge.”

************************
Aap ne Prithvi-Raaj Chauhan ko Islaam ki daawat di magar woh na maana. Phir Aap ki bashaarat aur dua se Sultaan Shahaab-ud-deen Muhammad Ghori ne 588 Hijri (1191 A.D.) me Prithvi-Raaj Chauhan ko Jung e Tarain me harakar Ajmer par fateh haasil ki.
Phir mukhtalif ilaaqo ko fateh karte hue Dehli pahunche. Delhi me Khwaja ka tazkeera sunkar Khwaja ki ziyarat ke liye Ajmer aaye. Khwaja ki baargaah me haazir hue to maghrib ki azaan ki aawaaz suni. Khwaja ki iqtida me namaaz padhne ke baad Khwaja ke nooraani chehre ki ziyarat ki to kehne lage ke “Yeh to wohi Buzurge mohtaram hain jinho ne mujhe khwaab me Hindustan fateh hone ki bashaarat di thi.”

589 Hijri (1192 A.D.) me Ajmer me Shahaab-ud-deen Ghori Aap ke mureed hue.

***********************
611 Hijri me Aap Delhi tashreef le gaye.

***********************
Aap rozaana ek Qur’an majeed mukammal kiya karte the.

************************
Karaamat Khwaja Garib Nawaz
‾‾‾‾‾‾‾‾‾‾‾‾‾‾
(1) Ek martaba ek budhi aurat Khwaja ki baargaah me aai aur rote hue bataaya ke “Us ke be-gunaah naujawaan bete ko phaansi de di gai hai.” Aur madad talab karne lagi. Sarkar Ghareeb nawaaz ne apna asaa mubarak haath me liya aur us budhiya ke saath chal pade. Jab phaansi dene ki jagah par pahunche to apne asaa se murde ki taraf ishaara karke farmaya ki “Agar tum be-gunaah ho to ALLĀH ke hukm se zinda ho jaao.” Foran woh murda ladka zinda ho gaya ur phaansi se utarkar neeche aaya. Aur woh ladka aur us ki maa Gharib nawaaz ke qadmo me gir pade. Aap ne dono ko tasalli di aur ghar ki jaanib rawaana kiya.

(2) Ek baar Aap Ana sagar ke paas se guzar rahe the ki aap ne ek aurat ki rone ki aawaaz suni. Puchhne par pata chala ke woh aurat bahot ghareeb thi aur us ki gaaye mar gai thi. Aap us ke saath us gaaye ke paas gaye aur dua ki to woh gaaye zinda ho gai. Yeh dekhkar woh aurat aap ke qadmo me gir gai.

(3) Ek baar Aap Ana sagar ke kinaare baithe the. Itne me ek charwaaha kuchh gaayen ke saath waha se guzra. Aap ne use doodh dene ke liye kaha. Us ne kaha “Yeh gaayen kam umr ki hain aur doodh nahi deti.” Aap ne un me ek gaaye ki taraf ishaara karke us ladke ko us gaaye ka doodh nikaalne ke liye farmaya. Jab us ladke ne us gaaen ko dekha to use ye dekhkar ta’ajjub hua ki wo gaaen ke pistaan doodh se bhar gaye the. Us ne doodh nikalkar Khwaja ko diya. Woh doodh itna tha ki 40 aadamiyo ke liye kaafi ho jaaye. Yeh dekhkar woh ladka Khwaja saahib ka mureed ban gaya.

(4) Ek baar Khwaja ki baargaah me ek shakhs haazir hua aur arz ki “Ajmer se kuchh faasle par mera ek baagh hai. Jis ke darakht bilkul sukh gaye hain.” Aap ne foran mitti ke ek lote me paani bharkar diya aur farmaaya ke “Is paani ko darakhto ki jado me daal do.” Baagh ke maalik ne wo paani laakar darakhto ki jado me daal diya. Us paani ki barkat se baagh ke tamaam darakht sar sabz wa shaadaab ho gaye aur phal dene lage.

(5) Ek martaba Ajmer me Aap apne mureed Shaikh Ali ke saath raaste se guzar rahe the. Itne me ek shakhs saamne aaya. Jis se Shaikh Ali ne qarz liya tha. Woh Shaikh Ali se apne qarz ki raqam waapas karne ke liye kehne laga. Khwaja ne us shakhs se farmaaya “Tum kuchh mohlat aur de do. Jald hi tumhari raqam tumhe mil jaayegi.” Magar wo nahi maana. Aap ne jalaal me aakar apni chaadar zameen par bichha di. Aur foran us chaadar ke upar sona aur chaandi ka dhair ban gaya. Aap ne us qarz khwaah se farmaaya “Is me se jitni tumhari raqam hoti hai utna le lo.” Jab woh shakhs ne us dhair me se maal lene ke liye haath aage badhaaya to us ke dil me laalach paida hua. Lekin jab woh apni raqam se ziyada maal lene laga to us ne dekha ke woh saara sona aur chaandi gaa'ib ho gaya aur us ka haath usi haal me reh gaya aur woh apne haath ko hila bhi nahi paaya. Woh foran Khwaja ke qadmo me gir gaya aur raham ki bhik maangne laga. Aap ne use maaf kiya aur us ka haath theek kar diya.

(6) Ek ameer khaatoon ko 7 ladkiya thi. Us ka shohar ladkiyo ki kasrat ki wajah se naraaz tha aur us ne dusri shaadi karne ka iraada kiya. Is dauraan woh aurat haamila hui. Woh Khwaja ki baargaah me haazir hui aur dua ke liye iltija ki. Sarkaar Khwaja Ghareeb nawaaz ne farmaaya “Jaa, Tera maqsad pura hoga.’
Kuchh mahine baad ALLĀH ke fazl se us ke batan se nihaayat hi khoobsurat ladka paida hua.

(7) Ek baar Aap ke Khalifa Khwaja Qutb-ud-deen Bakhtiar Kaaki rahmatullāhi alaihi Sultaan Shams-ud-deen Altamash aur us ke sipaahiyo ke saath Delhi me raaste se guzar rahe the. Itne me ek aurat saamne aai aur Khwaja Qutb-ud-deen Bakhtiar Kaaki par iljaam lagaaya ki “Mere pait me Khwaja Qutb-ud-deen Bakhtiar Kaaki ka bacha hai aur un se mera nikaah karaaya jaaye.” Sultaan aur waha maujood tamaam log hairaan ho gaye. Khwaja Qutb-ud-deen Bakhtiar Kaaki ne apne Peer se madad ke liye Ajmer ki jaanib dekha aur foran Khwaja Ghareeb nawaaz waha haazir ho gaye. Aap ko dekhkar Khwaja Qutb-ud-deen Bakhtiar Kaaki ki aankho me aansoo aa gaye.
Khwaja ne us aurat ki taraf dekhkar kaha “Aye bache! Teri maa Khwaja Qutub-ud-deen par ilzaam laga rahi hai. Tu hi pait me se bata ki yeh baat sach hai ya nahi?” Us aurat ke pait me se bache ne jawaab “Huzoor! Yeh aurat jhut bol rahi hai. Khwaja Qutb-ud-deen Bakhtiar Kaaki ke dushman is aurat ke zariye un ko zaleel karna chaahte the.”
Yeh sunkar us aurat ne apna gunaah qubool kar liya.
Phir Aap waha se gaayab ho gaye. Khwaja Qutb-ud-deen Bakhtiar Kaaki ke ilaawa kisi ko Aap ke tashreef laane ka aur foran rukhsat hone ka raaz samajh me nahi aaya.

(8) Ek baar Aap ke ek mureed ne Khwaja ki baargaah me haazir hokar arz kiya “Shaher ke governor ne kisi wajah se shaher chhodkar chale jaane ki saza di hai.” Aap ne farmaaya “Apne ghar waapas jaao. ALLĀH ta’ala ne us governor ko saza de di hai.”
Woh mureed jab apne ghar waapas pahuncha to pata chala ki wo governor ghode par se gir gaya aur mar gaya.

*****************
Aap har saal ayyaam e Hajj ke dauraan Ajmer me hi maujood rehte the. Magar Hajj ke liye jaane waale log us waqt Aap ko Makka shareef me aur Hajj ke maqaamaat par haazir dekhte.

*****************
Aap ki khaanqaah me Langar chalaaya jaata tha. Jis me roz hazaaro logo ko khaana khilaaya jaata tha. Magar Aap kabhi kisi se koi madad nahi lete the.

*****************
Aap 7wi sadi ke Mujaddid e Islaam hain.

Aap ne apne Faiz, Ta’aleemaat, Husn e akhlaaq aur Karaamat se Hinadustan me Islaam ki bunyaad mazboot ki aur bulandi aur waqaar ata farmaaya.

Aap ne 90 laakh logo ko Islaam me daakhil kiya.
Beshumaar logo ne hidaayat paai aur Aap ki baargaah me tauba karke sahi raah apnaai.

*****************
Tasannif Khwaja Garib Nawaz

Aap ki likhi hui mash'hoor kitaaben :
(1) Anees-ul-Arwaah
(2) Hadeeṡ-ul-Ma’arif
(3) Risaala Maujoodia
(5) Kanj-ul-Israar
(6) Kashf-ul-Israar
(7) Afaaq-o-Anfaas.

♦  Aap ki ta’aleemaat aur dars wa naseehat ko Khwaja Qutb-ud-deen Bakhtiar Kaaki ne jo ‘Daleel-ul-Aarifeen’  me jama kiye hain.

***********************
Aqwaal Khwaja Garib Nawaz

Aap irshaad farmaate hain :

(1) Haqeeqi aashiq ke dil me ishq ki aag is tarah jalti rehti hai ke jis me khwaahishat lakdiyo ki tarah jalkar khaak ban jaati hain.

(2) Kuchh achha karke kisi ka dil jitna ye bahot achhi baat hai magar apne nafs ko jitna ye us se bhi achhi baat hai.

(3) Asl Roza tamaam dunyaawi khwaahishat se parhez karna hai.

(4) Nek logo ki sohbat me rehna yeh neki karne se bhi afzal hai. Aur gunaahgaaro ki sohbat me rehna yeh gunaah karne se bhi badtar hai.

(5) Kisi ka dil na dukhaao, Ho sakta hai ki wo aansoo tumhari saza ban jaaye.
Dukhiyo ki madad karna aur un ki fariyaad sunna afzal Ibaadat hai.

(6) Jhuti Qasam khaane se ghar me se Barkat chali jaati hai.
Hamesha sach baat kaha karo.

(7) Apne dil ko Adaawat aur Nafrat ke jazbe se paak rakho.

(8) Beshak jab log kisi Khilaaf e Shariat baat ko dekhe aur us ko na roke to anqareeb ALLĀH un sab par apna azaab e aam bhej dega.

(9) Bad-bakhti ki alaamat yeh hai ke gunaah karta rahe aur gunaah ka ehsaas na ho.

(10) Aalim e deen ki Ziyarat aur Durwesho ki Dosti nuzool e Barkat ka sabab hoti hai.

***********************
Pariwaar Khwaja Garib Nawaz

Aap ki 2 biwiya hain aur 3 saahabzaade aur 1 saahabzaadi hain.

Bibi Ummatullāh (Nikaah 590 Hijri) se 2 bete aur 1 beti :
(1) Khwaja Fakhr-ud-deen Abul Khair rahmatullāhi alaihi (Sajjaada nasheen) (Sarwar)
(2) Khwaja Hisaam-ud-deen rahmatullāhi alaihi
(3) Bibi Hafeeza Jamaal rahmatullāhi alaihi (Jin ka nikaah Shaikh Razi-ud-deen bin Khwaja Soofi Hameed-ud-deen Nagori se hua).

Bibi Asmatullāh binte Sayyed Wajeeh-ud-deen Mash'hadi (Nikah 620 Hijri) se 1 beta :
Hazrat Khwaja Zia-ud-deen Abu Saeed rahmatullāhi alaihi (Ajmer).

************************
Aap Hazrat Khwaja Uṡmaan Haarooni rahmatullāhi alaihi ke mureed aur khalifa hain.

Aap se Hindustan me Chishti silsila jaari hai.
Aap ke bahot saare mureedo ne Hindustan me deen e Islaam ki isha’at ka kaam jaari rakha.

khulfa e Khwaja Garib Nawaz

(1) Hazrat Khwaja Sayyed Qutb-ud-deen Bakhtiar Kaaki rahmatullāhi alaihi (Delhi);
(2) Hazrat Khwaja Soofi Hameed-ud-deen Nagori rahmatullāhi alaihi (Delhi);
(3) Hazrat Khwaja Sayyed Fakhr-ud-deen Chishti rahmatullāhi alaihi (Sarwar, Rajasthan);
(4) Hazrat Khwaja Sayyed Taaj-ud-deen Dehlawi rahmatullāhi alaihi;
(5) Hazrat Shaikh Shams-ud-deen Faqari rahmatullāhi alaihi;
(6) Hazrat Abdullāh Bayabani rahmatullāhi alaihi;
(7) Hazrat Shaikh Zaahid Turk Dehlawi rahmatullāhi alaihi;
(8) Hazrat Imaam-ud-deen Damishqi rahmatullāhi alaihi;
(9) Hazrat Niyaaz Ahmad Khurasani rahmatullāhi alaihi;
(10) Hazrat Muhammad Yaadgaar Sabzwari rahmatullāhi alaihi;
(11) Hazrat Ghulaam Haadi Turk Ajmeri
(12) Hazrat Shaikh Ahmad Kabuli rahmatullāhi alaihi;
(13) Hazrat Qaadir Saeed rahmatullāhi alaihi;
(14) Hazrat Abul Farah Qureshi rahmatullāhi alaihi;
(15) Hazrat Abdullāh Asghar Dehlawi rahmatullāhi alaihi;
(16) Hazrat Ya’aqoob Khan Dehlawi rahmatullāhi alaihi;
(17) Hazrat Ahmad Khan Ghaazi rahmatullāhi alaihi;
(18) Hazrat Shaah Abdullāh Bangali rahmatullāhi alaihi;
(19) Hazrat Peer Kareem rahmatullāhi alaihi (Sri Lanka).

***************
In ke ilaawa Aap ke silsile (khalifa ke khalifa) me bahot saare Auliya Allāh mash'hoor hain .

**********************
Wisaal se pehle aap apne hujre me Tilaawat e Qur’an karte rahe.

Aap ka wisaal 6 Rajab 633 Hijri (16 March 1236 A.D.) ko Peer ke din 97 saal ki umr me hua.

Aap ki namaaz e janaaza Khwaza Fakhr-ud-deen Chishti rahmatullāhi alaihi ne padhai.

Aap ka mazaar Ajmer (Rajasthan) me hai.

***********************
Wisaal ke baad bhi Aap ka faiz o tasarruf aur karaamat jari hai.
Aap ke mazaar par haazir hone waalo aur Aap ke waseele se dua maangne waalo ki haajat ALLĀH ta’ala puri farmaata hai.

Jis me ye qissa bahot mash'hoor hai.
Ek baar Baadshaah Aurangzeb rahmatullāhi alaihi Khwaja Ghareeb nawaaz rahmatullāhi alaihi ke mazaar ki ziyarat ke liye Ajmer gaye.
Aap jab khwaja ke mazaar par pahunche to waha ek andha shakhs baithkar ilteja kar raha tha.
Aap ne puchha ke “Aye shakhs kya muamala hai?” Us shakhs ne kaha ke “Main bahot arse se Khwaja ke waseele se dua kar raha hu ke mujhe aankho ki roshni mil jaaye. Lekin koi faa'ida nahi hua.”
Aap ne us se kaha ke “Main mazaar me salaam karke aata hu, agar tujhe aankh ki roshni nahi mili to talwaar se teri gardan alag kar daalunga.”
Woh andha shakhs pareshaan ho gaya ke ab to aankh ke saath jaan par baat aa gai hai. Woh rote hueaur zor se Khwaja ke waseele se dua maangne laga aur isteghaaṡah karne laga.

Jab Aurangzeb ne Khwaja ko salaam kiya to us ka jawaab na mila, dobaara salaam kiya to jawaab na mila, phir jab teesri bar salaam kiya to aahista se jawaab mila “Wa alaikum assalaam Ya Aalamgeer Hujjati.”
Phir Khwaja ne mazaar me se farmaaya ke “Aye Aurangzeb! Aa'inda kabhi aisi zeed mat karna. Tumhari zeed ki wajah se us andhe shakhs ki aankho ki roshni laane ke liye main arsh e ilāhi par gaya tha. Aur is liye salaam ka jawaab dene me thodi der ho gai.”

************************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Khwaja Ghareeb nawaaz Moeen-ud-deen Hasan Chishti rahmtullāhi alaihi aur Ahle bait aur Auliya Allāh ke waseele se
Sab ko mukammal ishq e Rasool ata farmae aur sab ke Eiman ki hifaazat farmae aur sab ko nek amal karne ki taufiq ata farmae.
Aur sab ko dunya wa aakhirat me kaamyaabi ata farmae aur sab ki nek jaa'iz muraado ko puri farmae.
Aameen.

Post a Comment

0 Comments