Khitaab :
‾‾‾‾‾‾‾‾‾‾‾
Muhiy-ud-deen.
Alqaab :
‾‾‾‾‾‾‾‾‾‾
Mehboob-e-Subhāni, Sayyed-ul-Auliya, Imaam-ul-Asfiya, Peer e peeraan, Shaah e Miraan, Ghauṡ-ul-aazam, Ghauṡ-us-Ṡaqlain, Shaikh e la-ṡaani, Qutb-e-Rabbaani, Qindeel-e-Nooraani, Saahib e Roshan zameer, Dastgeer.
************
Aap ki wilaadat 1 Ramazaan 470 Hijri (18 March 1077 A.D.) ko Jeelaan (Iran) me hui.
Aap ke waalid ka naam Hazrat Sayyed Abu Saaleh Moosā Jangi-dost bin Hazrat Abdullāh Jeelaani rahmatullāhi alaihi aur waalida ka naam Sayyeda Ummul Khair Faatima binte Sayyed Abdullāh Sawmai az-Zaahid rahmatullāhi alaihi hai.
Aap ‘Najib-ut-Taraffain’ hain.
Aap ke waalid Hazrat Imaam Hasan al-Musanna ibne Hazrat Imaam Hasan al-Mujtaba ibne Hazrat Ali al-Murtaza radiy-Allāhu ta’ala anhu ki nasl se hain ya’ni Hasani saadaat hain.
Aap ki waalida Hazrat Imaam Zain-ul-Aabideen Ali al-Awsat ibne Hazrat Imaam Husain ibne Hazrat Ali al-Murtaza radiy-Allāhu tala anhu ki nasl hain ya’ni Husaini saadaat hain.
************
Aap apni waalida ke batan me rahe tab un ki umr 60 baras thi. Is umr me hamal rehna bahot mushkil hai.
Jab aap ki waalida chhink aane par ‘Alhamdulillāh’ kehti to aap waalida ke pait me se jawaab me ‘Yarahmak-Allāh’ kehte.
Aap ki wilaadat se pehle Huzoore akram sallallāhu alaihi wa sallam ne aap ke waalid ko khwaab me bashaarat di ke
‘Aye Abu Saaleh! Tumhare liye khushkhabari hai ke tumhare yaha mera beta aane waala hai, Tamaam auliya me us ka rutba aisa hai jaisa mera tamaam Ambiya me.’
Aap ki wilaadat ki raat Baghdad ke ilaaqe me 1100 ladke paida hue wo tamaam Auliya Allāh bane.
Ramazaan me paida hone par Aap paida’ish se sirf raat me hi apni waalida ka doodh pite the aur din me nahi pite the.
Us saal baadal hone ki wajah se Ramazaan ka chaand nahi dikhaai diya tha. Jab kuchh logo ne Aap ke ghar par aakar yeh baat batai to Aap ki waalida ne farmaaya ke
‘Mera bacha din me doodh nahi pee raha hai, sirf raat me hi doodh pita hai. Is liye Ramazaan ka chaand ho gaya hai.’
************
Aap ne ibtidai ta’aleem Jeelaan me Haasil ki.
Aap jab madrasa me gaye aur ustaad ne ‘Bismillāhir Rahmaanir Raheem’ padhne ke liye kaha to Aap ne ‘Bismillāh’ ke baad Qur’an ke 15 paare padh liye. Aap ki waalida ko 15 paare hifz the aur hamal ke dauraan jab wo tilaawat karti thi tab Aap ne 15 paare sikh liye.
Aap jab Madrasa me tashreef laate tab ghaib se aawaaz aati thi ‘Allāh ke wali ke liye jagah khaali karo.’
************
Aap ke waalid ke inteqaal ke kuch waqt baad Aap ne majeed ta’aleem ke liye apni waalida ki ijaazat maangi. Aap ki waalida ne Aap ko Hamadan jaa rahe ek qaafile ke saath Baghdad rawaana kiya aur Aap ke kameez ke andar 40 deenaar rakhkar upar se sil diye aur Aap ko har haal me se sach bolne ki aur Halaal khaane ki naseehat ki.
Aur farmaaya ke ‘Agar raaste me koi pareshaani ho to ye dua 101 baar padh lena. In shaa Allāh pareshaani door ho jaayegi – Allāh kaafi qasadatul kaafi wajadatul kaafi li kulli kaafi kafaafil kaafi wa ni’amal kaafi wa lillāhil hamd.’
Raaste me Hamadan ke qareeb dakaito ke giroh ne qaafile ko gherkar loot liya. Aur jab Aap se puchha ke ‘Tumhare paas kuchh maal hai?’
to aap ne farmaaya ke ‘Mere paas 40 deenaar hai jo kameez ke andar sile hue hain.’ Daakoo ke sardaar ne kaha ke ‘Aye bache! Agar tu hume sach nahi bataata to hume pata bhi chalta.’ Aap ne farmaaya ke ‘Meri maa ne mujhe har haal me sach bolne ke liye kaha hai. Is liye main jhut nahi bol sakta.’
Aap ki baat sunkar daakoo ke giroh ne foran tauba kar li.
************
489 Hijri (1095 A.D.) me aap Baghdad tashreef laaye aur Jaamia Nizaamia me ta’aleem haasil ki.
Hazrat Abu Saeed Mubarak al-Makhzumi aur Hazrat Abu Ali al-Mukharrami se aap ne Fiqh ki ta’aleem haasil ki.
Hazrat Abu Bakr ibn Muzaffar, Hazrat Muhammad ibn Husain Baqalai aur Hazrat Abu Saeed bin Abdul Kareem se aap ne Hadeeṡ ki ta’aleem haasil ki.
Hazrat Abu Muhammad Ja’afar se Aap ne Tafseer ki ta’aleem haasil ki.
Hazrat Abul Khair Hammad ibn Muslim al-Dabbas aap ne Tasawwuf ki ta’aleem haasil ki.
Aap ne Hazrat Abu Zakariya Yahyā Tabrizi se bhi ta’aleem haasil ki.
************
Ta’aleem mukammal karne ke baad Aap Baghdad chhodkar Sehra me chale gaye aur ibaadat wa riyaazat aur mujaahida me 25 saal guzaare.
509 Hijri (1116 A.D.) me Aap ne pehla Hajj ada farmaaya.
Phir jab Makka mukarrama se Madeena munawwara tahreef laaye to ba-adab arz kiya ‘Aye Naanajaan! Aaj tak to main aspni Rooh ko aap ki baargaah me Salaat o Salaam pesh karne ke liye bheja karta tha.
Aaj tak meri rooh Aap ke darbaar me haazir hoti thi aur me Salaat o Salaam pesh karti thi. Lekin Aye ALLĀH ke pyaare Rasool sallallāhu alaihi wa aalihi wa sallam! Aaj Aap ka nawaase Abdul Qaadir apne jism aur rooh ke saath haazir hai aur ye tamanna lekar ke aaya hai ke Aap ke mubarak haatho ka bosa le sake.’
Aap ka itna arz karna tha ke Huzoor Habeebe khuda Sarware kaunain sallallāhu alaihi wa sallam ke dono nooraani haath mubarak qabr shareef se baahar aaye.
Sarkaar Ghauṡe aazam ne musaafa kiya aur haatho ko bosa diya.
*****************
520 Hijri (1126 A.D.) me Aap ne Sunnat e Rasool ada karne ke liye nikaah kiya.
*****************
521 Hijri (1127 A.D.) me Hazrat Abu Saeed Mubarak Makhzumi ne apni jagah par Aap ko Sadr-ul-mudarris banaaya.
***************
Aap farmaate hain ki : Ek roz Zohar se kuchh pehle Maine jaagte me Huzoor sallallāhu alaihi wa sallam ki ziyarat ki.
Huzoor sallallāhu alaihi wa sallam ne farmaaya ‘Beta! Tum wa’az kyun nahi karte? Maine arz kiya ‘Huzoor! Main Baghdaad me bade-bade Fuqaha ke saamne bol nahi sakta.’
Huzoor sallallāhu alaihi wa sallam ne farmaaya ‘Apna munh kholo.’
Maine apna munh khola to Huzoor sallallāhu alaihi wa sallam ne mere munh me apna Luaab-e-dahan 7 martaba daala aur farmaaya ‘Ab bila khauf wa’az kehna shuru kar do.’
Chunaanche main namaaze Zohar ke baad wa’az ke liye baitha to log khud ba khud mera wa’az sunne ke liye baith gaye aur aahista aahista bahot log jama ho gaye.
Phir dekha ke Hazrat Maula Ali radiy-Allāhu ta’ala anhu mere saamne tashreef farma hain aur mujh se farmaane lage ‘Beta! Ab wa’az kyun nahi kehte?’ Maine arz kiya ‘Huzoor! Itne bade majme me bolne ki himmat nahi padti.’
Hazrat Ali radiy-Allāhu ta’ala anhu ne farmaaya ‘Accha apna munh kholo.’
Chunaanche maine apna munh khola to Hazrat Ali ne 6 martaba apna Luaab-e-dahan daala. Maine arz ki ‘Huzoor! 6 martaba kyun?’
To unho ne farmaaya ‘Huzoor sallallāhu alaihi wa sallam ke adab ki wajah se. Huzoor ne 7 martaba luaab-e-dahan daala aur main Huzoor ki barabari kise kar sakta hu?’
Aap farmate hain ‘Phir saare hijaab uth gaye aur main khub wa’az kehne laga.’
Aap ne madrasa me talba ko ilm e deen sikhaana shuru kiya aur Islaam ki isha’at karna shuru kiya aur wa’az aur naseehat karte rahe.
Jab madrasa me talba ki ta’adaad badhne lagi to 528 Hijri me Aap ne aas paas ke makaan khareed liye aur unhe madrasa me saamil karke madrasa ki naye sire se taameer ki.
Aap ke ta’aleemaat aur karaamat dekhkar beshumaar logo ne Islaam apnaaya.
Aap ne apne shaagirdo ko jama’at banaakar Islaam ki isha’at ke liye dusre mulko me bhejna shuru kiya.
Aap ke shaagirdo me Ibrāheem bin Bishr, Mohammad bin Ahmad Bakhtiar, Abdullāh al-Sa’adi, Raafe bin Ahmad, aur Abu Mohammad bin Abdul Husain mash’hoor hain.
********************
Aap ko ALLĀH ta’ala ne aisa khaas ilm ata farmaaya tha ke har mas’ale ka sahi hal aasaani se ata farmaate the aur bahot saare mauqe par apne ilm se logo ko faa’ida pahunchaaya.
Aap ne Hambali mazhab ki taqleed karte.
Magar har mazhab ke mutaabiq sahi Fatwa dete the.
Ek martaba mulke Ajam se Aap ke paas ek mas’ala pesh kiya gaya jis ka jawaab Iraq ke koi bhi Mufti ne us sawaal ka jawab nahi de paaye the.
Sawaal ye tha ki ek shakhs ne mannat maani ki woh koi aisi ibaadat karega jis me us ibaadat ke waqt us ke saath puri kaa’inaat
me koi dusra shareek na hoga aur agar woh aisi ibaadat na kar sake to us ki Biwi ko 3 Talaaq. Aisi haalat me woh shakhs kaun si ibaadat kare jis me us ke saath koi shareek na ho?
Tamaam ulama-e-kiraam is sawaal ka jawaab dene me nakaam rahe. Jab ye sawaal Sarkaar Ghause paak radiy-Allāhu ta’ala anhu ke paas aaya to Aap ne foran yeh Fatwa diya ki ‘Wo shakhs Makkah moazzama chala jaaye
aur Mataaf [Tawaaf karne ki jagah] us ke liye khaali kar diya jaaye aur woh Ka’aba shareef ka Tawaaf kare to us ki mannat puri ho jaayegi.’
Ye jawaab sunkar bade bade ulama hairan reh gaye kyun ki sirf yehi ek surat thi jis me woh shakhs tanha ibaadat kar sakta tha.
************
Aap Sayyed ul Auliya hain ya’ni Tamaam Auliya Allāh ke Sardaar aur Peer e Peeraan hain.
Aap ne jab kaha ke ‘Qadami haazee hi ala raqabati kulli Waliyillāh ya’ni Mera qadam tamaam Auliya Allāh ki gardano par hai’ tab tamaam Auliya Allāh ne tasleem kiya.
Khwaja Moeen-ud-deen Hasan Chishti rahmatullāhi alaihi ne farmaaya ‘Aye Peeran e peer! Aap ka qadam mubarak meri gardan par hi nahi, mere sar par hai.’
************
Aap ko ‘Ghauṡiyat e kubra’ ka martaba mila hai.
Aap se pehle ye martaba Imaam Hasan al-Askari radiy-Allāhu ta’ala anhu ke paas tha hai Aur Ghauṡ e aazam Shaikh Abdul Qaadir Jeelaani tak ye martaba un ke paas raha aur phir Ghauṡ e aazam ko mila.
Aur aap ke baad ye Imaam al-Mahdi radiy-Allāhu ta’ala anhu ko ye milega aur tab tak Ghauṡ e aazam ki Ghauṡiyat e kubra ka zamaana rahega.
************
Aap 5wi sadi ke Mujaddid hain.
Aap ko ‘Mohiy-ud-deen’ ka laqab mila hai ya’ni Deen ko zinda karne waala.
Huzoor Sayyed ul Ambiya Ashraf ul Ambiya sallallāhu alaihi wa sallam ne har takleef bardaasht karke jis deen e islam ki bunyaad qaa’im ki
aur Aap ke ashaaba ne beshumaar qurbaaniya dekar Islaam ki hifaazat ki aur Karbala me Imaame Husain radiy-Allāhu ta’ala anhu aur Aap ke wafaadaar saathiyo ne islaam ko taaza kiya. Us ke baad har zamaane me aa’imma ne islaam ko aur mazboot kiya.
Aur phir jab zaroorat pesh aai tab ALLĀH ta’ala ne Ghauṡ e aazam ‘Mohiy-ud-deen’ Abdul Qaadir Jeelaani radiy-Allāhu ta’ala anhu ko bhejkar deen e Islaam ko phir se zinda kar diya.
Aap ne ‘Mo’atazila’ firqe ka muqaabala kiya. Is firqe ka bad-aqeeda tha ke ‘Qur’an majeed makhlooq hai.’ Aap ne bataaya ke ‘Qur’an majeed ALLĀH ka kalaam hai.’
Isi tarah bahot saari Bid’aten phail gai thi. Jin ko Aap ne apni ta’aleem ke zariye rad kiya aur logo ko Sunnat wa Shariat ki ta’aleem di.
Aap ke shaagird Shaikh Abdullāh Zubai farmaate hain ke ek martaba Hazrate Ghauṡe aazam radiy-Allāhu ta’ala anhu ki taqreer se muta’asir
hokar 1 laskh se zyada faasiq o gumraah ne tauba ki aur hazaaro yahoodi aur eisaai mazhabe islaam me daakhil huwe.
*******************
Shaikh Umar Kimani bayaan farmaate hain ki
Musalman hone ke baad un logo ne bayaan kiya ke Hum log Arab ke Eisaai the. Hum ne Islaam qubool karne ka iraada kiya aur ye soch rahe the ki kisi marde kaamil ke mubarak haath par Islaam qubool karen.
Isi dauraan ek hum ne Ghaibi aawaaz suni ke Tum log Baghdad jaao aur Shaikh Abdul Qaadir Jeelaani ke Mubarak haatho par Islaam qubool karo. Kyun ki jis qadr eimaan Shaikh Abdul Qaadir Jeelaani ki barkat se tumhare dilo me ghar karega us qadr eimaan is zamaane me kisi dusri jagah se na-mumkin hai.
Chunaanche hum log usi ghaibi farmaan par Baghdad aaye aur Alhamdulillāh humare seene Noore hidaayat se roshan ho gaye.’
************
Aap farmaate hain
‘Agar tum kisi ko hawa me udta dekho,
Lekin wo Shariat ka paaband na ho,
To wo Istidaraaj hai, Wilaayat nahi.’
************
Ek baar aap jangal me mujaahida me masroof the aur Aap ko bahot pyaas lagi. Achanak rahmate ilāhi se ghaib se ek baadal aaya aur Aap ke upar baarish barasne lagi. Aap ne us paani piya
Is ke baad Aap ne dekha ke ek aur baadal zaahir hua aur us me se itni roshni zaahir hui ke aasmaan tak phail gai. Us me se ek surat zaahir hui aur us ne kaha ‘Aye Abdul Qaadir! Main tumhara khaaliq aur Rab hu. Maine tumhare liye sab cheez halaal kar di hai.’
Aap ne foran ta’aooz (Aoozu billāh) padha. Us ke saath hi wo foran wo roshni gaa’ib ho gai aur andhera ho gaya. Aur ek aawaaz aai ‘Aye Abdul Qaadir! Tumhare ilm ne tumhe bacha liya. Warna maine bahot saare auliya ko is tarah gumraah kar diya hai.’
Aap ne farmaaya ‘Beshak ye mere Rab ka karam hai, jis ne mujhe tum se bacha liya.’
Aap ke saahabzaade Shaikh Sayyed Zia-ud-deen Moosā ne is baat ko sunkar Aap se arz kiya ‘Aap ne ye kaise ma’aloom kiya ki wo shaitaan hai?’
Aap ne farmaaya ‘Kyun ki us ne mujh se kaha ki jo haraam hai wo bhi mere liye halaal kar diya. Aur ALLĀH ta’ala kabhi aisa galat hukm nahi farmaata.’
************
15 saal tak aap raat bhar me ek Qur’an majeed mukammal karte rahe.
40 saal tak Aap ne Isha’ ke wuzu se Fajr ki namaaz ada ki.
************
Karaamat :
‾‾‾‾‾‾‾‾‾‾‾‾‾‾
ALLĀH ta’ala ne aap ko aise kamaalat ata farmae aur aap ne aise karaamat zaahir kiye ke Kaafiro ne islaam apna liya aur Musalman ke eimaan aur mazboot hue.
Jin me Murde ko zinda karna aur barso pehle doobi kashti ko kinaare par laana aur be-aulaad ko aulaad dilaana aur beemaaro ko shifa bakhshana aur yaad karne waale ko madad karna aur chor ko Abdaal banaana bhi saamil hai.
Aur paida’ish se pehle jab apni maa ke shikam me the tab saanp se apni maa ko bachaana bhi saamil hai.
(1) Ek roz Hazrat Ghauṡ e aazam ek mohalle se guzar rahe the to dekha ke ek musalman aur ek nasrani aapas me bahes kar rahe the.
Aap ne wajah puchhi to musalman ne kaha ‘Ye nasraani kehta hai ke Hazrate Eisā alaihis salaam tumhare Nabi e kareem Mohammad sallallāhu alaihi wa sallam se afzal hain. Aap ne nasraani se puchha ke ‘Tum kis darje se Hazrate Eisā alaihis salaam ko afzal kehte ho?’
Us ne kaha ke ‘Hazrate Eisā alaihis salaam murdo ko zinda kiya karte the.’ Aap ne farmaaya ke ‘Main Khaatim ul ambiya Sarwar e kaa’inaat sallallāhu alaihi wa sallam ka ummati hu. Agar main murdo ko kar du to tu Nabi e kareem sallallāhu alaihi wa sallam ki afzaliyat ko tasleem kar lega?’ Us ne kaha ‘Zaroor.’
Phir aap sab ke saath qabrastan gaye. Aap ne farmaaya ke ‘Bata, Kis qabr ke murde ko zinda karwaana chaahta hai?’
Us nasraani ne ek puraani qabr ki taraf ishaara kiya. Aap ne farmaaya ‘Ye murda dunya me jo kaam karta tha use bataata hua uthaata hu.’
Aap ne farmaaya ‘Kum bi iznillāh.’ To qabr khul gai aur murda zinda hokar gaata hua bahar nikla. Aap ne us se us ka naam aur kaam puchha. Phir us ne puchha ke ‘Yeh kaun sa zamaana hai?’
Aap ne farmaya ‘Khaatim ul Ambiya Sarwar e kaa’inat Mohammad Mustafa sallallāhu alaihi wa sallam ka zamaana hai. Kya tu dunya me waapas rehna chaahta hai?’ Us ne kaha ‘Nahi.’
Ye sab dekhkar wo eisāi musalman ho gaya.
(2) Ek baar ek aurat apne bete ko Hazrate Ghauṡ e aazam Jeelaani radiy-Allāhu ta’ anhu ki baargaah me khidmat aur ta’aleem ke liye rakhkar gai.
Kuchh din baad wo waha aai to dekha ke Sarkar Ghaus e aazam murgi kha rahe hain aur us ka beta roti aur saada khana kha raha hai. Us ne kaha ke ‘Huzoor! Main apne bete ko aap ki khidmat me chhod gai thi. Aap to khaane me bhi is ke saath ye farq kar rahe hain.’
Aap ne khaana khane ke baad murgi ki haddiya jama karke haath phera to murgi zinda hokar baahar chali gai.
Aap ne farmaaya ke ‘Jab tumhara beta is darje par pahunch jaayega, tab wo bhi aisa khaana khaa sakega.’
(3) Ek baar Hazrat Ghauṡ e aazam taqreer farma rahe the. Shaikh Ali bin Haiti mehfil me baithe the. Taqreer ke dauraan Shaikh Ali bin Haiti ko neend aa gai.
Jab un ki aankh khuli thi to dekha ke Huzoor Ghaus e aazam mimbar se neeche tashreef laakar adab ke saath un ke saamne khade hain. Shaikh Ali bin Haiti jaldi se un ki ta’azeem ke liye khade ho gaye.
Aap ne un se farmaya ‘Main adab ke saath yaha khada hu us ki wajah ye hai ki maine ye dekh liya tha ki tumhare khwaab me Huzoor Rasool-Allāh sallallāhu alaihi wa sallam tahsreef laaye hain.’
(4) Shaikh Ali ibn Arabi ke yaha ek bacha paida hua magar wo khansa (eunuch) tha. Kisi ne mashwara diya ke Hazrat Ghauṡ e aazam Abdul Qaadir Jeelaani ki baargaah me jaao aur dua ke liye kaho. Shaikh Ali ibn Arabi Ghaus e aazam ki baargaah me aaye aur dua ke liye darkhaast ki. Aap ne farmaaya
‘Tumhari qismat me ab beta nahi hai.’ Shaikh Ali ibn Arabi ne kaha ‘To phir main aap ki baargaah me kyun aata?’ Aap ne farmaaya ‘Theek hai. Main apne naseeb ka beta tumhe ata farmaata hu.’
Is ke baad 560 Hijri me Shaikh Ali ibn Arabi ke yaha beta paida hua aur Ghaus e aazam ke farmaan par us ka naam ‘Muhammad’ aur us ka laqab ‘Muhiy-ud-deen’ rakha gaya. Bade hokar wo mash’hoor aalim aur Qutub bane.
(5) Ek baar khalifa Mustanjid Billāh ke ek rishtedaar ko Hazrat Ghauṡ e aazaam ki baargaah me laaya gaya. Istasaqa (dropsy) ki beemaari ki wajah se us ke pait me paani jama ho jaane ki wajah se pait phool gaya tha.
Aap ne jaise hi apna daste mubarak us ke pait upar phera aur pait dabaaya to us ke pait ki soojan door ho gai aur pait jaisa tha waisa ho gaya aur use raahat mehsoos hui.
(6) Ek baar Abul Mu’aali Baghdaadi ne Hazrat Ghauṡ e aazam se arz kiya ki mera bacha Muhammad 15 mahino se bukhaar me mubtila hai aur kisi waqt bhi bukhaar kam nahi hota.
Aap ne farmaaya ke bache ke kaan me keh do ‘Aye Umme Muldin! Shaikh Abdul Qaadir ne hukm diya hai ki mere bache par se Hila ki taraf chala jaa.’
Abul Mu’aali ne Ghause aazam ke kehne par amal kiya aur bache ka puraana bukhaar jaata raha.
(7) Ek martaba Baghdad ki qahet saali ke dauraan Shaikh Abul Abbas ne Hazrat Ghauṡ e aazam se tangdasti aur faaqe ki shikaayat ki to aap ne unhe taqreeban 10 sair Gandum inaayat farmaaye aur farmaaya ke ‘Ise le jaao aur ek taraf se nikaalkar istemaal kar liya karo lekin ise wazan na karna.’ Chunanche us gandum ko un ke tamaam ghar wale 5 saal tak khaate rahe.
Ek roz un ki ahliya ne gandum ko wazan kiya to ma’aloom huwa ki jitna pehle din tha ab bhi utna hi hai.
Us ke baad wo gandum 7 roz me khatm ho gaye.
(8) Ek baar Hazrat Ghauṡ e aazam taqreer farma rahe the. Abul Mu’aali naami ek shakhs aap ke bilkul saamne aage baithkar wa’az sun raha tha. Kuchh der baad use haajat paish aai.
Us ne socha ki main thodi der bardaasht kar leta hu kyun ki mehfil me uthkar nikalna theek nahi hoga. Itne me us ne dekha ke Huzoor Ghaus e aazam mimbar par kuchh neeche tashreef laaye aur apni chaadar ko us ke upar daal diya.
Wo ye dekhkar hairat me reh gaya ki wo mehfil me se ek aisi waadi me pahunch gaya hai jaha jangal hai aur paas me ek naher beh rahi hai. Wo apni haajat se faarig hua aur wuzu karke 2 rak’at namaaz padhi.
Jaise us ne namaaz mukammal ki us ne dekha ki Ghaus e aazam ne chaadar hata di. Aur us ne dekha ki wo mehfil me hi hai aur wa’az jaari hai.
Baad me use yaad aaya ki us ne faarigh hone se pehle ek paid ki tehni par apni chaabiyo ka guchha rakha tha aur wo waha se lena bhul gaya hai.
Kuchh waqt baad wo apne kaarobar ke liye safar kar raha tha tab wo us waadi me pahuncha aur waha qayaam kiya. Use yaad aaya ki ye wo hi jagah hai jaha Gause aazam ne taqreer ke dauraan use pahunchaya tha. Jab wo us paid ke qareeb gaya to us ne dekha ki jis tehni par us ne chaabiya rakhi thi wo ab tak waha maujood hai.
(9) Ceylon me ek aurat Hazrat Ghauṡ e aazam ki mureed thi. Ek baar ek shakhs ne badkaari ke iraade se us par hamla kiya. Us ne Aap ko madad ke liye pukaara. Aap us waqt wuzu kar rahe the.
Aap ne apna joota uthaakar hawa me phenka. Logo ne ye dekhkar hairaan hue ki aap ka joota kaha gira wo kisi ko pata nahi chala. Wo joota us aurat par hamla karne waale zaalim shakhs ke sar par jaakar gira aur wo wahi par mar gaya.
(Aap ka wo joota mubarak Sri Lanka [Ceylon] me tabarruk ke taur par rakha gaya hai.)
(10) Ek martaba Hazrat Ghauṡ e aazam apne shaagirdo ko dars de rahe the. Achaanak aap ka chehra surkh ho gaya ho aur aap ke chehre par paseena aa gaya.
Aap ne foran apna haath apne jhubbe ke andar daala aur kuchh der khaamosh baithe rahe. Jab aap ne jhubbe me se apna haath baahar nikaala to sab ye dekhkar hairaan the ki aap ki aastin se paani ke qatre gir rahe the.
2 mahine baad taajiro ka ek qaafila bahot saare tohfe lekar aaya. Jab aap ke shaagirdo ne is ki wajah puchhi to un taajiro ne kaha ‘
Jab hum jahaaz me Baghdad ki taraf aa rahe the ki raaste me tez toofaan shuru ho gaya aur jab hum ne is khatre se bachaane ke liye Huzoor Ghauṡ e aazam ko yaad kiya. Foran ek muqaddas haath baahar aaya aur hamare jahaaz ko kinaare par pahuncha diya.’
Ye sunkar logo ko pata chala ki Ghauṡ e aazam ne un logo ki madad ke liye apna haath apna jhubbe me daala tha aur isi wajah se jab baahar nikaala to us me se paani ke qatre gir rahe the.
(11) Ek martaba Hazrat Ghauṡ e aazam Abdul Qadir Jeelaani radiy-Allāhu ta’ala anhu ki khidmat me Isfahaan ka rehne waala ek Shakhs haazir hua aur arz karne laga ke ‘Meri biwi ek muddat se beemaari me mubtala hai aur koi dawa ya dua asar nahi karti.’
Aap ne farmaaya ke ‘Ye Waadi e Sarandeep ke ‘Haanis’ naam ke ek sarkash jinn ki harkat hain. Jab teri biwi ko Sara ka daura ho, to us ke kaan me keh dena ke ‘Aye Haanis! Hazrat Shaikh Abdul Qaadir Jeelaani radiy-Allāhu ta’ala anhu farmaate hain, Tu apni sarkashi se baaz aa warna maar diya jaayega.’
Us ke baad wo shakhs Isfahaan chala gaya.
10 saal ke baad aaya to kehne laga ke ‘Ya Sayyedi! Jaisa aap ne farmaaya tha maine waisa hi kiya, us din ke baad phir kabhi daura nahi pada.’
(12) Shaikh Ismā’eel bin Hameeri ke paas ALLĀH ta’ala ke karam se khajoor ka ek aalishaan baagh tha. Us me khajoor ke 2 darakht such gaye aur un me khajoor aana band ho gaya. Unho ne un 2 darakhto ko nikaalne ke liye socha.
Itne me ek roz Sarkaar Ghauṡ e aazam radiy-Allāhu ta’ala anhu un ke baagh me tashreef laaye aur wuzu ke liye paani maanga. Unho ne paani pesh kiya. Aap ne ek sukhe darakht ke neeche wuzu kiya aur dusre sukhe darakht ke neeche 2 rak’at nafl namaaz ada farmai.
Aap namaaz padh rahe the isi dauraan dono darakht hare bhare ho gaye aur jab aap namaaz se faarig hue ke foran un darakhto par khajoore bhi lag gai.
(13) Ek martaba dariya e dazla (Tigris) me sailaab aa gaya. Log pareshaan hokar Huzoor Ghauṡ e aazam radiy-Allāhu ta’ala anhu ke paas aaye aur aap se istigasah karne lage.
Aap apna asa mubarak ((laathi) lekar dariya ki taraf chal pade. Dariya ke kinare par pahunch kar aap ne paani ki asal hadd par apna asa gaad diya aur farmaya ‘Aye paani, Bas yahi tak waapas aa jaao.’ Foran paani kam hona shuru ho gaya aur us asa mubarak tak aa gaya.
(14) Ek martaba Baghdaad me Taa’oon (Plague) ki beemaari is kasrat se phaili ki rozaana hazaaro log marne lage. Logo ne Huzoor Ghauṡ e aazam se is baat ki shikaayat ki. Aap ne farmaya ‘Hamare madarse ki ghaas kootkar mareezon ko khilaao.
ALLĀH ta’ala us ki barkat se shifa dega aur taa’oon ki beemaari jaati rahegi.’ Logo ne aap ke hukm ki taamil ki aur mareez shifa paane lage. Mareezon ki ta’adaad zyada hone par aap ne farmaaya ‘Jo hamare madarse ka ek katra paani pee lega use bhi shifa hogi.’
Logo ne aap ke madarse ka paani peekar shifa e kaamila haasil ki aur taa’oon ka marz jaata raha aur aap ke zamaane me yeh beemaari dobaara nahi aai.
(15) Abul Muzaffar naami ek Saudagar Hazrat Shaikh Hammaad rahmatullāhi alaihi ki baargaah me haazir hua aur arz kiya ‘Huzoor! Qaafla tayyaar hai. Main mulk e Shaam ko jaa raha hu, Sardast 100 ashrafiya apne saath le jaa raha hu aur utni qimat ka saamaan mere paas maujood hai. Dua kijiye ke main kaamyaab lautu.’
Shaikh Hammaad ne farmaaya ke ‘Tum apna safar multawi kar do warna zabardast nuqsaan uthaaoge. Daaku tumhara sab maal loot lenge aur tum ko qatl bhi kar denge.’
Saudagar ye khabar sunkar bada pareshaan hua. Usi pareshaani me waapas aa raha tha ke raaste me Huzoor Ghauṡ e Aazam radiy-Allāhu anhu mil gaye. Aap ne puchha ‘Kyun pareshana ho?’ Saudagar ne saara qissa suna diya.
Aap ne farmaaya ‘Pareshaan hone ki zaroorat nahi. Tum shauq se mulk e Shaam jaao. In sha ALLĀH tumhe koi nuqsaan nahi hoga aur tum ba-khairiyat aur kaamyaab lautoge.’
Chunaanche saudagar mulk e Shaam ko rawaana ho gaya. Mulk e Shaam me use bahot saara nafaa hua. Waha se wo 1000 ashrafiyo ki thaili liye mulk e Halb me pahuncha aur ittefaqan wo thaili kahi rakhkar bhul gaya. Usi fikr me neend ne galbaa kiya aur so gaya.
Khwaab me dekha ke kuchh daakuo ne us ke qaafle par hamla karke saara Saaman loot liya he aur use bhi qatl kar daala hai. Ye vehshatnaak khwaab dekhkar saudagar ki aankh khul gai.
Us ne dekha ke waha kuchh bhi na tha magar utha to yaad aaya ke ashrafiyo ki thaili maine falaan jagah par rakhi thi. Chunaanche jaldi waha gaya to thaili mil gai aur khushi khushi Baghdaad waapas aaya.
Ittefaaqan bazaar me Hazrat Shaikh Hammaad mil gaye aur farmaane lage ke ‘Jaakar pehle Ghauṡ e Aazam radiy-Allāhu anhu se mil. Mehboob e Sub’haani ne tumhare liye 70 baar baargaah e ilāhi me dua maangi.
Aur un ki dua ke sabab tumhari Taqdeer e moallaq badli hai jis ki maine tumhe khabar di thi. ALLĀH ta’ala ne saath hone waale waaqye ko Ghaus e Aazam ki dua se bedaari se khwaab me badal diya.’
Ye sunte hi wo saudagar Ghauṡ e Aazam radiy-Allāhu anhu ki baargaah me pahuncha. Use dekhte hi Huzoor Ghauṡ e Aazam ne farmaaya ‘Waaqai maine tumhare liye 70 baar dua maangi thi.’
(16) Shareef Makrooji naami ek saudaagar 14 oonto par shakkar laadkar tijaarat ke liye jaa raha tha. Raaste me ek registaan me qaafile ne qayaam kiya. Raat ke aakhri paher jab qaafila chalne ke liye tayyaar huwa to pata chala ke 4 oont kahi gaayab ho gaye hain.
Saudagar ne bahot talaash kiya lekin oont na mile. Saudagar ne Huzoor Ghauṡ e Aazam ko madad ke liye pukaara. Us ne dekha ke ek safed-posh nooraani Buzurgh ek teele par khade hain aur haath ke ishaare se apni taraf bula rahe hain.
Jab woh us teele ke paas pahuncha to woh buzurgh gaa’ib ho gaye. Us ne teele par chadh kar dekha to dusri taraf chaaro oont samaan samet baithe the.
(17) Maahe Moharram me ek roz Huzoor Ghauṡ e aazam apne mehmaan khaane me tashreef farma the. 300 ke qareeb log bhi Aap ki khidmate aqdas me haazir the.
Achaanak Aap uthkar mehmaan khaane se baahar tashreef le gae aur tamaam logo ko baahar aane ke liye farmaaya. Sab log baahar aaye. Jaise hi sab log baahar a ke us makaan ki chhat dhadaam se gir padi.
Aap ne farmaaya ke “Main baitha hua tha ke mujhe ghaib se ittela di gai ke is makaan ki chhat girne waali hai. Chunaanche main baahar aa gaya aur aap logo ko bhi apne paas bula liya ke koi dab na jaaye.”
(18) Ek Abdaal khata sarzad ho jaane ki wajah se maqaame Abdaaliyat se maazool kar diye gae. Unho ne Sarakar Ghauṡe paak radiy-Allāhu anhu ki baargaah me aakar multaji ho kar istegaṡah pesh kiya aur apni peshaani ko Madrase ki chaukhat par rakh kar rone lage.
To usi waqt haatife ghaibi se aawaz aai ke ‘Chunke tum ne mere Mehboob Abdul Qaadir ki chaukhat ki khaak par niyaazmandi ke liye sar rakh diya he is liye maine tum ko maaf kar diya aur pehle se bhi buland Maqaam ataa farmaaya hai. Tum Ghauṡ e aazam ki is ne’amate ujma ka shukriya adaa karo.’
Ek dusri riwaayt me is tarah hai ke ‘Us Wali ne 70 Auliya Allāh se dua karwai. Magar aakhirkaar Sarkaar Ghauṡe aazam ki baargaah me iltija ki aur Aap ne dua farmai to ALLĀH ta’ala ne use Wilaayat waapas ata farmai.;
(19) Ek martaba raat ko Huzoor Ghauṡe aazam radiy-Allāhu anhu ke ghar me chor aaya aur Hazrat ki kamli uthhaai to foran andha ho gaya. Us ne kamli rakh di to achha ho gaya aur dekhne laga. Phir kamli uthhaai to phir andha ho gaya. Isi tarah 3 baar hua.
Chothi baar Kamli rakh bhi di phir bhi roshni na aai andha hi raha. Wo usi Maqaam par baitha raha. Huzoor Ghauṡe aazam radiy-Allāhu anhu ko us ka sab haal ma’aloom hota raha. Aap tamaam shab nawaafil me mashgool rahe.
Jab subah ki namaaz se faarigh hue to Hazrat Khizr alaihis salaam Aap ki khidmat me tashreef laaye aur kaha ke ‘Falaa Shaher me ek Abdaal ka inteqaal hua hai. Aap jis ko farmaae us ki jagah muqarrar kiya jaaye.’
Aap ne farmaaya ke ‘Raat ko hamare ghar ek mehmaan aae hain. un ko laao.’
Wohi Chor andha haazir kiya gaya. Aap ne ek tawajjoh us par daali. Usi waqt us ki aankh khul gai aur Abdaal ka martaba haasil ho gaya.
Aap ne farmaaya ‘In ko le jaao aur us Abaal ki jagah par muqarrar kar do.’
(20) Ek martaba Sarkar Ghauṡ e aazam radiy-Allāhu ta’ala anhu wa’az farma rahe the ki baarish hone lagi aur log uthkar jaane lage. Huzoor Ghauṡ e aazam radiy-Allāhu ta’ala anhu ne aasmaan ki taraf rukh kiya aur kaha me ‘Tere zikr ke liye logo ko jama kar raha hu aur tu unhe muntasir kar raha hai.’
Aap ne jab ye kaha to jalsagaah par baarish bilkul band ho gai, magar jalsagaah ke bahar ba-dastoor jaari rahi.
(21) Ek baar Maah e Ramazaan me ittefaaqan 70 aadamiyon ne aap ko ek hi roz alag alag apne apne ghar par Iftaar ki daawat di. Aap ne har ek ki daawat ko qubool kiya.
Jab Iftaari ka waqt aaya to aap ne har ek ke ghar jaakar Iftaari ki aur usi waqt apne ghar bhi Iftaari ki.
Ye khabar Baghdad me phail gai.
Aap ke ek khaadim ke dil me khayaal aaya ke Hazrat to us waqt apne ghar se hi nahi nikle to itne logon ke gharo me jaakar ek hi waqt me Iftaari karna kaise mumkin ho sakta hai?
Aap ne us ke dil ki baat par muttala hokar farmaaya ‘Yeh sach hai ke maine ek hi waqt me un tamaam 70 aadamiyo ke yahan alag alag un ke gharo me jaakar Iftaari ki aur usi waqt maine apne ghar me bhi Iftaari ki.’
(22) Hazrate Abdullāh Zayyal farmaate hai ke
‘Ek martaba raat ke waqt main Sarkar e Ghauṡ e paak radiy-Allāhu ta’ala anhu ke madarse me khada tha ki Huzoor Ghauṡ e Aazam andar se apne mubarak haath me asaa lekar baahar tashreef laaye. Aap ko dekhkar mere dil me khayaal aaya ki kaash Ghauṡ e aazam is asaa ke zariye koi karaamat dikhaate.
Itne me Sarkar Ghauṡ e aazam ne asaa ko zameen me gaad diya aur woh asaa mashaal ki tarah roshan ho gaya aur kaafi der tak roshan raha. Jab Aap ne use zameen se nikaala to phir wo apni asli haalat me aa gaya.
Sarkar Ghauṡ e paak ne irshaad farmaaya ke Aye Abdullāh! Tum yehi chaahte the na?’
(23) Shaikh Aarif Sabati rahmatullāhi alaihi farmaate hain ke
‘Ek martaba main Huzoor Ghauṡ e Aazam radiy-Allāhu ta’ala anhu ki ziyarat ke liye Baghdaad shareef aaya aur kuchh din Aap ki khidmat me thehra. Phir jab mujahida karne ke liye Misr jaane ka iraada kiya aur Aap se ijaazat maangi to Aap ne mere munh me apni do ungliya daali aur mujhe use chusne ka hukm diya.
Main samajh gaya ki is se Aap ka kya maqsad hai. Phir main Baghdaad se Misr aaya to meri haalat yeh thi ki na kuchh khaata tha na peeta tha. Is ke bawajood meri taaqat pehle ki nisbat zyada thi.’
(24) Ek martaba Aap chand masha’ikh ke saath kashti me sawaar the. Un me se ek aadmi mar gaya. Logo ne iraada kiya ki us ke jism ko dariya me daal den. Magar Sarkaar Ghauṡe Aazam ne un ko roka aur apne tasarruf se dariya ko khushk kar diya to logo ne us shakhs ke liye qabr khodi aur us ko dafn kar diya. Phir paani aur kashti dono oonche ho gaye.
(25) Ek baar Khalifa e Bagdaad Abu Muzaffar Yousuf Hazrat Ghauṡ e aazam ki baargaah me haazir hokar arz ki ke ‘Main aap ki koi Karaamat dekhna chaahta hu.’ Aap ne farmaya ‘Kya chaahte ho?’
Us ne kaha ‘Mai ghaib se saib chaahta hu.’ Us waqt Iraq me saib ka mausam na tha. Sarkaar Ghauṡe aazam ne haath badhaaya to aap ke mubarak haathon me 2 saib the.
Aap ne ek saib us ki taraf badha diya aur ek saib ko apne mubarak haathon se kaata to nihayat safed khushboodaar tha. Abu Muzzafar ne apna saib kaata to us me keede the. Us ne kaha ‘Ya Ghaus-e-aazam, Ye kya hai?’ Aap ne farmaaya ‘Abu Muzaffar! Tumhaare saib ko zulm ke haath lage to us me keede pad gaye.’
(26) Hazrat Sayyed Abu Saaleh Nasr rahmatullāhi alaihi apne waalide mohtaram Hazrat Sayyed Abdul Razzaaq rahmatullāhi alaihi se naql farmaate hain ke
‘Hazrat Shaikh Abdul Qaadir Jeelaani radiy-Allāhu ta’ala anhu ek roz namaaz e jum’aa ke liye nikle main aur mere do bhai Hazrat Abdul Wahaab Aur Hazrat Eisā rahmatullāhi alaihi Aap ke saath the. Raaste me hum ko haakime waqt ke kotwal aur hukoomat ke log mile,
un ke saath sharaab ke 3 matke the jin me boo bahot tez thi. Aap ne un logo se farmaaya ke Thehar jaao. Lekin wo apne jaanwaro ko jaldi se daudkar jaane lage. Aap ne jaanwaro se kaha Thehar jaao to woh wahi apni jagah thehar gaye.
Woh log unhe bahot maarte the lekin jaanwar apni jagah se na hilte the. Un sab logo ko kaulanj ka dard shuru ho gaya aur zameen par lautne lage. Phir elaaniya tauba aur istaghfaar karne to un ka dard jaata raha aur sharaab ki boo sirqe me badal gai.
Unho ne bartano ko khola to woh Sirqa tha. Sarkaar Gauṡ e aazam Jaama Masjid chale gaye. Jab Haakime waqt ko is baat ki khabar mili woh khauf-zada hokar Sarkaar Gauṡ e aazam ki baargaah me haazir hua aur maafi maangi.’
(27) Abul Khizr Husaini bayaan karte hain ke ‘Mujh se Hazrat Ghauṡ e aazam radiy-Allāhu anhu ne 560 hijri me farmaaya ke Tum Mosul shaher ki taraf chale jaao, waha ALLAH ta’ala tumhe Aulaad ataa farmaega. Pehle ladka paida hoga.
Us ka naam ‘Mohammad’ rakhna. Us ladke ko ek ajami naabina haafiz Qur’an majeed padhayega. Jis ka naam Ali hoga aur tumhara ladka 7 Saal ki umr me sirf 7 maah me Qur’an majeed hifz kar lega aur tumhari umr 94 saal 6 maah aur 7 din ki hogi aur teri maut tandurusti ki haalat me Baarbil ke maqaam par hogi.’
Aap ke farmaan ke mutaabiq 561 Hijri me Shaher Mosul me Abu Abdullāh Mohammad ki paidaish hui. Abul Khizr Husaini ne Qur’an majeed hifz karaane ke liye ek naabina ko muqarrar kiya aur jab un ka Naam aur Watan Daryaaft kiya gaya to unho ne apna naam Ali aur watan Baghdaad bataaya.
Abul Khizr Husaini ki wafaat bhi Hazrat ke irshaad ke mutaabiq tandurusti ki haalat me Baarbil ke maqaam par hi hui.
(28) Baghdaad ke Mohalla Baabul Ijz ke qabrastan me ek qabr se murde ke chikhne ki aawaaz sunaai deti thi. Logo ne Sayyedina Ghauṡe aazam se ye baat arz ki.
Aap ne daryaft farmaaya ke “Kya ye qabr waale ne mujh se Bai’at ki hai?” Logo ne kaha “Hume maaloom nahi.” Aap ne farmaaya “Us ne kabhi meri majlis me haazri di hai?” Logo ne kaha “Hume maaloom nahi.” Phir Aap ne daryaft farmaaya “Kya us ne mere ta’aam se kuchh khaaya tha?” Logo ne arz kiya ke “Hume maaloom nahi.”
Us ke baad Aap ne Muraaqaba farmaaya aur phir sare Aqdas utha kar farmaaya ke “Farishto ne mujhe bataaya ke us shakhs ne Aap ki ziyarat ki hai aur Aapse Husne zan wa Mohabbat rakhta tha. Lihaaza us wajah se Rab ta’ala ne us par raham farmaaya.”
Us ke baad us qabr se kabhi aawaaz sunaai na di.
(29) Shaikh Yahyā bin Abi Nasr Baghdadi se naql hain ki
‘Maine apne waalid se suna ki wo kehte the ki, Maine amaliyaat ke zariye ek baar Jinnaat ko bulaaya to unho ne aane me der laga di.
Phir jab wo aaye to mujh se kehne lage ki jab Sayyedina Ghauṡe aazam Abdul Qaadir Jeelaani rahmatullāhi alaihi wa’az farma rahe ho to us waqt bulaaya na karo. Maine wajah puchhi to kehne lage ki Hum un ki majlis me haazir hua karte hain.
Maine kaha Tum bhi jaate ho? Kehne lage ki Haan! Insaano se zyada hum jinnaat ki bheed hoti hai Aur hum me se bahot se giroh hain jinho ne Aap ke haath par Tauba ki aur Islaam laaye.’
(Bahzatul Asraar, Safa -274)
************
Aap ne bahot saari kitaaben likhi hain, jin me ye kitaaben mash’hoor hain :
(1) Qaseedat-ul-Ghauṡia
(2) Ghunya li-talibeen tariq al-haqq wa al-deen
(3) Fat’h-ur-Rabbaani
(4) Fatuh-ul-Ghaib
(5) Jala’ al-Khawaatir
(6) Kitaab Sirr al-Asraar wa Mazhar al-Anwaar Al-Asraar
(7) Al-Fuyuzaat al-Rabbaniyya
(8) Bashair al-Khairat
(9) Malfuzaat.
************
Aqwaal :
‾‾‾‾‾‾‾‾‾‾‾
(1) Tamaam khubiyon ka majmua Ilm sikhna, us par Amal karna aur dusro ko sikhaana hai.
(2) Jis (nek) amal me tujhe Halaawat na mile, Yun samajh ke tune use kiya hi nahi.
(3) Guzra huwa kal ek Naseehat hai, Aaj ka din Ghaneemat hai, Aane wala kal sirf ek Ummeed hai.
(4) Aye Jannat ke chaahne wale, Jannat basaane aur paane ke liye sirf aaj ka din hai, Kal ka nahi. Kya khabar tera intaqaal ho jaaye.
(5) Tere sab se bade dushman tere bure Hum-nasheen hain.
(6) Tu nafs ki tamanna puri karne me mashgool hai aur nafs tujhe barbaad karne me.
(7) Aqlmand pehle Qalb se mashwara karta hai phir Zabaan se bolta Hai.
(8) Sabr naam hai pareshaaniyo me Saabit-qadami aur Shariat ke daaman ko pakde rakhne ka.
(9) Behtareen amal logo ko dena hai, Logo se lena nahi.
(10) Bad-ghumaani faa’ide ke tamaam raaste band kar deti hai.
(11) Apni museebat ko chhupao ALLĀH ta’ala ki Qurbat naseeb hogi.
(12) Fitna hai wo Rozi jis par Shukr na ho aur wo Tangi jis par Sabr na ho.
(13) Mo’min apne ahl o ayal ko ALLĀH par chhodta hai aur Munaafiq Maal o zar par.
(14) Zaalim apne zulm se Mazloom ki Duniya kharaab karta hai aur apni Aakhirat.
(15) Zulm se dil me andhera paida hota hai. Zulm chehre ko kaalaa kar deta hai. Na khud zulm karo na zaalim ki madad karo.
(16) Wo insaan kitna Bad-naseeb hai jis ke dil me jaandaaro par raham karne ki aadat nahi.
(17) Jo ALLĀH ta’ala se aashna huwa us ne Khalq e Khuda ke saath Tawazo ka bartaav kiya.
(18) Banda apne Rab ke qareebtar us waqt hota hai jab wo aazma liya jaata hai.
(19) Jin ulema me 3 cheez maujood ho un ki sohbat ikhtiyaar karo :
[1] Ilm [2] Amal aur [3] Ehsaan.
(20) Jab tum beemaar ho jaao to sabr aur shukr se us ka istaqbaal kar take wo tere liye rahmat ban jaaye.
(21) Dunya ko apne dil se mukammal taur par nikaal do phir woh tujhe nuqsaan nahi pahunchayegi.
(22) Hasad aisi buri cheez hai jo Eimaan ko khokhla deti hai aur ALLĀH ki rahmat se mehroom kar deti hai.
(23) ALLĀH aise bande ko sab se zyada pasand farmaata hai jo ALLĀH ke bando ko faa’ida pahunchaye.
(24) Agar aalim zaahid (parhezgaar) na ho to wo apne maanne walo ke liye azaab hai aur Aalim e baa-amal ALLĀH ka naa’ib hai.
(25) Museebat ho ya aaraam har haal me ALLĀH se raazi raho, Us ki shikaayat kabhi bhi zabaan par na laao.
(26) Logo ke saamne Moazziz bankar raho. Agar apni gurbat zaahir karoge to logo ki ni nigaaho se gir jaaoge.
(27) Agar tum Jad ko khod daalo to bhala daaliyo se kya milega. Yunhi Dil najis ho ur A’aza taahir ho to kya faa’ida. Aaza bhi usi waqt paak honge jab tum Kitaab aur Sunnat par amal karoge. Dil mehfooz hoga to a’aza bhi mehfooz rahenge.
************
Ghauṡ e Aazam ka Pariwaar
‾‾‾‾‾‾‾‾‾‾‾‾‾
Aap ki 4 biwiya hain :
(1) Bibi Madeena binte Meer Muhammad Masjidi
(2) Bibi Saadiqa binte Muhammad Shafi
(3) Bibi Mo’mina
(4) Bibi Mehbooba.
Aur 27 saahabzaade aur 22 saahabzaadiya hain. Jin me se chand bachpan me hi inteqaal kar gaye.
Saahabzaade Ghauṡ e Aazam
(1) Shaikh Saif-ud-deen Abdul Wahaab,
(2) Shaikh Taaj-ud-deen Abdur Razzaaq,
(3) Shaikh Shams-ud-deen Abdul Azeez,
(4) Shaikh Siraaj-ud-deen Abdul Jabbaar,
(5) Shaikh Sharf-ud-deen Eisā,
(6) Shaikh Zia-ud-deen Moosā,
(7) Shaikh Yahyā,
(8) Shaikh Abdullāh,
(9) Shaikh Muhammad,
(10) Shaikh Ibrāheem,
(11) Shaikh Abdur Rahmān.
Saahabzaadiya Ghauṡ e Aazam
(1) Sayyeda Aafia,
(2) Sayyeda Yāseen,
(3) Sayyeda Aleema,
(4) Sayyeda Taaj,
(5) Sayyeda Zaahida,
(6) Sayyeda Zaakira,
(7) Sayyeda Ummul Fazal,
(8) Sayyeda Shareefa,
(9) Sayyeda Aabida,
(10) Sayyeda Khadeeja,
(11) Sayyeda Riji,
(12) Sayyeda Ummul Fateh,
(13) Sayyeda Zahra,
(14) Sayyeda Jamaal,
(15) Sayyeda Khair-un-Nisa,
(16) Sayyeda Shaah Khatim,
(17) Sayyeda Shaah Bibi
(18) Sayyeda Fakira,
(19) Sayyeda Faatima,
(20) Sayyeda Umme Salama,
(21) Sayyeda Fazal-un-Nisa,
(22) Sayyeda Taaj-un-Nisa.
************
Aap Hazrat Shaikh Abu Saeed Mubarak Makhzumi al-Mukarrami rahmatullāhi alaihi ke mureed aur khalifa hain. Jo Junaidi silsila ke shaikh hain.
Aap se Tareeqat ka ‘Qaadri’ silsila jaari hai.
Aap ke saahabzaade ke ilaawa aap ke 12 khulfa mash’hoor hain :
(1) Hazrat Shaikh Shahaab-ud-deen Umar Suharwardi
(2) Hazrat Shaikh Ali al-Haddaad
(3) Hazrat Shaikh Shaah Abu Umar Qureshi Marzook
(4) Hazrat Shaikh Qareeb Alban Mosuli
(5) Hazrat Shaikh Ahmad bin Mubarak
(6) Hazrat Shaikh Abu Saeed Shibli
(7) Hazrat Shaikh Nashaab-ud-deen
(8) Hazrat Shaikh Abu Muhammad Abdullāh Jabaai
(9) Hazrat Imaam Moafaq-ud-deen Abu Muhammad bin Qudaama Maqdasi
(11) Hazrat Shaikh Abu Madyan, Shoaib al-Maghribi rahmatullāhi alaihi
(12) Hazrat Shaikh Kabeer-ud-deen urfe Shaah Daula.
************
Aap farmaate hain,
‘Qayaamat tak mere jitne Mureed honge wo bagair Tauba kiye nahi marenge.’
Ek Shakhs ne Sarkar Ghauṡ e aazam radiy-Allāhu ta’ala anhu se puchha ke ‘Aap ke Mureedo me Parhezgaar aur Gunaahgaar dono hi honge?’
Aap ne farmaaya ‘Haan, Magar Parhezgaar mere liye hain aur Gunahgaaro ke liye Main hu.’
************
561 Hijri me Aap beemaar hue. Magar Aap paabandi ke saath namaaz ada karte rahe aur khidmat e deen karte rahe.
Aap ke saahabzaade Shaikh Abdul Jabbaar ne aap se puchha ke ‘Kya aap ko koi takleef hai?’ to Aap ne farmaaya ‘Mere jism me dard hai magar mere qalb me sukoon hai aur wo yaad e ilāhi me mashgool hai.’
Aap ke dusre saahabzaade Shaikh Abdul Azeez ne puchha ke ‘Aap ki tabiyat kaisi hai?’ To Aap ne farmaaya ‘Meri takleef mere Rab ke siwa koi jaan nahi sakta. Wo sab haqeeqat se waaqif hai’
Wisaal se pehle aap ke saahabzaade Hazrat Shaikh Abdul Wahaab ne naseehat ke liye kaha to Aap ne farmaaya ‘Sirf ALLĀH ta’ala ki raza ke liye us ki mukammal ita’at karo, Sabr aur parhezgaari ikhtiyaar karo. ALLĀH ke siwa kisi ka khauf na rakho. Sirf usi se ummeed rakho aur usi se maango. Sirf ALLĀH par yaqeen rakho, us ke siwa kisi par bharosa na rakho.’
Phir aap ne paani mangwaaya aur wuzu kiya aur namaaz e isha’ ada ki.
Phir dua ki ‘Aye ALLĀH! Huzoor sallallāhu alaihi wa sallam ki ummat ke khatao ko ma’af farma. Aye ALLĀH, Huzoor sallallāhu alaihi wa sallam ki ummat par raham farma. Aye ALLĀH, Huzoor sallallāhu alaihi wa sallam ki ummat ke gunaaho ko bakhsh de.’
Phir aap ek taraf lait gaye. Aur farmaaya ‘Main ALLĀH ki panaah chaahta hu, us ki hifaazat chaahta hu. ALLĀH ek hai, wo har cheez par Qaadir hai aur har cheez ka ilm rakhta hai. Us ke siwa koi ma’abood nahi hai. Wo bemisaal, be-niyaaz aur samad hai aur Hazrat Mohammad Mustafa sallallāhu alaihi wa sallam us ke Nabi aur Rasool hain.’
Us ke baad Aap ne 3 baar ‘ALLĀH’ kaha aur inteqaal farmaaya.
************
Aap ka wisaal 17 Rabi’ us saani 561 Hijri (20 February 1166 A.D.) ko 91 baras ki umr me hui.
Aap ki namaaz e janaaza aap ke saahabzaade Hazrat Shaikh Sayyed Abdul Wahaab Qaadri al-Jeelaani rahmatullāhi alaihi ne padhaai.
Aap ka mazaar Baghdad (Iraq) ke Resafa ilaaqe me hai.
************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Ghauṡ e aazam Shaikh Sayyed Abdul Qaadir Jilani radiy-Allāhu ta’ala anhu aur Ahle bait ke aur Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.
