Hazrat Nizaam-ud-deen Auliya

Hazrat Nizaam-ud-deen Auliya


​Hazrat Nizaam-ud-deen Auliya

rahmatullāhi alaihi :
Alqaab :
‾‾‾‾‾‾‾‾‾‾
Mehboob-e-Ilāhi, Sultaan-ul-Mashaa'ikh, Qutb-e-Delhi, Dastageer-e-Do Jahaan. 
**********
Aap ki wilaadat 27 Safar 636  Hijri (19 October 1238 A.D.) ko Badayun (Uttar Pradesh) me hui.
Aap ke waalid ka naam Hazrat Ahmad Badayuni ibn Ali Daanyaal rahmatullāhi alaihi aur waalida ka naam Bibi Zulaikha bint Hazrat Arab hai.
Aap Husaini saadaat hain.
**********
Aap ki umr jab 5 saal ki thi tab aap ke waalid ka inteqaal ho gaya.
Bachpan me kai baar saamaan na hone ki wajah se aap ke ghar me khaana nahi pakaaya jaata tha. Tab aap ki waalida aap ko kehti thi ‘Bete! Aaj hum ALLAH ta’ala ke mehmaan hai. Is liye jab wo hume khaana dega tab hi hum khaayenge.’
Is ke baad aap ki waalida ne taaleem ke liye aap ko madrasa me rakha. Jaha aap ne Maulana Ala-ud-deen Usooli Badayuni, Khwaja Shams-ul-Malik aur Maulana Kamaal-ud-deen‎ Zaahid rahmatullāhi alaihi se Qur’an, Hadees, Tafseer, Fiqh aur dusre uloomo ki taaleem haasil ki.
Aap Qir’at ki 7 qism ke maahir hue.
Aap ko Sanad e Fazeelat ata ki gai.
**********
Abu Bakr naami ek shakhs se Baba Fareed rahmatullāhi alaihi ki ta’areef sunkar aap ko un ki ziyarat ki khwaahish hui.
18 baras ki umr me aap Musamma Ayuz rahmatullāhi alaihi ke saath Badayun se Delhi ja rahe the. Raaste me koi bhi pareshaani ya khuaf paish aata to Ayuz apne peer ke waseele se istegaasah karte. Jab aap ko pata chala ke wo peer Baba Fareed hi hain to aap ko un ki ziyarat ki khwaahish aur zyada hone lagi.
Delhi pahunchkar biradar e Baaba Fareed Hazrat Najib-ud-deen Mutawakkil se aap ki mulaaqat hui aur un ki sohbat aur khidmat me rehne ka sharf haasil hua.
Aakhir me 11 Rajab 655 Hijri (1257 A.D.) me 20 saal ki umr me aap Ajodhan (Pakpattan) pahunche aur Hazrat Baba Fareed rahmatullāhi alaihi ke mureed hue.
2 Rabi’-ul awwal 656 Hijri (1258 A.D.) ko Hazrat Baba Fareed-ud-deen Mas'ood Ganje-shakar Chishti rahmatullāhi alaihi ne aap ko khilaafat ata farmaai.
Aap har saal Ajodhan aakar Maah e Ramazaan apne Peer ki baargaah me guzaarte. Is tarah aap Baba Fareed ke wisaal se pehle 3 saal tak Ajodhan aate rahe.
**********
Aap ne Delhi ke qareeb Ghyaspur me apni khaanqaah banai. Shaher ke shor o gul se door sukoon waali is jagah me har tabke ke log aakar faiz haasil karte the.
Aap roz Roza rakhte the. Saheri ke waqt khaane ki jo cheez maujood ho use sirf thoda sa chakh lete the aur din me sirf  ek baar Iftaar ke waqt khaana khaate the.
Aap zyada waqt ibaadat aur riyaazat me guzaarte.
80 saal ki umr tak aap ne tamaam panjgaana namaaz ba-jama’at ada farmaai.
**********************
Aap 8wi sadi ke Mujaddid e Islaam hain.
Aap logo ko hamesha Sunnat e Rasool ki taaleem dete the.
Jab log sunnat e rasool ko bhul rahe the aur shariat se door ho rahe the tab aap ne logo ko Islaam ki sahi taaleem dekar islaam ke qareeb kiya.
Aap ke faiz se bahot saare logo ne islaam apnaaya aur bahot saare logo ko hidaayat mili aur unho ne sahi raah ko apnaaya.
Aap din me 2 baar namaaz e Ishraaq ke baad Zohar tak aur Qailula ke baad Asr tak Jama’at-khaana me majlis me taaleeme deen karte, aane waalo ke sawaalo ke jawaab dete aur haajatmando ki imdaad farmaate.
**********
Karamaat :
‾‾‾‾‾‾‾‾‾‾‾‾‾
(1) Aap ke ek mureed Hazrat Maulana Wajih-ud-deen ko T.B. ki beemaari ho gai. Jab beemaari bahot zyada badhne lagi to dosto ne aap ko Khwaja Nizaam-ud-deen ki khaanqaah me jaane ka mashware diya. Wo maghrib ke waqt khaanqaah me pahunche. Itne me aap ka ek mureed methi ke laddoo lekar aaya. Aap ne Maulana Wajih-ud-deen ko bhi khaane ke liye kaha. Unho ne khushi ke saath wo laddoo khaaye. Us ke baad ALLĀH ta’ala ke karam se un ki beemaari door ho gai aur phir kabhi un ko wo beemaari nahi hui.
(2) Ek baar Sarsava ke jaagirdaar ki haweli me aag lagne ki wajah se shaahi farmaan (document) jal gaya. Us ne Delhi jaakar bahut mushkil se wo shaahi farmaan phir se haasil kiya. Wapas aate waqt raste me wo farman bhi us se kahi kho gaya. Wo bahut gamzada hokar Khwaja Nizaam-ud-deen ki baargah me aaya aur sandook me rakhi hui us farmaan ki khaak dikhkar ilteja ki ke wo farmaan mujhe waapis dila den.
Aap ne use baazaar me se kuchh meethai laakar Faatiha khwaani (Nyaaz) karke aap ke peer ko isaal e sawaab karne ke liye kaha. Us ne halwaai ki dukan par jaakar meethaai kharidi aur jab us ne us kaagaz ko phadkar tukda karna chaaha jis me meethaai rakhi thi tab halwaai ne use roka aur kaha ke jis tarah main de raha hu waise hi le jaao. Jab wo Khwaja Nizaam-ud-deen ki baargaah me pahuncha aur us meethaai ke packet ko khola to usne dekha ke wo kaagaz hi us ka khoya hua shaahi farmaan tha.
Wo khwaja ke kadmo me gir gaya aur khush hokar apne ghar ki taraf laut gaya.
(3) Ek martaba ek shakhs Khwaja Nizaam-ud-deen se mulaaqat ke liye haazir hua. Us ke haath me paiso ki ek thaili thi. Hazrat us waqt wuzu farmaakar khade hi hue the. Wo shakhs aap ke paas aaya aur kaha ke ‘Hazrat! Ye kuchh paise hai. In ko main aap ke madrase me batore hadiya dena chaahta hu.’
Hazrat ne us thaili me se sirf ek paisa liya aur puri thaili us shakhs ko waapas kar di aur farmaaya ‘Hamare liye itna hi kaafi hai baaqi paiso ko tum apne ghar ke kaam me istemaal karna.’
Jab aap ne us shakhs ko wo thaili waapas ki to us ne bade guroor Aur takabbur ke saath kaha ‘Hazrat! puri thaili le lijiye. Waise bhi hum jaise maaldaro ki wajah se aap ke madarse chalte hai.’
Itna sunna tha ke Hazrat ko jalaal aaya aur aap ne us ko farmaaya ‘Naadan jab tu khuda ka zikr Kama haqqahu nahi karta phir bhi tere paas itna maal hai to Hamare madrsase me to din raat ALLĀH ka zikr hota hai hamare paas kitna maal hoga.’ Phir aap ne us ko kaha ‘Is paani ke hauz ki taraf dekh.’ Jab us ne hauz ki taraf dekha to behosh hokar gir pada.
Jab use hosh aaya to logo ne puchha ke ‘Kya ma’amla hai? Tum hauz ko dekhkar behosh kyun ho gaye?’ To us ne jawaab diya ‘Jab Hazrat ne mujhe hauz ki taraf dekhne ko kaha to maine dekha ke pura hauz paani ki jagah dirham o deenaar se bhara hua tha us ko dekhkar main behosh ho gaya.’
(4) Ek baar Baadshaah  Tughlaq ne elaan kara diya ke ‘Koi bhi dukaandaar Khwaja Nizaam-ud-deen ke khaadimo ko koi cheez na beche. Phir main dekhta hu ke un ko langar ke liye khaana kaha se milta hai?’
Jab Khwaja Fareed-ud-deen Ganje-shakar Chishti ke urs mubarak ka mauqa aaya to Hazrat ne logo ko daawat di aur mehfil e samaa aarasta kiya. 
Jab majlis puri hui to chand kashtiya Yamuna nadi me namoodaar hui jin me tarah tarah ke khaano se bhari hui thaaliya thi. Wo kashtiya khud ba khud Khaanqaah ke paas aakar lag gai. Khwaja Nizaam-ud-deen ne Khwaja Iqbaal saahab se farmaaya ‘Is khaane ko laao aur mehfil me taqseem kar do.’
Unho ne khaane ko majlis me taqseem kar diya. Aur chand thaaliya Baadshaah ko bhijwaai gai. Baadshaah ne jab us khaane ko chakha to mehsoos kiya ke Apni puri zindagi me itna behtareen khaana chakha bhi nahi aur dekha bhi nahi. Wo apni harkat par bahot sharminda hua.
(5) Ek baar Khwaja Nizaam-ud-deen Auliya ne apne khas mureedo ke liye Mehfil e Sama munaaqid ki. Jis me 50-60 mureedo ke bajaay hazaaro ki ta’adaad me log jama ho gaye. Hazrat ki khaanqaah ka qaanoon tha ke mehfil me aane wale sab khaana khaakar hi jaate the.
Khwaja ne apne khaadimo se farmaaya sab logo ko haath dhulaane ke baad logo ko 10 ki saf me khaana khaane ke liye bithaaya jaae. Aur sab ko roti ke 4 hisse karke Bismillāh padhkar khaane liye diya jaaye.
Khaadim ne aap ke hukm ke mutaabik kiya aur ALLĀH ke karam se sab logo ne pet bharkar khana khaa liya aur phir bhi khaana baaqi raha.
(6) Ek martaba Ala-ud-deen Hasan Bahman aap ki baargaah par me aaye. Us waqt Sultaan Mohammad Tughlaq Khwaaja ki baargaah se khaana khaakar bahar aa raha tha. Khwaja ne farmaaya ke ‘Ek baadshaah jaa raha hai aur dusra aa raha hai.’ Ye baat waha maujood logo ki samajh me nahi aai. Aap ne ek shakhs ko darwaaze par khade saa'il ko andar lane ke liye farmaaya.
Ala-ud-deen Hasan Bahman andar aaye to khaana khatm ho chukka tha. Sirf Hazrat ke iftaar ke liye ek roti bachi thi. Khwaja ne us roti ko apni ungali par rakhkar farmaaya ‘Aye Hasan! Dekho, ye tumhari aane wali riyaasat ka shaahi chhatar hai, jo kuchh waqt baad tumhe milne waali hai.’
Aap ki dua se aahista aahista un ki qismat badalne lagi aur aap ‘Bahmani’ saltanat ke baadshaah bane.
Baadshaah banne ke saath foran Sultaan Ala-ud-deen Hasan Bahman ne Khwaja ke Khalifa Hazrat Burhaan-ud-deen Ghareeb rahmatullāhi alaihi ko 5 man sona aur 10 man chaandi bheja aur Khawaja ke naam se gareebo miskino me taqseem karke khairaat karne ke liye kaha.
(7) Khwaja Nizaam-ud-deen Auliya ne apne mureed aur khalifa Shaah Muntajeeb-ud-deen ko 1400 durwesho ke saath isha’at e islaam ke liye Delhi se Daulatabad jaane ke liye farmaaya. Shaah Muntajeeb-ud-deen us ke liye tayyar ho gaye. Magar jab un ko ye khayaal aaya ke Peer ne in 1400 durwesho ki zimmedari mujhe di hai magar is taweel safar me in sab ki zaroorato ke liye kharch ka intazaam kaise hoga? Unho ne Khwaja Nizaam-ud-deen Auliya ki baargaah me jaakar arz kiya. Khwaja ne un ko tahajjud ke waqt aane ke liye farmaaya. Tahajjud ke waqt jab wo aap ki khidmat me haazir hue to aap ne un ko sone se bhara hua baksa aap ko diya jo ghaib se ata kiya gaya tha. Is sone ko Shaah Muntajeeb-ud-deen ne safar me 1400 durwesho zaroorat ke liye istemaal kiya. Is waqye ke baad Shaah Muntajeeb-ud-deen  ‘Zar Zari Zar Baksh’ (The giver of the essence of gold) ke naam se mash'hoor ho gaye.
(8) Ek martaba ek shakhs Khwaja Nizaam-ud-deen Auliya ki baargaah me aaya aur arz karne laga ke “Huzoor! Main bahot ghareeb aur bekas hu. Mujh par karam farmaaiye aur kuchh inaayat farmaaiye.” Hazrat ne us par raham farmaate hue kaha ke “Thodi mitti uthaakar mujhe de.” Us ne Aap ko mitti di to Aap ne us mitti par 3 martaba Surah Ikhlaas padhkar dam kiya to mitti Sona ban gai. 
Wo shakhs khush hota hua apne ghar ki jaanib chala. Raaste me us ke dil me khayaal aaya ke ‘Mujhe to Sona banaane ka tareeqa mil gaya hai. Apne ghar pahunch kar us shakhs ne bahot bada mitti ka dher jama kiya aur us par Surah Ikhlaas padh kar dam kiya lekin kuchh na hua. 
Wo saari raat baithkar mitti par padhkar ke phunkta raha lekin mitti me maamooli chamak bhi paida na hui.
Subah ko wo shakhs Khwaja Nizaam-ud-deen Auliya ki khidmat me pahuncha aur raat ka saara waaqia bayaan kiya. 
Aap ne us shakhs ko kaha ke “Beshak Qur’an me ye taaseer hai. Magar Naadan Sirf mere jaisi harkat karne se kaam nahi hoga. Mere jaisi zabaan bhi paida karni hogi.
(9) Ek baar aap ke mureedo ka ek giroh aap ki khidmat me haazir hone ke liye aa raha tha. Sab kuchh meethaai (sheerni) apne saath le jaa rahe the. Un ke saath ek shakhs aisa maanta tha ke ye faqeer kya kar sakte hain. Sab ke samjhaane par bhi wo sahi baat maan nahi raha tha. Us ne thodi dhool lekar kaagaz me bandhkar apne saath  li.
Hazrat ki baargaah me pahunchkar sab ne adab ke saath apna nazraana aap ke paas rakh diya. Aap ka khaadim wo sab andar rakhne ke liye lene laga tab aap ne us dhool wala packet wahi par rakhne ke liye kaha aur farmaaya ke ‘Main is dhool ko apni aankho ke liye istemaal karunga.’
Ye sunkar wo shakhs sharminda ho gaya aur foran aap ka mureed ban gaya.
(10) Ek martaba ek shakhs Khwaja Nizaam-ud-deen Auliya khidmat me khaana lek raha tha. Raaste me us ke dil me khayaal aaya ke “Kaash agar Sarkaar apne haath se mere munh me niwaala rakhen to mere liye kitni khushnaseebi hogi.”
Jab wo shakhs Hazrat ki khidmat me pahuncha to dastarkhwaan bichh chuka tha aur Hazrat us waqt paan khaa rahe the. Aap ne apne munh se thoda paan nikaala aur us shakhs ko apne mubarak haatho se khilaate hue farmaaya “Lo, Ye khaalo. Ye us niwaale se behtar hai jo tum dil me soch rahe the.”
(11) Shams-ud-deen naami ek ameer shakhs Khwaja ke baare me buri baate karta tha.
Ek baar wo apne dosto ke saath sharaab pee raha tha. Itne me use mehsoos hua ke Khwaja Nizaam-ud-deen ishaare se use sharaab peene se rok rahe hain. Shams-ud-deen ne foran sharaab ko phenk diya aur gusl karke Hazrat ki khaanqaah par pahuncha.
Use dekhkar Khwaja ne farmaaya ‘Jin par ALLĀH ka karam hota hai wo aisi haraam cheezo se door rehte hain.’
Ye sunkar wo muafi maangkar Hazrat ka mureed ban gaya aur apna sab maal ghareebo masakino me khairaat kar diya.
Aap ki dua se ALLĀH ta’ala ne us ko wilaayat ata farmai.
(12) Sultaan Ala-ud-deen Khilji Aap ka bahot motaqeed tha. Us ne apne bete Khizr Khan ko kai baar bheja ke “Huzoor! Mere kaashaane me tashreef laaya karen ke us me meri sa’adat hai.” Aap ne jawaab diya ke “Main ek goshe me pada hua hu. Tera kuchh bigaad nahi raha. Baadshaah aur tamaam muslamano ke liye Dua e khair karta rehta hu. Agar baadshaah ne israar kiya to main Dehli se chala jaaunga.”
Sultaan Ala-ud-deen Khilji ne khud aane ka iraada kiya to Aap ne farmaaya ke “Us ki bhi koi zaroorat nahi main yahi se masroofe dua hu, balke ghaib ki dua zyada museer hoti hai. Agar Baadshaah ek darwaaze se aaya to main dusre darwaaze se nikal jaaunga.”
Ek martaba Changezi lashkar ne Dehli ko aakar yakaayak gher liya to Sultaan bahot pareshaan tha kyun ke us ka tamaam lashkar Daarus Saltanat se baahar tha. Us ne Hazrat se dua ke liye arz ki. Aap ne dua darmai to raat ko khud ba khud ganeem ke lashkar par haibat chha gai, Khauf taari hua aur wo muhaasira chhod kar bhaag nikle.
(13) Sultaan Ghyaṡ-ud-deen Tughlaq Khwaja Nizaam-ud-deen Auliya se dili adaawat rakhta tha. 724 Hijri (1324 A.D.) me wo Dehli se Lakhnouti (Bengal) gaya hua tha. Waapsi par raaste me us ne kaha ke ‘Dehli pahunch kar Nizaam-ud-deen Auliya ko Dehli se nikaal dunga.’
Kisi ne aakar Hazrat ko is baat ki khabar di. Aap ne farmaaya ke ‘Hanooz Dilho door ast (Abhi Delhi door hai).
Safar 725 Hijri (February 1325 A.D.) me jab Sultaan Ghyaṡ-ud-deen Tughlaq Dehli se 2-3 kos door Tughlaqabad me thehra aur iraada kiya ke Hazrat ko yahi talab karunga. Magar usi raat me shamiana (Tent) tootkar girne ki wajah se apne shehzaade Mahmood Khan samet maara gaya.
**********
Aqwaal :
‾‾‾‾‾‾‾‾‾‾
(1) Halaal tareeqe se haasil kiya gaya thoda sa rizq haraam tareeqe se haasil kiye gaye rizq se zyada qalb ko munawwar karta hai.
(2) Har cheez ki Zakaat hoti hai. Aur ilm ki zakaat us par amal karna hai.
(3) Neko ki sohbat nek kaam se achhi hai  aur buro ki sohbat bure kaam se buri hai.
(4) Rab ki mohabbat aur dunya ki mohabbat ek saath nahi reh sakti.
(5) Har kaam me imaandaari hi hamesha ke liye izzat deti hai.
(6) Jise dekho use apne se behtar samjho, agarche tum ita’at guzaar ho aur who gunaahgaar ho. Ho sakta hai ke ye tumhari aakhri ita’at ho aur us ka aakhri gunaah ho aur wo neko kaar baan jaaye.
**********
Aap ne nikaah nahi kiya tha aur aap ne apne bhatije Hazrat Ibrāheem ibn Jamaal-ud-deen rahmatullāhi alaihi (Chandpura [Bihar]) ko apna waaris banaaya aur un ki nasl me bahot saare Sufi auliya mash'hoor hain.
**********
Hazrat Baaba Fareed-ud-deen Mas'ood Ganje-shakar Chishti rahmatullāhi alaihi ke mureed aur khalifa hain.
Aap se tareeqat ka ‘Chishti Nizaami’ silsila jaari hai.
Aap ke khulfa :
Hazrat Khwaja Yameen-ud-deen Ameer Khusro rahmatullāhi alaihi,
Hazrat Khwaja Naseer-ud-deen Muhammad Chiraag e Delhi rahmatullāhi alaihi (Delhi),
Hazrat Maulana Wajeeh-ud-deen Yousuf rahmatullāhi alaihi,
Hazrat Khwaja Shams-ud-deen Yahyā rahmatullaāhi alaihi,
Hazrat Khawja Ala-ud-deen Neeli rahmatullāhi alaihi,
Hazrat Khwaja Abu Bakr Chishti rahmatullāhi alaihi,
Hazrat Khwaja Fakhr-ud-deen Zaraadi rahmatullāhi alaihi (Delhi);
Hazrat Khwaja Siraaj-ud-deen Usmaan urfe Akhi Siraaj Aaina-e-Hind rahmatullāhi alaihi (Gaur [Bengal]);
Hazrat Khwaja Nizaam-ud-deen Maghribi rahmatullāhi alaihi (Bihar);
Hazrat Shaikh Sharaf-ud-deen Bu Ali Shaah Qalandar rahmatullāhi alaihi (Panipat [Haryana]);
Hazrat Shaikh Qutb-ud-deen Munawwar rahmatullāhi alaihi (Hansi [Haryana]),
Hazrat Khwaja Maulana Moosā rahmatullāhi alaihi (Punjab),
Hazrat Khwaja Ahmad Hankori rahmatullaāhi alaihi (Ahmedabad [Gujarat]),
Hazrat Khwaja Baarakullāh Chishti rahmatullāhi alaihi (Ahmedabad [Gujarat]), 
Hazrat Husaam-ud-deen Multani rahmatullāhi alaihi (Patan [Gujarat]),
Hazrat Sayyed Hasan Khateeb Urfe Shaah Baaba rahmatullāhi alaihi (Dholka [Gujarat]),
Hazrat Shaah Wilaayat rahmatullaāhi alaihi (Gujarat)
Hazrat Khwaja Burhaan-ud-deen Ghareeb rahmatullāhi alaihi (Khuldabad [Maharashtra]),
Hazrat Khwaja Muntajab-ud-deen Zar Zari Baksh rahmatullāhi alaihi (Khuldabad [Maharashtra]),
Hazrat Khwaja Jalaal-ud-deen Bhandari rahmatullāhi alaihi (Fatehabad [Maharashtra]),
Hazrat Shaikh Kamaal-ud-deen (Malwa),
Hazrat Sayyed Ahmad Badepaa rahmatullaāhi alaihi (Lancer [Hyderabad]),
Hazrat Shaikh Muhammad rahmatullaāhi alaihi (Manikpur),
Hazrat Sayyed Mahmood Kashkinaakar rahmatullāhi alaihi,
Hazrat Qaazi Mohiy-ud-deen Kashani rahmatullāhi alaihi.
Aap ke silsile ke (khalifa ke khalifa) mash'hoor Auliya Allāh :
Hazrat Makhdoom Ala-ul-Haq Pandawi rahmatullāhi alaihi aur Hazrat Noor Qutb e Aalam Pandawi rahmatullāhi alaihi, (Pandua [West Bengal]), Hazrat Shaikh Nasir-ud-deen Manikpuri rahmatullāhi alaihi, Hazrat Shaikh Husain Dhukkar-posh rahmatullāhi alaihi, Hazrat Makhdoom Sayyed Ashraf Jahaangeer Simnaani aur Hazrat Sayyed Abdur Razzaaq Noor-ul-ain rahmatullāhi alaihi (Kichhauchha [Uttar Pradesh]), Hazrat Shaikh Saif-ud-deen Muhammad Alwari rahmatullāhi alaihi, Hazrat Shaikh Kabeer al-Abaasi rahmatullāhi alaihi, Harat Asad-ud-deen Zinjani, Hazrat Husaam-ud-deen Manikpuri, Hazrat Fareed-ud-deen Tavaela Bakhsh;
Hazrat Khwaja Sayyed Muhammad Husain Banda-nawaaz Gesu-daraaz rahmatullāhi alaihi (Gulbarga [Karnataka]), Hazrat Sayyed Shaah Jamaalullāh Maghribi Husaini, Hazrat Maulana Ala-ud-deen Gwaliori;
Hazrat Khwaja Sayyed Kamaal-ud-deen Allama, Hazrat Khwaja Sayyed Siraaj-ud-deen aur Hazrat Khwaja Sayyed Muhammad Ilm-ud-deen (Piran Patan, Gujarat), Hazrat Khwaja Sayyed Mahmood Raajan, Hazrat Khwaja Jamaal-ud-deen Jumman, aur Hazrat  Khwaja Abu Saalih Hasan Muhammad (Ahmedabad), Hazrat  Khwaja Shams-ud-deen Muhammad, Hazrat  Khwaja Yahyā Madani, Hazrat  Khwaja Kaleemullāh Jahanabadi (Shah Jahanabad), Hazrat Nizaam-ud-deen Aurangabadi, Hazrat  Khwaja Fakhr-ud-deen Muhammad  Dehalwi, Hazrat Noor Muhammad Maharvi, Hazrat Shams-ud-deen Muhammad Sialwi, Hazrat Khwaja Haafiz Muhammad Ali Shaah Khairabadi, Hazrat  Khwaja Habeeb Ali Shaah, Hazrat  Shaah Ghulaam Muhammad Soofie, Hazrat  Peer Meher Ali Shaah; Hazrat Ghulam Qutb-ud-deen, Hazrat Soofi Inaayat Khan; Hazrat Shaah Niyaaz Ahmad Bareilwi rahmatullāhi alaihi, Hazrat Nizaam-ud-deen Husain, Hazrat Shaah Muhammad Fakhr-e-Alam Niyaazi;
Hazrat Zain-ud-deen Shirazi (Khuldabad);
Hazrat Mirza Agha Muhammad, Hazrat Muhammad Meera Husaini, 
**********
Aap ke wisaal ke ek din pehle aap ne apne khaadim Iqbaal saahab se farmaaya ke ‘Langar-khana me maujood tamaam maal ghareebo me taqseem kar diya jaaye taake mujhe inteqaal ke baad Rab ta’ala ko is ka hisaab dena na pade.’
Aap ka wisaal 18 Rabi’ us saani 725 Hijri (3 April 1325 A.D.) ko Budh ke roz subah ko 89 saal ki umr me hua.
Aap ki namaaz e janaaza Hazrat Shaikh Rukn-ud-deen Abul Fat'h ibn Shaikh Sadr-ud-den Aarif Suharwardi rahmatullāhi alaihi ne padhaai.
Aap ka mazaar Delhi me hai.
**********
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Khwaja Sayyed Mohammad Nizaam-ud-deen Auliya rahmatullāhi alaihi aur Ahle bait aur Auliya  se
Allāh Sab ko mukammal ishqe Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa'iz muraado ko puri farmae.
Aameen.

Post a Comment

0 Comments