ZAKAAT KE MASAIL

     -----------------------------------------

Zakaat Farz Hai Iska Inkar Karne Wala Kafir

Aur Na Dene Wala Fasiq wa Jahannami

Aur Ada Karne Mein Deri Karne Wala Gunahgar Wa Mardudushshahadh Hai
( Fatawah Hindiyah Kitabul Zakaat Jild 1 Page 170 )

Namaz Ki Tarah Is Ke Bare Mein Bhi Bahut Si Ayaten Wa Hadeesen Aayi Hain

Jin Mein Zakaat Ada Karne Ki Sakht Taaqeed Hai

Aur Na Ada Karne Wale Par Tarah Tarah Ke Duniya Wa Aakhirat Ke Azabon Ki Waeiden Aai Hain



                   MASALA

ALLAH- Ke Liye Maal Ka Ek Hissa Jo Shariyat Ne Muqarrar Kiya Hai

Kisi Faqeer Ko Maalik Bana Dena Shariyat Mein Is Ko Zakaat Kahte Hain
( Fatawah Hindiyah Kitabul Zakaat Jild: 1 Page: 170 )


                  MASALA

Zakaat Farz Hone Ke Liye Chand Sharte Hain

( 1 ) Musalman Hona Yani Kafir Par Zakaat Farz Nahin

( 2 ) Baligh Hona Yani Na Baligh Par Zakaat Farz Nahin

( 3 ) Aaqil Hona Yani Deewane(Pagal) Par Zakaat Farz Nahin

( 4 ) Azaad Hona Yani Laundi Ghulam Par Zakaat Farz Nahin

( 5 ) Maalike Nisaab Hona Yani Jis Ke Paas Nisaab Se Kam Maal Ho Us Par Zakaat Farz Nahin

( 6 ) Pure Taur Par Maalik Ho Yani Is Par Qabza Bhi Ho

Tab Zakaat Farz Hai Warna Nahin

Maslan Kisi Ne Apna Maal Zameen Mein Dafan Kar Diya Aur Jagah Bhool Gaya

Fir Barson Ke Baad Jagah Yaad Aai

Aur Maal Mil Gaya Toh Jab Tak Maal Na Mila Tha Us Zamane Ki Zakaat Wajib Nahin

Kunki Nisaab Ka Maalik Toh Tha Magar Is Par Qabza Nahin Tha

( 7 ) Nisaab Ka Qarz Se Faarigh Hona

Agar Kisi Ke Paas Ek Hazar Rupye Hai

Magar Woh Ek Hazar Ka Maqrooz Bhi  Hai Toh Us Ka Maal Qarz Se Faarigh Nahin

Lihazah Us Par Zakaat Nahin

( 8 ) Nisaab Ka Hajate Asliya Se Faarigh Hona

Hajate Asliyya Yani Aadmi Ko Zindagi Basar Karne Mein Jin Chizon Ki Zarurat Hai

Maslan Apne Rahne Ka Makan Jadey Garmiyon Ke Kapde Gharelu Saman

Yani Khane Pine Ke Bartan Charpaiyan Kursiyan Mezein Chulhe Pankhe Waghairah

In Maalon Mein Zakaat Nahin Kunki Yeh Sab  Malo Saman Hajate Asliyya Se Farigh Nahin Hain

( 9 ) Maale Nami Hona Yani Badhne Wala Maal Hona

Khwah Haqeeqatan Badhne Wala Maal Jaise Maale Tijarat

Aur Charayi Par Chhodey Hue Janwar

Ya Hukman Badhne Wala Maal Ho Jaise Sona Chandi

Ki Yeh Isi Liye Paida Kiye Gae Hain Ki In Se Chizen Kharidi Jayen

Aur Bechi Jayen Taki Nafa-a Hone Se Ye Badhte Rahen

Lihazah Sona chandi Jis Haal Mein Bhi Ho Zewar Ki Shakl Mein Hon

Ya Dafn Hon Har Haal Mein Yeh Maale Nami Hain

Aur Inki Zakaat Nikalna Zaruri Hai

( 10 ) Male Nisaab Par Ek Saal Guzar Jana

Yani Nisaab Pura Hote Hi Zakaat Farz Nahin Hogi

Balki Ek Saal Tak Woh Nisaab Milk Mein Baqi Rahe Toh

Saal Pura Hone Ke Baad Is Ki Zakaat Nikali Jaye
( Fatawah Hindiyah Kitabul Zakaat Jild: 1 Page: 171 -174 )



                    MAS-ALA

Sone Ka Nisab Sadhe Saat Tolah Hai

Aur Chandi Ka Nisab Sadhe Bawan Tolah Hai

Sone Chandi Main Chaliswan Hissa Zakaat Nikaal Kar Ada Karna Farz Hai

Yeh Zaruri Nahin Ki Sone Ki Zakaat Mein Sona  Hi

Aur Chandi Ki Zakaat Mein Chandi Hi Di Jaye

Balki Yeh Nhi Jayez Hai Ki Bazari Bhaw Se Sone Chandi Ki Qeemat Laga Kar Rupye Zakaat Mein Dein


Ye bhi Padhen  ↓ ↓ ↓ ↓ ↓ ↓
 ° Rozah-Ke-Masail
° Rozah-Todne-Wali-Chizen
° Roza-Kisse-Nahi-Totta
° Kab-Roza-Chhor-sakte-hain
° ITIKAF KA TARIKA

     ZEWRAAT KI ZAKAAT

Hadees Shareef Mein Hai Ki Do Auratein Huzure Aqdas (Sallallahu Ta-ala Alaihi Wasallam ) Ki Khidmate Mubaraka Mein Hazir Hui

Un Ke Hathon Mein Sone Ke Kangan They

Aap Ne Irshaad Farmaya Ki Kya Tumne In Zewraton Ki Zakaat Ada Karti Ho

Aurton Ne Arz Kiya Ki Ji Nahin

Toh Aap ( Sallallahu Ta-ala Alaihi Wasallam ) Ne Irshaad Farmaya

Ki Kya Tum Ise Pasand Karti Ho Ki   ALLAH. Ta-ala Tumhein Aag Ke Kangan Pahnaye

Aurton Ne Kaha Nahin

Toh Irshaad Farmaya Ki Tum In Zwqaron Ki Zakaat Adah Karo
( Tirmizi Kitabul Zakaat  Jild: 2 Page: 132 )

                  MAS-ALA


Sona Chandi Jab Ki Ba Qadre Nisaab Hon Toh In Ki Zakaat Chaliswan Hissa Nikalni Farz Hai

Khwah Sone Chandi Ke Tukde Hon Ya Sikke Ya Zewrat

Ya Sone Chandi Ki Bani Hui Chizein Maslan

Bartan Ghadi Surma Dani Salai Waghairah

Gharaz Jo Kuch Ho Sab Ki Zakaat Nikalni Farz Hai

                  MAS-ALA


Jin Zewraat Ki Malik Aurat Ho Khwah Woh Maike Se Lai Ho

Ya Us Ke Shauhar Ne Us Ko Zewraat Dekar In Ka Malik Bana Diya Ho

Toh Inki Zakaat Adah Karna Aurat Par Farz Hai

Aur Jab Zewraat Ka Malik Mard Ho

Yani Aurat Ko Sirf Pahanne Ke Liye Diya Hai Malik Nahin Banaya Hai

Toh In Zewraat Ki Zakaat Mard Ke Zimme Hai
Aurat Par Nahin


                  MAS-ALA


Agar Kisi Ke Pas Sona Chandi Ya In Donon Ke Zewraat Hon

Aur Sona Chandi Mein Se Koi Bhi Ba Qadre Nahin

Toh Chahiye Ki Sone Ki Qeemat Ke Chandi

Ya Chandi Ki Qeemat Ka Sona Farz Kar Ke Donon Ko Milayen

Fir Agar Milane Par Bhi Ba Qadre Nisaab Na Ho Toh Zakaat Nahin

Aur Agar Sone Ki Qeemat Ki Chandi Chandi Mein Milayen

Toh Ba Qadre Nisaab Ho Jata Hai

Aur Chandi Ki Qeemat Ka Sona Sone Mein Milayen

Toh Ba Qadre Nisaab Nahin Toh Wajib Hai Ki Jis Surat Mein Nisaab Pura Ho Jata Hai Woh Karein


                   MAS-ALA


Tijarati Maal Ki Qeemat Lagayi Jaye Fir Us Se Agar Sone Ya Chandi Ka Nisaab Pura Ho Toh Us Ke Hisab Se Zakaat Nikali Jaye

                 MAS-ALA


Agar Sona Chandi Na Ho

Na Maale Tijarat Ho Balki Sirf Note Aur Rupae Paise Hon

Ki Kam Se Kam Itne Rupae Paise Hon Ki

Bazar Mein In Se Sadhe Saat Tolah Sona

Ya Sadhe Bawan Tolah Chandi Kharidi Ja Sakti Hai

To Woh Shakhs Sahibe Nisaab Hai

Usko Note Aur Rupae Paison Ki Zakaat ( Chaliswan Hissa ) Nikalna Farz Hai



                   MAS-ALA

Agar Shurua Saal Mein Pura Nisaab Tha

Aur Akhir Saal Mein Bhi Nisaab Pura Raha

Darmiyan Mein Kuch Dinon Maal Ghat Kar Nisaab Se Kam Rah Gaya

Toh Yeh Kami Kuch Asar Na Karegi

Balki Is Ko Pure Maal Ki Zakaat Deni Padegi


Ye bhi Padhen  ↓ ↓ ↓ ↓ ↓ ↓
 ° Namaz Ke MasaiL
° Ramzano ke MasaiL
° Nikah Ke Masail
° Auraton Ke MasaiL

ZAKAAT KA MAAL KIN KIN LOGON KO DIYA JAYE 

Jin Logon Ko Ushr Wa Zakaat Ka Maal Dena Jayez Hai Woh Yeh Log Hain

( 1 ) Faqeer Yani Woh Shakhs KI Us Ke Paas Kuch Maal Hai

Magar Nisab Ki Miqdar Se Kaam Hai


( 2 )Mishkin Yani Woh Shakhs Jis Ke Paas Khane Ke Liye Galla Aur Pahanne Ke Liye Kapda Bhi Na Ho

( 3 ) Qarzdar Yani Woh Shakhs Ki Jiske Zimme Qarz Ho

Aur Us Ke Paas Qarz Se Fazil Koi Maal Ba Qadre Nisab Na Ho

( 4 ) Musafir Jiske Pass Safar Ki Halat Mein Maal Na Raha Ho

Us Ko Ba Qadre Zarurat Zakaat Ka Maal Dena Jayez Hai

( 5 ) Aamil Yani Jisko Badshahe Islaam Ne Zakaat Wa Ushr Wasool Karne Ke Liye Muqarrar Kiya Ho

( 6 ) Mukatab Ghulam Taki Woh  Maal Dekar Azad Ho Jaye

( 7 ) Ghareeb Mujahid Taki Woh Jihaad Ka Saman Kare
( Fatawah Hindiyah Kitabul Zakaat )



Ye bhi Padhen  ↓ ↓ ↓ ↓ ↓ ↓
 ° Eimaan-Wa-Aqeede-Se-Zyada-Amal-Ko Ahmiyat Dena
° FILMi GAANON ME KUFRIYAAT
° Allah-Taala-ko-Upar-Wala-kehna-kaisa-hai

KIN-KIN LOGON KO ZAKAAT
KA MAAL DENA MANA HAI

Jin Logon Ko Ushr Wa  Zakaat Ka Maal Dena Jayez Nahin Un Mein Se Chand Ye Hain


( 1 ) Maaldar Yani Sahibe Nisaab Jis Par Khud Zakaat Farz Hai Usko Zakaat Ka Maal Jayez Nahin

( 2 ) Bani Hashim Yani Hazrate Ali Hazrate Jafar

Hazrate Aqeel Hazrate Abbas Harish Bin Abdul Muttalib

Ki Aulaad Ko Zakaat Ka Maal Dena Jayez Nahin
( Fatawah Hindiyah Kitabul Zakaat )

( 3 ) Apni Asal Wa Furu-a Yani Maa Baap,Dada,Dadi Nana,Nani Waghairah

Aur Beta Beti Pota Poti Nawasa Nawasi Ko Zakaat Ka Maal Dena Jayez Nahin

( 4 ) Shauhar Apni Aurat Ko Aur Aurat Apne Shauhar Ko Apni Zakaat Nahin De Sakte

Yun Hi Sadqae Fitr Aur Qaffarah Bhi In Logon Ko Nahin De Sakta

( 5 ) Maaldar Ke Nabaligh Bachchey Ko Zakaat Nahin Di Ja Sakti

Aur Maaldar Ki Baligh Aulaad Jab Ki Woh Nisab Ke Malik Na Hon

Un Ko Zakaat De Sakte Hain

( 6 ) Kisi Kafir Wa Murtad Ya Bad Mazhab Ko Zakaat Ka Maal Dena Jayez Nahin




                  MAS-ALA

Bahu Damad Aur Sauteli Maa Ya Sautela Baap

Ya Bivi Ki Aulad Jo Dusre Shauhar Se Hon

Ya Shauhar Ki Aulad Jo Dusri Biwi Se Hon

Aur Dusre Rishte Daron Ko Zakaat De Sakte Hain
( Radul Muhtar Kitabul Zakaat )


                  MAS-ALA

Maaldar Ki Biwi Agar Woh Malike Nisaab Nahin Hai Toh Us Ko Zakaat De Sakte Hain
( Fatawah Hindiya Kitabul Zakaat )


                  MAS-ALA

Tandrust Aur Taqat War Aadmi Agar Woh Malike Nisaab Nahin Hai

Toh Usko Zakaat Dena Jayez Hai

Magar Usko Sawal Karna Aur Bhik Mangna Jayez Nahin
( Fatawah Hindiya Kitabul Zakaat )


                  MAS-ALA


Zakaat Ada Karne Mein Yeh Zaruri Hai Ki Jise Dein Usko Malik Bana Dein

Is Liye Agar Zakaat Ki Raqam Se Khana Paka Kar

Gharibon Ko Bataure Dawat Ke Khila Diya Toh Zakaat Ada Na Hui

Kyunki Yeh Ibahat Hui Tamlik Nahin Hui

Han Agar Khana Paka Kar Fakiron Ko Khana De

Aur In Ko Is Khane Ka Malik Bana De Ki Woh Chahe Is Ko

Khaen Ya Kisi Ko De Dein Ya Bech Dalein Toh Zakaat Ada Ho Gai
( Durre Mukhtar Radul Muhtar Kitabul Zakaat )



Ye bhi Padhen  ↓ ↓ ↓ ↓ ↓ ↓
 ° CHAAND-DEKHNE-KA-BAYAN
° Radio-Taar-Telephon-ki-Khabar-Par-Chand Maan lena kaisa
° Eid-Ki-Namaz Ka Mukammal Tareeqa
° Eid-Ke-Baad-6-Roze-Rakhne Ka Sawab

KIN KIN LOGON KO ZAKAAT KA MAAL DENA MANA HAI

                  MAS-ALA

Zakaat Ka Maal Masjid Ya Madarse Ya Mehmaan Khane Ki Imarat Mein Lagana

Ya Maiyat Ke Kafan Dafan Mein Lagana

Ya Kunwan ( Well ) Banwa Dena

Ya Kitabein Khareed Kar Kisi Madarse Mein Waqf ( Donate ) Kar Dena

Is Se Zakaat Ada Nahin Hogi

Jab Tak Kisi Aise Aadmi Ko Maale Zakaat Ka Malik Na Bana De

Jo Zakaat Lene Ka Ahal Hai Us Waqt Tak Zakaat Ada Nahin Ho Sakti
( Durre Mukhtar Radul Muhtar Kitabul Zakaat )


                   MAS-ALA


Faqeer Zakaat Ke Maal Ka Malik Ho Jane Ke Baad

Khud Apni Taraf Se Agar Masjid Wa Madarse Ki Imarat Mein Laga De

Ya Maiyat Ke Kafan Dafan Mein Sarf Kar De Toh Jayez Hai
( Durre Mukhtar Kitabul Zakaat )



QAABILE TAWAJJOH TAMBIH


Aaj Kal Aam Taur Par Dini Madaris Mein Yeh Chalan Hai Ki

Atiyat Aur Sadqaat Wa Khairat Wa Charme Qurbani

Aur Zakaat Ki Sab Raqmein Mutwalli Ya Nazim Ke Pas Jama Ki Jati Hain

Aur Nazim Wa Mutwalli In Sab Raqmon Ko Mila Kar Rakhte Hain

Aur Isi Raqam Mein Se Talbaa Kaatbakh Bhi Chalate Hain

Aur Mudarrisin Wa Mulazimin Ko Tankhwahein Bhi Dete Hain

Aur Waizin Wa Mumtahinin Ka Nazrana Bhi Dete Hain

Aur Masjid Wa Madarse Ki Imarat Bhi Banwate Hain

Aur Apne Masarif Mein Bhi Late Hain

Yaad Rakho Ki Is Tarah Na Toh Zakaat Dene Walon Ki Zakaat Ada Hoti Hai

Na In Kamon Mein Zakaat Ki Raqamon Ko Lagana Jayez Hai

Aur Yeh Mutwalliyon Aur Nazimon Ki Bahut Badi Khayanat Hai

Ki Woh Logon Ki Zakaat Ke Maalon Ko Sahih Masraf Mein Sarf Nahin Karte

Aur Gunahgar Hote Hain

Lihaza Ulemaye Kiram Par Shar-an Wajib Hai Ki Mutwalliyon Aur Nazimon Ko Yeh Mas-ala Bata Dein

Ki Madaris Mein Jitni Raqmein Zakaat Ki Aati Hain

Pahle In Raqmon Ka Hilae Sharaiyah Kar Lena Zaruri Hai

Taki Zakaat Dene Walon Ki Zakaat Ada Ho Jaye

Aur Fir In Raqmon Ko Madarse K Jis Kaam Mein Chahe Kharch Kar Sakein

                  MAS-ALA

Hilae Sharaiya Ka Tariqa Yeh Hai Ki

Zakaat Ki Raqmon Ko Alag Karke Kisi Talibe Ilm Ko Jo Ghareeb Ho De Dein

Aur Un Raqmon Ka Us Talibe Ilm Ko Malik Bana Diya Jaye

Aur Fir Woh Talibe Ilm Apni Taraf Se Woh Raqam Madarse Mein Apni Khushi Se De De

Is Tarah Kar Lene Se Zakaat Dene Walon Ki Zakaat Ada Ho Jayegi

Aur Fir Woh Raqam Madarse Ki Har Madd Mein Kharch Ki Ja Sakegi




                   MAS-ALA

Zakaat Wa Sadqaat Mein afzal Yeh Hai Ki Pahle

Apne Bhaiyon Chachaun Fufiyon Ko Fir In Ki Aulad Ko

Fir Apne Mamuon Aur Khalaon Ko Fir In Ki Aulad Ko

Fir Dusre Rishte Daron Ko

Fir Padosiyon Ko

Fir Apne Peshey Walon Ko

Fir Apne Shahar Aur Gawon Walon Ko Dein

Aur Ilme Deen Hasil Karne Wale Talibe Ilmon Ko Bhi Dena Afzal Hai
( Fatawah Hindiyah Kitabul Zakaata)



Join Free SmS Service On Mobile

USHR KE MASAIL

Zameen Se Jo Bhi Paida War Ho

Jaise Gehun Jau Chana Bajra Dhaan Waghairah Har Kism Ke Anaj

Gannah Rui Har Qism Ki Tarkariyan Phool Fal Mewe

Sab Mein ushr Wajib Hai

Thodi Paida Ho Ya Zyadah
( Alfatawah Ul Khaniyah Kitabul Zakaat Fil ashr J: 1 S:  132 )


                  MAS-ALA

Jo Paidawar Barish Ya Zameen Ki Nami Se Paida Ho Us Mein Daswan Hissa Wajib Hota Hai

Aur Jo Paidawar Char Se Dol Pumping Machine Ya Tube Well Waghairah Ke Pani Se

Ya Kharide Hue Pani Se Paida Ho Us Mein Biswan Hissa Wajib Hai
( Durre Mukhtar Kitabul Zakaat )


                  MAS-ALA


Kheti Ke Akhrajat Nikal Kar Ushr Nahin Nikala Jayega

Balki Jo Kuch Paidawar Hui Ho Un Sab Ka Ushr Ya Nisf Ushr Dena Wajib Hai

GowernMent Ko Malghuzari Di Jati Hai

Woh Bhi Ushr Ki Raqam Se Mujra-a Nahin Ki jayegi

Puri Paidawar Ka Ushr Ya Nisf Ushr Khuda Ki Raah Mein Nikalna Padega
( Durre Mukhtar Kitabul Zakaat )


                   MAS-ALA


Zameen Agar Bataai Par De Kar Kheti Karai Hai Toh Zameen Wale Aur Kheti Karne Wale

Donon Ko Jitni Jitni Paidawar Mili Hai Donon Ko

Apne Apne Hisse Ki Paidawar Ka Daswan Hissa Ya Biswan Hissa Nikalna Wajib Hai
( Fatawah Khaniyah Kitabul Zakaat)



Maalike Nisaab kise kehte hain? 

Maalike nisaab wo shakhs Kehlata hai
jiske Pas itni Rakam ya zevar ho
jispar Zakaat Waajib hoti hai
jiski mikdar
7 Tola sona Ya 52.5 tola chandi
ho ya Chandi ke Barabar Qeemat
ho
Yaad Rahe Agar Apke pas 2 Gram
bhi sona hai aur kuchh Paise hai
Jinki Qeemat milakar 52.5 Tola chandi ke barabar hoti hai to
Wo bhi Naalike Nisaab Kelata hai
Aur Zakaat bhi Adaa karna Uspar Waajib hai
Chandi ki Qeemat Nayi ki Nahi purani ke Hisaab se Lagayi
Jaegi Aap Sunar dukan par
Rate Maloom karle ki kis Rate me Puraani
Chandi le Rahe hai wo



     
Hajaate Asliya Kise Kehte hain ?

Hajaate Asliya wo ghar ka samaan kehlaata hai
jisko hum Apne istemal me lete hai
jisko hum bechne ki niyat se nahi kharidte jo
Hanari Zarurat ka Samaan hota hai
Jaise Car, cycle, Rehne ka Ghar
Baratne ke Samaan khane Banane ke bartan
Aur bhi Saari Aisi chizi jinko hum
Apne Ghar me istemal me Laate hai
wo Hajaate Asliya Kehlate hai
inpar zakaat nahi hoti


Zakaat Ke Masail ko Aur Zyada Tafseel se Janne Ke Liye
Ye 2 Speech Zaroor Sune

Short Clip  ↓ ↓ ↓ ↓ ↓ ↓
 ° ZAKAAT KE MASAIL.mp3

Full Clip  ↓ ↓ ↓ ↓ ↓ ↓
 ° ZAKAAT KE MASAIL.mp3

New Message Apke Email Par Paane Ke Liye Subscribe Karen
Uske baad Apki Email Check kare Ek msg Ayega Uspar Click Kerke
Conform Karen Fir Apko Message Milna Shuru
Hojayenge


Aapko hamari Post kaise lagti
hai Comment box me Zaroor likhe
aur Is Post ko Like Share Karna Na bhoole

For More Msgs Click This Link
            www.diniraah.in
 
Baraye Karam Is Paigham ko Share kijiye
ALLAH Apko iska Ajar-e-Azeem Zaroor dega AAMEEN

●●►jazakALLAH khairan◄●●

╠aa ♥ PLEASE SHARE ♥ ╣